سۋرەتتە: Astana Motors Manufacturing Kazakhstan مۋلتيبرەندتى زاۋىتى
Astana Motors Manufacturing Kazakhstan مۋلتيبرەندتى زاۋىتى ءوز جۇمىسىن باستادى. وسىعان وراي Astana Motors زاۋىتتا شىعارىلاتىن اۆتوكولىكتەردىڭ باعاسى تومەندەيتىنىن حابارلايدى.
قازىرگى تاڭدا زاۋىتتىڭ قۇرال-جابدىقتارى تولىعىمەن ورناتىلىپ, ىسكە قوسىلدى. زاۋىت ىسكە قوسۋ جانە رەتكە كەلتىرۋ جۇمىستارىن جۇرگىزىپ, Chery, Changan, Haval اۆتوكولىكتەرىن شىعارۋعا ارنالعان قۇرامداس بولىكتەردىڭ العاشقى پارتياسىن الدى.
Astana Motors كومپانياسىنىڭ نەگىزىن قالاۋشى نۇرلان سماعۇلوۆ ءوندىرىستى لوكاليزاتسيالاۋدىڭ ارقاسىندا اۆتوكولىكتەر قولجەتىمدى بولاتىنىن ايتىپ, 16 قىركۇيەكتەن باستاپ Chery, Changan جانە Haval مودەلدەرىنىڭ باعاسى تومەندەيتىنىن حابارلادى.
«ونەركاسىپتىك قۇراستىرۋ بويىنشا مەملەكەتپەن كەلىسىم اياسىندا زاۋىت دانەكەرلەۋ جانە بوياۋ (CKD) ارقىلى ۇساق ءتۇيىندى ءوندىرىس ءادىسىن قولدانىپ, ءونىمنىڭ 30%-ىن قامتاماسىز ەتۋگە مىندەتتەندى. اۆتوكولىكتەردى لوكاليزاتسيالاۋ ارقاسىندا ولاردىڭ قۇنى تومەندەيدى. وسى ورايدا, ءبىز جاۋاپتى كاسىپكەرلەر رەتىندە مودەلگە بايلانىستى جوعارىدا اتالعان اۆتوكولىكتەردىڭ باعاسىن 7-15%-عا تومەندەتەمىز», دەدى نۇرلان سماعۇلوۆ.
اۆتوكولىكتەردىڭ جاڭا باعالارى تۋرالى تولىعىراق جاقىن ارادا قازاقستانداعى Chery, Changan, Haval جانە Tank رەسمي ديلەرلەرى حابارلايتىن بولادى. اتالعان برەندتەر مەن ءوندىرۋشى زاۋىت Astana Motors كومپانياسىنىڭ قۇرامىنا كىرەدى.
ايتا كەتەيىك, Astana Motors Manufacturing Kazakhstan زاۋىتىنىڭ ءوندىرىس قۋاتى - جىلىنا 120 مىڭ اۆتوكولىك. ءوندىرىس اۋماعى - 211 مىڭ شارشى مەتر, ال جەر تەلىمى - 309 مىڭ شارشى مەتر. كاسىپورىن تولىق ءوندىرىس قۋاتىنا شىققان كەزدە جۇمىس ورىن سانى 3600 ادامدى قۇرايدى. قازىرگى تاڭدا 1700 ادام جۇمىسپەن قامتىلعان.
وندىرىستىك كەشەن ايماعىندا روبوتتاندىرىلعان جانە اۆتوماتتاندىرىلعان دانەكەرلەۋ, بوياۋ جانە قۇراستىرۋ تسەحتارى, كومپونەنتتەر قويماسى, شاناقتاردى اۆتوماتتى جەتكىزۋ قويماسى, تارازىلاۋ ورنى, سىناق الاڭى, لاك-بوياۋ جانە دايىن ءونىم قويمالارى, ينجەنەرلىك جەلىلەر, اكىمشىلىك-شارۋاشىلىق عيماراتى جانە ت.ب. ورنالاسقان.
