كەش شىمىلدىعى تەاترلاندىرىلعان قويىلىممەن اشىلىپ, جالعاسىن جاس ونەرپازداردىڭ اۋەزدى اندەرى مەن مىڭ بۇرالعان بيلەرى تاپتى. ءاربىر شىعارماشىلىق ءنومىر كورەرمەندەردىڭ ىستىق ىقىلاسىنا بولەنىپ, مەرەكەلىك كوڭىل-كۇي سىيلادى.
مەرەكەنىڭ ەڭ قىزىقتى بولىگى بالالارعا ارنالعان وتباسىلىق ويىندار بولدى. ويىنعا قاتىسقان جەڭىمپازدارعا وقۋشىلار سارايىنىڭ اتىنان ارناۋلى سىيلىقتار تابىس ەتىلدى. اتاپ ايتقاندا, استرونوميا وبسەرۆاتورياسىنا اسەرلى ساياحات, «ساز سىرى» قىش شەبەرحاناسىندا شىعارماشىلىققا جەتەلەيتىن شەبەرلىك ساباعىنا سەرتيفيكات, گيپس مۇسىندەرىن جاساۋعا ارنالعان سەرتيفيكاتتار, ۇلتتىق ناقىشتاعى شوپەر جاساۋعا ارنالعان سەرتيفيكات.
بۇل سىيلىقتار بالالاردىڭ عىلىمعا, ونەرگە جانە ۇلتتىق قۇندىلىقتارعا قىزىعۋشىلىعىن ارتتىرىپ قانا قويماي, ءار وتباسىعا جاڭا تاجىريبە مەن قۋانىش سىيلادى.
ايتا كەتەيىك, م.م. كاتاەۆ اتىنداعى وبلىستىق وقۋشىلار سارايى – 2000-نان استام بالانىڭ ارمانىن قاناتتاندىراتىن شىعارماشىلىق وردا. مۇندا ونەر مەن عىلىم, سپورت پەن تەحنيكا, مەديا مەن تەاتر باعىتتارى قارقىندى دامىپ كەلەدى. وتكەن وقۋ جىلىندا تاربيەلەنۋشىلەر 162 جۇلدە يەلەنسە, بيىل ودان جوعارى جەتىستىكتەرگە جەتۋدى كوزدەپ وتىر.
