35 جىل بۇرىن ۇرلانعان ءستراديۆاريدىڭ سكريپكاسى تابىلدى

استانا. 6 تامىز. اقش-تا 35 جىل بۇرىن بەلگىلى پولياك-امەريكان مۋزىكانتى, وقىتۋشى رومان توتەنبەرگتەن ۇرلانعان ءستراديۆاريدىڭ سكريپكاسى تابىلدى. مۋزىكالىق اسپاپ سكريپكاشىنىڭ قىزدارىنا قايتارىلادى. بۇل تۋرالى تاسس حابارلادى. Associated Press اگەنتتىگىنىڭ اقپارى بويىنشا, 1734 جىلى اتاقتى يتاليان شەبەرى انتونيو ستراديۆاري جاساعان ىشەكتى اسپاپ 1980 جىلى ۇرلانعان. ر.توتەنبەرگتىڭ سكريپكاسى ءوزى باسقارعان كەمبريدج قالاسىنداعى مۋزىكا مەكتەبىندە بەرگەن كونتسەرتىنەن كەيىن جوعالىپ كەتكەن. كۇدىك اسپاپتىڭ قاسىندا اينالشىقتاپ جۇرگەن جاس مۋزىكانت فيليپ دجونسونعا تۇسكەن, بىراق وعان ايىپ تاعۋ ءۇشىن ناقتى دالەل بولماعان. ف.دجونسون 2011 جىلى قايتىس بولدى. ول سكريپكانى ارنايى قابىنا سالىپ كىلتتەپ, بۇرىنعى ايەلىنە بەرىپ كەتكەن ەكەن. بىرنەشە جىل بويى كىلتتىڭ قۇپيا كودىن بىلە الماي كەلگەن ايەل اسپاپتىڭ قابىن بيىل عانا اشىپ, ونى باعالاۋشىعا الىپ بارعان. ال باعالاۋشى سكريپكانى تانىپ, سول بويدا ۇرلانعان ونەر شىعارمالارىن ىزدەۋمەن اينالىساتىن فبر بولىمىنە حابار بەرگەن. بوستون ۋنيۆەرسيتەتىنىڭ پروفەسسورى ر.توتەنبەرگ 2012 جىلى 101 جاسىندا قايتىس بولدى. ونىڭ ءۇش قىزىنىڭ ءبىرى نينا توتەنبەرگ اكەسىنىڭ ۇرلانعان سكريپكانى ەسكە العاندا قاتتى مۇڭاياتىنىن, ول ءۇشىن بۇل وقيعا وتباسىنىڭ ءبىر مۇشەسىنەن ايىرىلۋمەن بىردەي بولعاندىعىن ايتادى. ايدار ورىسباەۆ. دەرەك: tass.com. سۋرەت: eruditam.net.