قازاقستان رەسپۋبليكاسىنىڭ رەسەيدەگى توتەنشە جانە وكىلەتتى ەلشىلىگى مەن الماتى وبلىسى اكىمدىگى ۇيىمداستىرعان شارالار كورگەن جاننىڭ كوڭىلىنەن شىققانى ءسوزسىز. ماسكەۋدىڭ 550 كورەرمەن تاماشالايتىن «گەليكون-وپەرا» مۋزىكالىق تەاترىنىڭ فويەسىندە ۇلتىمىزدىڭ رۋحاني قۇندىلىقتارىن پاش ەتكەن كورمە كوزدىڭ جاۋىن الدى. ۇلى تۇلعا تۋىپ-وسكەن ەلدىڭ تۇرمىس-تىرشىلىگىن, مادەنيەتى مەن ونەرىن وسى جادىگەرلەر ايگىلەگەندەي.
مۇنداعى قازاقتىڭ حالىق اقىنى جامبىل جاباەۆتان باستاپ, كەيىنگى تاريحي تۇلعالار ومىرىنەن, ۇلتتىق ونەر تۋىندىلارىنان سىر شەرتكەن بۇيىمدار قاسىندا ايگىلى قولونەر شەبەرى داركەمباي شوقپار ۇلىنىڭ ۇلى داۋلەت ءوز شاكىرتتەرىمەن قازاقتىڭ تورسىعىنىڭ قالاي دايىندالىپ, تىگىلەتىنىن سول جەردە كورسەتتى. الماتى اپورتىنىڭ كورمەسى دە تارتىمدى كورىنىستىڭ ءبىرى بولدى. وسىنداي ادەمى اسەرگە بولەگەن كورمەدەن كەيىن جۇرت كونتسەرت زالىندا ينە شانشار جەر قالدىرمادى.
كونتسەرتتى ەلشى داۋرەن اباەۆ ءسوز سويلەپ اشتى.
الدىمەن نۇرعيسا تىلەنديەۆتىڭ قىزى ءدىنزۋحرانىڭ ديريجەرلىگىمەن كومپوزيتوردىڭ «اتا تولعاۋى» كۇيىن «اق جاۋىن» مەملەكەتتىك كامەرالىق وركەسترى تارتىپ, وعان مەملەكەتتىك «التىناي» حالىق ءبيى ءانسامبلى بيلەدى.
كومپوزيتوردىڭ «الاتاۋىن» شىرقاعان فارحات كۋبيەۆ, «كۋا بولدى» شالقىتقان نۇرعيسا نەمەرەسى دايانا تىلەنديەۆا, «اقساق قۇلاندى» شەرتكەن سىرىم شونباەۆ,«قايران مەنىڭ جۇرەگىمدى» سالعان رۋحيا بايدۇكەنوۆا, «كوش كەرۋەن» كۇيىنە بيلەگەن «التىناي» ءانسامبلى, «دۋبوسەكوۆو زيراتىندا» انىمەن تولقىتقان تولەگەن راحىمباەۆ, «كوڭىل تولقىنىن» شەرتكەن سەكەن تۇرىسبەك, «سارىجايلاۋدى» شارىقتاتقان مەدەت ورىنباەۆ, مۇسا ءساپارالى, ءادىل احمەتجانوۆ, «اققۋ» كۇيىنە بيلەگەن ءبيشى اسەل ەرجانوۆا, «اجەمەنى» اۋەلەتكەن بيبىگۇل قيلىمحان, «القيسسانى» ناقىشىنا كەلتىرە تارتقان كۇيشى نۇركەن ءاشىروۆ, «قۇستار انىمەن» تەربەگەن فارحات كۋبيەۆ پەن مەدەت ورىنباەۆ ونەرىنە كورەرمەن قاۋىم ىقىلاسپەن قول سوقتى. ال نۇرعيسا تىلەنديەۆتىڭ «ماحامبەتىن» تىڭداعاندا تەاتردى اسقاق رۋح كەرنەدى.
وسى شىعارمالاردى سۇيەمەلدەگەن «اق جاۋىن» مەملەكەتتىك كامەرالىق وركەسترىنە ديريجەرلىك جاساعان ءدىنزۋحرا تىلەنديەۆانىڭ دا, نۇركەن ءاشىروۆتىڭ دە ونەرىنە حالىق رازىلىق ءبىلدىردى.
ءبىر جارىم ساعات ءاپ-ساتتە بىتە قالار دەپ كىم ويلاعان؟ كونتسەرتتىڭ شىمىلدىعى كومپوزيتوردىڭ قادىر مىرزا ءالى ولەڭىنە جازىلعان ء«وز ەلىم» انىمەن جابىلا باستاعاندا, كورەرمەن ءىلتيپاتىندا شەك بولمادى.
ساحنا ماسكەۋ قالاسىنىڭ اكىمدىگىنەن, قازاقستان ەلشىلىگىنەن, باسقا دا رەسمي ورىنداردان كەلگەن قۇرمەت-قوشەمەت گۇلدەرىنە تولىپ كەتتى.
ساعاتبەك مەدەۋبەك ۇلى
