اشىلۋ سالتاناتىنا جاڭاارقا اۋدانى اكىمىنىڭ ورىنباسارى اسەت امانجولوۆ قاتىسىپ, ارنايى قۇتتىقتادى. سونىمەن قاتار, اۋىل اقساقالدارى كاششافيدين شايكوزوۆ, راحىمباي ۇمبەتوۆ, قايرات كوپباەۆ ىزگى تىلەكتەرىن ايتىپ, باتاسىن بەردى.
تۇگىسكەن اۋىلدىق وكرۋگىنىڭ اكىمى سايات سماعۇل ۇلى ارنايى اپپاراتتى سالتاناتتى تۇردە ىسكە قوسىپ, جينالعان قاۋىم كىرپىش شىعارۋ پروتسەسىنە كۋا بولدى.
زاۋىت يەسى - تۇگىسكەن اۋىلىنىڭ تۇرعىنى نيازالين ەربول احمەتجان ۇلى.
ەربول احمەتجان ۇلى ءوز قاراجاتى ەسەبىنەن قۇنى 33 ملن 500 مىڭ تەڭگەگە SSG-500 ماركالى ۆيبروپرەسستى اپپارات ارقىلى كىرپىش شىعاراتىن زاۋىت قۇرىلعىسىن ساتىپ اكەلىپ, ورناتتى. جالپى زاۋىت اشۋعا كاسىپكەر ءوز قاراجاتى ەسەبىنەن 80 ملن. تەڭگە جۇمسادى. اتالعان زاۋىت قۇمبلوك, قابىرعا بلوكتارىن, تروتۋار پليتكالارىن, جيەك تاستارىن قۇيىپ شىعارۋمەن اينالىسادى.
اتالعان قۇرىلعى ساعاتىنا 500-600 دانا, كۇنىنە 5000-6000 دانا كىرپىش شىعارا الادى. قازىرگى تاڭدا اتالعان ءوندىرىس ورنىندا التى ادام جۇمىس ىستەيدى. ءوندىرىس تولىق قۋاتتىلىعىندا جۇمىس ىستەگەندە 12-15 ادامعا دەيىن تۇراقتى جۇمىس بەرەتىن بولادى.
ۇلىتاۋ وبلىسى
