كومپانيانىڭ باسقارما توراعاسى اسحات حاسەنوۆ اتىراۋ مۇناي وڭدەۋ زاۋىتىنىڭ جوسپارلى الدىن الۋ جۇمىستارىنا دايىندىعىن تەكسەردى. اتالعان كەزەڭدە زاۋىتتاعى قىسىممەن جۇمىس ىستەيتىن 1174 ىدىس پەن اپپاراتقا, 46 پەشكە, تەحنولوگيالىق 1458 قۇبىر جەلىسىنە مىندەتتى تەحنيكالىق كۋالاندىرۋلار مەن ساراپتامالار جۇرگىزۋ كوزدەلىپ وتىر. سونداي-اق, ءارتۇرلى قوندىرعىلاردا 316 توننادان استام كاتاليزاتور الماستىرىلادى.
«ەڭ كۇردەلى ءارى نەگىزگى وپەراتسيا – باياۋ كوكستەۋ قوندىرعىسىنىڭ رەاكتورلارىنداعى كونۋستى تۇپتەردى اۋىستىرۋ. بۇل ءۇشىن زاۋىت اۋماعىندا جۇك كوتەرگىشتىگى 750 توننا بولاتىن ەكى بىرەگەي كران ورناتىلىپ جاتىر. رەاكتورلاردا بولاشاقتا جابدىق سەنىمدىلىگىن ارتتىرۋ ءۇشىن يننوۆاتسيالىق بولجامدى دياگنوستيكا جۇيەسى ىسكە قوسىلادى», دەپ حابارلادى كومپانيانىڭ ءباسپاسوز قىزمەتى.
جوسپارلانعان الدىن الۋ جۇمىسىن 1 880 مامان اتقارادى. جۇمىستى ساپالى اتقارۋ ءۇشىن 62 ارنايى تەحنيكا تارتىلادى.
«وسى كەزەڭدە جانار-جاعارمايدىڭ ىشكى نارىقتاعى تۇراقتىلىعىن ساقتاۋ, مۇناي ونىمدەرىن جونەلتۋدى قامتاماسىز ەتۋ ءۇشىن زاۋىت جەتكىلىكتى كولەمدە تاۋارلىق ءونىم قورىن قالىپتاستىرۋ بويىنشا بارلىق قاجەتتى شارالاردى قابىلداپ جاتىر», دەپ ءمالىم ەتتى كومپانيادان.
جىل باسىنان بەرگى 8 ايدا جەڭىل مۇناي ونىمدەرى ءوندىرىسىنىڭ ۇلەسى 77,5% قۇرادى. ال وڭدەۋ تەرەڭدىگى – 88,6%. ديزەل وتىنىنىڭ (+15%) جانە اۆياوتىننىڭ (+13%) ءوندىرىس جوسپارى ارتىعىمەن ورىندالدى. سونىڭ ناتيجەسىندە كاسىپورىن بيۋدجەتكە 129 ملرد تەڭگە اۋدارىپ, جوسپارلى كورسەتكىشتەن 24 ملرد تەڭگەگە ارتىق ءتۇسىمدى قامتاماسىز ەتتى.
سونداي-اق, زاۋىتتىڭ جىلدىق وڭدەۋ كولەمىن 6,1 ملن تونناعا دەيىن ارتتىرۋ, جوندەۋارالىق كەزەڭدى 36 ايعا دەيىن ۇزارتۋ كوزدەلىپ وتىر.
