قۇجاتتا يۆگ.1م زەرتتەۋ رەاكتورىنىڭ جوعارى بايىتىلعان پايدالانىلعان وتىنىن ارنايى ازىرلەنگەن Silo تيپىندەگى قويماعا تابىستى ورنالاستىرۋ, پايدالانىلعان يادرولىق وتىندى Silo قويماسىندا ونىڭ تۇپكىلىكتى كادەگە جاراتىلۋىنا قاتىستى بىرلەسكەن شەشىم قابىلدانعانعا دەيىن ساقتاۋ, جوعارى بايىتىلعان ۋراندى پايدالانۋدى بارىنشا ازايتۋ جانە يادرولىق قارۋدى تاراتپاۋ رەجيمىن نىعايتۋ جونىندەگى ىنتىماقتاستىقتى جالعاستىرۋ نيەتى اتاپ وتىلگەن.
«قازاقستان يادرولىق قاۋىپسىزدىك سالاسىنداعى حالىقارالىق مىندەتتەمەلەرىن دايەكتى تۇردە ورىندايدى. اتالعان مالىمدەمەگە قول قويۋ ءبىزدىڭ بەيبىت اتومدى دامىتۋعا جانە جاھاندىق تاراتپاۋ رەجىمىن نىعايتۋعا بەيىلدىلىگىمىزدى راستايدى», دەدى ەلىمىزدىڭ اتوم ەنەرگياسى جونىندەگى اگەنتتىگىنىڭ توراعاسى الماسادام ساتقاليەۆ.
NNSA وكىلدەرى اقش-تىڭ قازاقستانمەن ىنتىماقتاستىقتى جوعارى باعالايتىنىن ءارى يادرولىق قاۋىپسىزدىكتى ارتتىرۋعا باعىتتالعان بىرلەسكەن جوبالاردى جالعاستىرۋعا نيەتتى ەكەنىن اتاپ ءوتتى. ال بۇعان دەيىن وسىنداي بىرلەسكەن مالىمدەمەلەر 2016, 2019, 2020 جانە 2023 جىلدارى دا قابىلدانىپ, قازاقستان مەن اقش-تىڭ بەيبىت اتوم سالاسىنداعى تۇراقتى ارىپتەستىگىنىڭ سيمۆولىنا اينالدى.
