ەۋروپا ليگاسى. بۇگىن «قايرات» شوتلانديادا «ابەردينمەن» وينايدى

استانا. 6 تامىز. بۇگىن تۇندە «قايرات» ۋەفا ەۋروپا ليگاسى ىرىكتەۋ ءتۋرنيرىنىڭ ءۇشىنشى راۋندى شەڭبەرىندە شوتلانديانىڭ «ابەردين» كومانداسىمەن قارىمتا كەزدەسۋ وتكىزەدى. سىرت الاڭدا بولاتىن ماتچ استانا ۋاقىتىمەن ساعات 00:45-تە باستالادى. بۇل تۋرالى egemen.kz حابارلادى. اپتا بۇرىن الماتىدا وينالعان ويىندا قايراتتىقتار 2:1 ەسەبىمەن جەڭىسكە جەتكەن ەدى. سوندىقتان بۇگىنگى كەزدەسۋدە ۆلاديمير ۆايسستىڭ شاكىرتتەرى ءۇشىن كەز كەلگەن تەڭ ەسەپ كەلەسى اينالىمعا شىعۋعا جەتكىلىكتى. سوعان قاراماستان, باس جاتتىقتىرۋشى «قايراتتىڭ» شابۋىلعا كوپ كۇش جۇمسايتىنىن ايتتى. ءبىرىنشى ويىندا كوماندانىڭ ۇزدىك ءبومبارديرى جەرار گوۋ الاڭعا شىقپاعان بولاتىن. سونداي-اق, نەگىزگى قۇرامنىڭ ويىنشىسى ريەرا دا الماتىداعى تارتىسقا قاتىسپادى. جاتتىقتىرۋشىنىڭ مۇنداي شەشىم قابىلداۋىنا فۋتبولشىلاردىڭ جاتتىعۋ كەزىندە العان جاراقاتتارى سەبەپ بولدى. دەگەنمەن, قارىمتا ويىنعا گوۋدىڭ قاتىسۋى ابدەن مۇمكىن. سەبەبى, ول كوماندامەن بىرگە شوتلاندياعا باردى. ايتا كەتەيىك, بۇل كەزدەسۋدى وتاندىق تەلەارنالار كورسەتپەيدى. ەلامان قوڭىر. دەرەك: egemen.kz. سۋرەت: nur.kz.