وسىعان وراي جاڭا ماۋسىمدا «حابار» تەلەارناسى ەل تاريحىندا العاش رەت الەۋمەتتىك ماڭىزى زور ءىرى جوبانى — «شەبەرلەر شايقاسى» اتتى رەاليتي-شوۋدى ۇسىنباق. جوبا قازان ايىندا باستالىپ, جىل سوڭىنا دەيىن جالعاسادى. ونىڭ باستى كەيىپكەرلەرى — دانەكەرلەۋشى, قۇرىلىسشى, ەلەكتريك, اسپاز, ءورت ءسوندىرۋشى سىندى ءتۇرلى جۇمىسشى ماماندىق يەلەرى.
مادەنيەت جانە اقپارات ءمينيسترى ايدا بالاەۆانىڭ ايتۋىنشا, باعدارلاما قاتىسۋشىلارى كاسىبي بىلىگىن, ومىرلىك تاجىريبەسىن, توزىمدىلىگىن جانە كوماندالىق رۋحىن شىڭدايدى. شەبەرلەر زاۋىتتا, قۇرىلىس الاڭىندا, شەبەرحانادا نەمەسە وندىرىستىك ورتادا تاپسىرمالار ورىندايدى. ءار شىعارىلىم ءبىر ادامنىڭ تاعدىرى مەن ءومىر جولىنا ارنالىپ, ولاردىڭ تاباندىلىعى مەن جەڭىسى, جەڭىلىسى كورەرمەنگە ۇسىنىلادى.
جوبانىڭ باستى ماقساتى — ادال ەڭبەك پەن شىنايى شەبەرلىكتى دارىپتەۋ. ۇيىمداستىرۋشىلاردىڭ حابارلاۋىنشا, جەڭىمپازدارعا قوماقتى جۇلدە قورى قاراستىرىلعان.
— «شەبەرلەر شايقاسى — ەڭبەكتىڭ قادىرىن تۇسىنەتىن ءاربىر جانعا ءوزىن تانىتۋعا, كاسىبىن دارىپتەۋگە, ەلدىڭ العىسىنا بولەنۋگە بەرىلگەن بىرەگەي مۇمكىندىك. بۇل باعدارلاما ماڭداي تەردىڭ قادىرىن باعالاپ, ەڭبەكتىڭ ەل بولاشاعىنا بەرىك ىرگەتاس ەكەنىن كورسەتەدى», — دەلىنگەن ءمينيستردىڭ جەلىدەگى جازباسىندا.
