فوتو: اشىق دەرەككوز
ادىلەت مينيسترلىگىنىڭ حابارلاۋىنشا, بۇگىندە باس پروكۋراتۋرانىڭ «تسيفرلىق باقىلاۋ» جۇيەسى ارقىلى بورىشكەرلەردى تەك قالا كوشەلەرى مەن قوعامدىق ورىنداردا عانا ەمەس, سونداي-اق اۋەجايلاردا, تەمىرجول جانە مەترو نىساندارىندا, الەۋمەتتىك ماڭىزى بار عيماراتتاردا دا انىقتاۋ مۇمكىندىگىن ىسكە قوسىلعان.
«بورىشكەرلەر حالىققا قىزمەت كورسەتۋ ورتالىقتارىندا مەملەكەتتىك قىزمەتتەردى الۋ كەزىندە نەمەسە اۋە جانە تەمىرجول بيلەتتەرىن ساتىپ الۋ بارىسىندا دەرەكتەر بازاسى ارقىلى اۆتوماتتى تۇردە بەت-بەينە سايكەستەندىرۋ ارقىلى انىقتالىپ جاتىر», دەلىنگەن حابارلامادا.
دەرەكتەرگە سايكەس, 2024 جىلدىڭ قاڭتار ايىنان ىزدەۋدە جۇرگەن بورىشكەرلەر سانى 4560 ادامدى قۇراعان. ونىڭ ىشىندە 2118 تۇلعانىڭ تۇرعىلىقتى مەكەنجايلارى انىقتالىپ, جالپى انىقتاۋ كورسەتكىشى 39,3% بولدى.
سونىمەن قاتار بۇل جۇيە ارقىلى بورىشكەرلەرگە تيىم سالىنعان اۆتوكولىكتەردى ىزدەستىرۋ مۇمكىندىگىن ىسكە اسىرۋ جۇمىستارى جۇرگىزىلەدى. وسى باعىتتاعى جۇمىستار باس پروكۋراتۋرا, ادىلەت مينيسترلىگى جانە جەكە سوت ورىنداۋشىلاردىڭ رەسپۋبليكالىق پالاتاسىنىڭ ءوزارا ىنتىماقتاستىعى اياسىندا جۇزەگە اسىرىلادى.
«قالالىق بەينەباقىلاۋ كامەرالارى مەن جاساندى ينتەللەكت قۇرالدارىنىڭ كومەگىمەن انىقتالعان, پايدالانۋعا تيىم سالىنعان كولىكتەر پوليتسيا قىزمەتكەرلەرىنىڭ قاتىسۋىمەن توقتاتىلىپ, ارنايى بەكىتىلگەن تۇراقتارعا جەتكىزىلەدى. ودان ءارى زاڭ تالاپتارىنا سايكەس سوت اكتىلەرىن تولىق ءارى ۋاقتىلى ورىنداۋدى قامتاماسىز ەتەدى. اتالعان شارالار ءوندىرىپ الۋشىلاردىڭ قۇقىقتارى مەن زاڭدى مۇددەلەرىن قورعاۋعا, سونداي-اق سوت شەشىمدەرىنىڭ ورىندالۋ تيىمدىلىگىن ارتتىرۋعا باعىتتالعان», دەلىنگەن حابارلامادا.
