سۋرەت: sportburo.kz
جارىس جاقىنداعان سايىن قاتىسۋشىلاردىڭ سانى تولىعىپ كەلەدى. وتكەن جولى تىلگە تيەك ەتكەن رەسەيدىڭ قوس جۇلدىزى – كارەن حاچانوۆ (الەمنىڭ 10-راكەتكاسى) پەن دانيل مەدۆەدەۆتەن (18) بولەك, ەسىمدەرى كوپشىلىككە تانىمال تاعى بىرنەشە ويىنشىلار تۋرنيرگە كەلەتىندەرىن راستادى. سولاردىڭ قاتارىندا الەمدىك رەيتينگتە توپ-100-دىككە ەنگەن فلاۆيو كوبوللي (25, يتاليا), لۋچانو داردەري (30, يتاليا), الەكس ميحەلسەن (32, اقش), برەندون ناكاشيما (33, اقش), گابريەل دياللو (35, كانادا), كورەنتين مۋتە (39, فرانتسيا), فابيان ماروجان (55, ماجارستان), حاماد مەدجەدوۆيچ (66, سەربيا), بۋ يانچاوكەتە (74, قىتاي), ادام ۋولتون (76, اۋستراليا), لاسلو دجەرە (77, سەربيا), دجوردان تومپسون (78, اۋستراليا), ماريانو ناۆونە (82, ارگەنتينا), ارتيۋر كازو (84, فرانتسيا), لۋكا ناردي (85, يتاليا) سىندى ساڭلاقتار بار.
ەلىمىزدىڭ تۋى استىندا الەمنىڭ 19-راكەتكاسى الەكساندر بۋبليك باستاعان ءبىر توپ بەلدى تەننيسشى ونەر كورسەتەدى. ولار – الەكساندر شەۆچەنكو (96), بەيبىت جۇقاەۆ (207), تيموفەي سكاتوۆ (235), ميحايل كۋكۋشكين (259), دەنيس ەۆسەەۆ (340). ۇيىمداستىرۋشىلار دارىندى جاس تەننيسشى ءامىر ومارحانوۆتى دا وسى سىنعا قوسۋدى قۇپ كورىپتى.
تاعى ءبىر ايتا كەتەرلىك جايت, كەزىندە رولان گارروس پەن اۋستراليانىڭ اشىق بىرىنشىلىگىنىڭ فينالىندا ويناعان گرەكيانىڭ ايگىلى تەننيسشىسى ستەفونوس تسيتسيپاس وسى تۋرنيرگە قاتىسپايتىن بولدى. وسى كۇنگە دەيىن «قازاقستانعا مىندەتتى تۇردە كەلەمىن» دەپ ەرەكشە قۇشتارلىق تانىتقان الەمنىڭ بۇرىنعى ءۇشىنشى راكەتكاسى تاياۋدا عانا دەۆيس كۋبوگىنىڭ برازيلياعا قارسى وتكىزگەن كەزدەسۋىندە جاراقات الدى. ۇيىمداستىرۋشىلار دەرەۋ ونى يتاليالىق لۋكا نارديمەن الماستىردى.
