جيىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين وڭىرلىك تۇراقتاندىرۋ قورلارىن جاڭا ونىممەن تولتىرۋ جانە ء«تاريفتى ينۆەستيتسياعا ايىرباستاۋ» باعدارلاماسىنىڭ جۇزەگە اسىرىلۋ بارىسى بويىنشا باياندامالاردى تىڭدادى.
ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتىنىڭ توراعاسى تيمۋر قوسىمباەۆتىڭ ايتۋىنشا, بيىلعا جوسپارلانعان تاريفتەردىڭ كوتەرىلۋ جۇمىستارى اياقتالعان, جاڭا وتىنىمدەر تۇسپەگەن.
— جىل سوڭىنا دەيىن حالىق پەن جەڭىلدىگى بار تاريف ساياساتى قولدانىلاتىن الەۋمەتتىك ماڭىزى بار ازىق-ت ۇلىك وندىرۋشىلەرى ءۇشىن تاريف باعاسى وسپەيدى. بۇل اقىلى قىزمەتتەردىڭ قىمباتتاۋىنىڭ ينفلياتسياعا اسەرىن ازايتادى, — دەدى ول.
اۋىل شارۋاشىلىعى ۆيتسە-ءمينيسترى ەربول تاسجۇرەكوۆ تۇراقتاندىرۋ قورلارىن جاڭا ونىممەن تولتىرۋ جۇمىستارىنىڭ جەدەل قارقىنمەن جۇرگىزىلىپ جاتقانىن ايتتى. ونىڭ مالىمەتىنشە, كارتوپ, پياز, ءسابىز جانە قىرىققابات جەتكىزۋگە ارنالعان كەلىسىمشارتتار 2025–2026 جىلداردىڭ ماۋسىمىندا حالىقتىڭ قاجەتتىلىگىنىڭ 50 پايىزىن قامتىپ وتىر.
اتىراۋ, الماتى وبلىستارى مەن استانا قالاسىندا پيازعا دەگەن سۇرانىس تولىعىمەن جابىلعان. قاراعاندى, تۇركىستان, اباي, اقمولا وبلىستارى مەن الماتى قالاسىندا دا جۇمىس قارقىندى ءجۇرىپ جاتىر. ال اقتوبە وبلىسىندا كوكونىستىڭ بارلىق ءتۇرى بويىنشا كەلىسىمشارتتار جاساسۋ دەڭگەيى تومەن ەكەنى ايتىلدى.
سەرىك جۇمانعارين باقىلاۋدى كۇشەيتۋ ءۇشىن وڭىرلەرگە ارنايى جۇمىس توبىن جىبەرۋدى, تۇراقتاندىرۋ قورلارىنداعى كولەم مەن قوردىڭ جەتكىلىكتى بولۋىن تەكسەرۋدى تاپسىردى.