مۋلتيبرەندتى زاۋىتتا بارلىعى 54 روبوت جۇمىس ىستەيدى. دانەكەرلەۋ تسەحى شاناق ەلەمەنتتەرىنىڭ قوسىلعان جەرلەرىنىڭ جوعارى دالدىگى مەن تۇراقتى ساپاسىن قامتاماسىز ەتەتىن 17 جاپوندىق Fanuc روبوتىمەن جابدىقتالعان. بوياۋ تسەحىندا ABB (شۆەتسيا-شۆەيتساريا) ماركالى 34 ونەركاسىپتىك روبوت پەن اتوميزاتور جۇمىس ىستەيدى. كاتافورەز جەلىسىندە 20 ۆاننا ورناتىلعان. بۇل جوعارى تەحنولوگيالىق دەڭگەيدە شاناقتى وڭدەۋگە جانە كورروزياعا قارسى جابىندى جاعۋعا مۇمكىندىك بەرەدى.
قۇراستىرۋ تسەحىندا ءۇش Fanuc روبوتى جۇمىس ىستەيدى. ولار الدىن الا بەلگىلەنگەن باعدارلاما تراەكتورياسىنا سايكەس اۆتوكولىكتىڭ شىنى ەلەمەنتتەرىنە جەلىم جاعۋ بويىنشا تاپسىرمالاردى ورىندايدى. روبوتتار قۇراستىرۋ پروتسەسىنىڭ ساپاسى مەن تۇراقتىلىعىن قامتاماسىز ەتۋگە ارنالعان.
زاۋىتقا قاجەتتى قۇرال-جابدىقتاردىڭ نەگىزگى جەتكىزۋشىسى BMW, Hyundai, Toyota, Jaguar, Land Rover, BYD, Mercedes-Benz, Volkswagen جانە ت.ب. جاھاندىق اۆتو الپاۋىتتارعا قۇرال-جابدىقتاردى شىعارۋدا كوشباسشى - Automotive Engineering Corporation (قحر) بولدى.
سونداي-اق زاۋىتتا Siemens (گەرمانيا), ABB (شۆەتسيا-شۆەيتساريا), Schneider (فرانتسيا), Fanuc (جاپونيا) جانە ت.ب. الەمدىك برەندتەردىڭ جابدىقتارى دا بار.
مۋلتيبرەندتى زاۋىتتىڭ قۇرىلىسىن مەملەكەت باسشىسى قاسىم-جومارت توقاەۆ 2022 جىلعى قاراشادا الماتىعا جۇمىس ساپارى كەزىندە باستاۋعا رۇقسات بەرگەن بولاتىن.
تەحنيكالىق ليتسەنزيالاۋ تۋرالى كەلىسىمدەرگە (TLA) 2023 جىلعى مامىردا پرەزيدەنت قاسىم-جومارت توقاەۆتىڭ قىتايعا ساپارى بارىسىندا سيان قالاسىندا قىتايلىق ىسكەر توپ وكىلدەرىمەن وتكەن دوڭگەلەك ۇستەل كەزىندە قول قويىلدى.
جوباعا سالىنعان ينۆەستيتسيا كولەمى 202 ميلليارد تەڭگەدەن استى. ونىڭ 37% — Astana Motors كومپانياسىنىڭ جەكە قاراجاتى, ال 63% — قازاقستاننىڭ دامۋ بانكى مەن ونەركاسىپتى دامىتۋ قورىنىڭ كرەديتتىك قۇرالدارى ارقىلى 9% مولشەرلەمەدە 15 جىلعا قارىزعا الىنعان قايتارىمدى قاراجات ەسەبىنەن قارجىلاندىرىلدى. جوبا قر يندۋستريا جانە قۇرىلىس مينيسترلىگى, قر سىرتقى ىستەر مينيسترلىگى جانە الماتى قالاسى اكىمدىگىنىڭ قولداۋىمەن جۇزەگە اسىرىلدى.
