- فۋتبولدان ەلىمىز پرەمەر-ليگاسىنىڭ 23-تۋرى مىناداي ناتيجەلەرمەن اياقتالدى: «اتىراۋ» – «توبىل» 1:0, «قىزىلجار» – «وقجەتپەس» 3:1, «ورداباسى» – «جەڭىس» 2:1, «تۇران» – « ۇلىتاۋ» 1:1, «قايرات» – «اقتوبە» 1:0, «استانا» – «ەلىماي» 3:3. سوڭعى كەزدەسۋدەگى جەڭىسىنەن كەيىن «قايرات» جارىس كەستەسىندە جەكە-دارا كوش باستاپ تۇر. الماتىلىقتاردىڭ قورجىنىندا 49 ۇپاي بار. ەكىنشى ورىنداعى «استانانىڭ» باستى قارسىلاستارىنان ەكى ۇپايى كەم. ءۇشىنشى ساتىعا جايعاسقان «توبىلدا» 44 ۇپاي. الايدا قوستانايلىقتار وزگە كلۋبتاردان ءبىر ويىن كەم وتكىزگەن.
- اقش-تىڭ لاس-ۆەگاس قالاسىندا وتكەن كاسىپقوي بوكس كەشىندە اسا اۋىر سالماقتا سىنعا تۇسكەن يۆان دىچكو (15-0, 14 كو) امەريكالىق دجەرمەين فرانكليننەن (23-2, 15 كو) ۇپاي سانىمەن ۇتىلدى. بۇل – وتانداسىمىزدىڭ سپورتتىق مانسابىنداعى العاشقى جەڭىلىسى. جارىستىڭ باستى جەكپە-جەگىندە اقش-تىڭ ءدۇلد ۇلى تەررەنس كروۋفورد (42-0, 31 كو) مەكسيكانىڭ ماقتانىشى ساۋل «كانەلو» الۆارەستى جەڭىپ, ەكىنشى ورتا سالماقتاعى (63-3-2, 39 كو) الەمنىڭ ءابسوليۋتتى چەمپيونى اتاندى.
- پاريجدە ۇيىمداستىرىلعان «شاقىرۋ كۋبوگىندە» ەلىمىزدىڭ گيمناستى ناريمان قۇربانوۆ التىن تۇعىرعا كوتەرىلدى. ول «ات» جاتتىعۋىندا 15,066 ۇپاي جيناپ, جەڭىسكە جەتتى. كۇمىس, قولا مەدالداردى ارمەنيالىق گاملەت مانۋكيان (14,800 ۇپاي) مەن يتاليالىق گابريەلە تارگەتتا (14,733) يەلەندى. ەلىمىزدىڭ تاعى ءبىر سپورتشىسى زەينوللا ىدىرىسوۆ ءتورتىنشى ورىندى قاناعات تۇتتى.
- تەننيسشىلەردىڭ الەمدىك رەيتينگى جاڭارتىلدى. اتر تىزىمىندە يسپانيالىق كارلوس الكاراس الدىنا جان سالار ەمەس. ونى يتاليالىق ياننيك سيننەر مەن گەرمانيالىق الەكساندر زۆەرەۆ وكشەلەپ كەلەدى. ەلىمىزدىڭ ءبىرىنشى راكەتكاسى الەكساندر بۋبليك 19-ورىندا تۇر. الەكساندر شەۆچەنكو – 96, بەيبىت جۇقاەۆ – 207, دميتري پوپكو – 219, تيموفەي سكاتوۆ – 235, ميحايل كۋكۋشكين – 259-ورىنداردا. ايەلدەر اراسىنداعى ۇزدىك ۇشتىك – بەلارۋستىك ارينا سوبولەنكو, پولشالىق يگا شۆەنتەك, امەريكالىق كوكو گاۋفف. ەلىمىزدىڭ بەتكەۇستارى ەلەنا رىباكينا توپ-10-دىقتى تۇيىندەدى. WTA رەيتينگىندە يۋليا پۋتينتسەۆا – 61, زارينا دياس – 233, جىبەك قۇلامباەۆا 302-ساتىعا تابان تىرەدى.
