فوتو: قىرمىزى جۇماعاليقىزى
جوبا شەڭبەرىندە بارلىعى 655 العاشقى مەديتسينالىق-سانيتاريالىق كومەك كورسەتۋ نىسانىن سالۋ جوسپارلانعان. ونىڭ ىشىندە 540 عيمارات پايدالانۋعا بەرىلدى, ال قالعان 115-ءى جىل سوڭىنا دەيىن اياقتالادى. سونىڭ ناتيجەسىندە شامامەن 200 اۋىلدا العاش رەت مەديتسينالىق پۋنكتتەر مەن امبۋلاتوريالار اشىلىپ, تۇرعىندار ساپالى قىزمەتكە قول جەتكىزگەن.
ۆيتسە-ءمينيستردىڭ ايتۋىنشا, 346 نىسان ەسكى عيماراتتاردىڭ ورنىنا تۇرعىزىلعان, ال 194 جاڭا نىسان بۇعان دەيىن مەديتسينالىق ينفراقۇرىلىم بولماعان ەلدى مەكەندەردە سالىنعان. جوبا اياسىندا 260 مەديتسينالىق پۋنكت, 235 فەلدشەرلىك-اكۋشەرلىك پۋنكت جانە 160 دارىگەرلىك امبۋلاتوريا بوي كوتەرەدى. بارلىق نىسان بىرىڭعاي ستاندارتپەن جابدىقتالىپ, تەلەمەديتسينا, فيزيوتەراپيا كابينەتتەرى, ءدارىحانا بولىمشەلەرى مەن ەمدىك دەنە شىنىقتىرۋ زالدارىن قامتيدى. قاجەتتى قۇرال-جابدىقتاردىڭ 70%-دان استامى وتاندىق وندىرىستەن قامتاماسىز ەتىلەدى.
سونىمەن قاتار 32 ورتالىق اۋداندىق اۋرۋحانا, 12 كوپبەيىندى جانە 20 اۋداندىق اۋرۋحانا جاڭعىرتىلادى. قازىرگى تاڭدا 10 نىساندا قۇرىلىس-مونتاجداۋ جۇمىستارى تولىق اياقتالعان, ال قالعاندارى 2026 جىلعا دەيىن سالىنادى.
ايتا كەتەيىك, جاڭارتىلعان اۋرۋحانالاردىڭ بازاسىندا ينسۋلت جانە كارديولوگيا ورتالىقتارى, حيرۋرگيا, تراۆماتولوگيا, وڭالتۋ جانە قارقىندى تەراپيا بولىمشەلەرى اشىلادى. تەمىرتاۋ, بالقاش, جاڭاارقا, ءۇرجار, شۋ, مەركە, تالاس جانە بەينەۋدە سەگىز اۋرۋحانا قايتا قۇرىلعان.
«ۇلتتىق جوبا مەديتسينالىق كادرلاردى دايارلاۋعا دا باسىمدىق بەرەدى. جاقىن جىلدارى اۋىلدارعا 1100-دەن استام مامان جولدانباق. قازىردىڭ وزىندە 1009 مەديتسينا قىزمەتكەرى (ونىڭ ىشىندە 459 دارىگەر جانە 550 ورتا بۋىن مامان) اۋىلدىق نىساندارعا جۇمىسقا ورنالاستى. «ديپلوممەن اۋىلعا!» باعدارلاماسى اياسىندا ماماندارعا الەۋمەتتىك قولداۋ كورسەتىلىپ, مارتەبەسىن ارتتىرۋ ءۇشىن قوسىمشا تولەمدەر ەنگىزىلدى», دەلىنگەن حابارلامادا.
2024 جىلدان باستاپ تاپشىلىعى جوعارى سالالار بويىنشا اۋىلعا بارعان دارىگەرلەرگە 100 ەتج كولەمىندە (8,5 ملن تەڭگە) بىرجولعى قارجىلاي تولەم بەرىلەدى. ال 2026 جىلدان باستاپ كادر جەتىسپەۋشىلىگى بار وڭىرلەردە دارىگەرلەردى تۇرعىن ۇيمەن قامتاماسىز ەتۋ تەتىگى ىسكە قوسىلادى. بۇل جوبانى وبلىس اكىمدىكتەرى ۇكىمەت تاپسىرماسىمەن وتباسى بانكى ارقىلى جۇزەگە اسىرادى.
تيمۋر مۇراتوۆتىڭ ايتۋىنشا, قابىلدانعان شارالار اۋىل تۇرعىندارىنىڭ مەديتسينالىق كومەككە قولجەتىمدىلىگىن ايتارلىقتاي ارتتىرىپ, دەنساۋلىق ساقتاۋ سالاسىنىڭ كادرلىق الەۋەتىن كۇشەيتەدى.
