عارىشقا ۇشپاقشى بولعان ءانشى برايتماننىڭ اندەرى حعس-تا شىرقالادى

استانا. 6 تامىز. حالىقارالىق عارىش ستانساسىنىڭ ەكيپاجى وزدەرىمەن بىرگە ءانشى سارا برايتماندى الىپ كەتۋدىڭ امالىن تاپتى. بۇل تۋرالى informburo.kz حابارلادى. جاڭا ەكسپەديتسيا ەكيپاجى حالىقارالىق عارىش ستانساسىنا سارا برايتماننىڭ ستۋديالىق البومدارىندا جازىلعان داۋسىن الىپ كەتەتىن بولدى. ديسكتەردى ەكيپاج مۇشەلەرى زەرىككەندە تىڭداماقشى. بۇل تۋرالى ويىن رەسەي عارىش اگەنتتىگىنىڭ عارىشكەرى سەرگەي ۆولكوۆ ستانسا جاڭا ەكيپاجىنىڭ ەمتيحاندىق جاتتىعۋىندا ءبىلدىردى. ەستەرىڭىزگە سالا كەتەيىك, ۇلىبريتانيا ءانشىسى سارا برايتمان رەسەيلىك جۇلدىزدار قالاشىعىنداعى عارىشكەرلەردى دايارلاۋ ورتالىعىندا دايىندىقتان وتكەن بولاتىن. الايدا, وتباسىلىق جاعدايىنا بايلانىستى ءانشى جوسپارلانعان ۇشۋدان باس تارتتى. ناتيجەسىندە, ونىڭ ورنىن قازاقستاندىق عارىشكەر ايدىن ايىمبەتوۆ الماستىردى. ەكيپاجدىڭ وربيتاعا 2 قىركۇيەك كۇنى «سويۋز تما-18م» باسقارىلاتىن عارىش كەمەسىمەن ۇشۋى جوسپارلانعان. «بىزدە ەڭ سوڭعى مينۋتتا وزگەرىستەر بولدى. قازىر بىزبەن بىرگە ەكى بورتينجەنەر بار. بارلىعى جاقسى, ءبىز دايىندالدىق. قوبالجۋعا ەش نەگىز جوق», – دەپ اتاپ ءوتتى سەرگەي ۆولكوۆ. ءوز كەزەگىندە ون كۇندىك عارىش ساپارىنان باس تارتقان سارا برايتماننىڭ ورنىن الماستىرعان قازاقستاندىق عارىشكەر ايدىن ايىمبەتوۆ «ۇشۋ مەرزىمىنىڭ تىم قىسقالىعىنا وكىنبەيسىز بە؟» دەگەن سۇراققا: «ازدان باستاپ, كوپپەن اياقتايمىز», – دەپ جاۋاپ بەردى. حعس-45/46/ەپ-18 جاڭا مىندەتتەگى نەگىزگى ەكيپاج قۇرامىندا رەسەي عارىش اگەنتتىگىنىڭ عارىشكەرى سەرگەي ۆولكوۆ (حالىقارالىق عارىش ستانساسىنا 2008 جىلى ۇشقان), ەۋروپا عارىش اگەنتتىگىنىڭ استروناۆتى اندرەاس موگەنسەن مەن قازعارىش عارىشكەرى ايدىن ايىمبەتوۆ بار. ەلامان قوڭىر. دەرەك: informburo.kz. سۋرەت: zakon.kz.