سۋرەتشى قولتاڭباسىندا ادام مەن عالامنىڭ ماڭگىلىك بايلانىسى, رۋح پەن ماتەريا اراسىنداعى شەكارا, ۋاقىت پەن كەڭىستىكتىڭ توعىسۋى كورىنىس تابادى. بۇل تۋىندىلار تاريح تىلسىمىنان سىر تارتىپ, ءداستۇر مەن دىلگە نەگىزدەلگەن پىشىندەر ارقىلى ءورىلىپ وتىرادى. مۇنداعى ءاربىر شتريح – وي, ءاربىر بوياۋ – ءۇنسىز سىر. اۆتوردىڭ ءابىلحان قاستەەۆ اتىنداعى ونەر مۋزەيىندە وتكەن شىعارماشىلىق كورمەسىندەگى 60-تان اسا كەسكىندەمەلىك تۋىندى كورەرمەنىن وي قۇشاعىنا تارتاتىنى سوندىقتان.
شىنايى ءومىر تىنىسىنان سىر شەرتكەن كومپوزيتسيالىق يدەيالار ىشكى رۋحاني ىزدەنىسكە باعىتتايدى. ايتالىق, «ۇنسىزدىك», «قارا شاڭىراق», «جالعىزدىق بەلگىلەرى», «كۇتۋ», ء«تۇس», «اكەلەر جولى», ء«ومىردىڭ باستالۋى», ت.ب تۋىندىلارىنداعى پىشىندەر مەن تۇستەر فيلوسوفيالىق استارعا تولى. نازىك تالعام, ءار دەتالعا دەگەن ۇقىپتىلىق كارتينالاردىڭ مازمۇنىن بايىتىپ, ونەردى كورۋ عانا ەمەس, سەزىنۋ قاجەتتىگىن ۇقتىرادى.
«اسقار احامان شىعارمالارىندا قولدانىلعان پىشىندەر مەن تۇستەردىڭ ۇيلەسىمى, كەڭىستىكتەگى قوزعالىس پەن ۋاقىتتىڭ اعىسى ادامنىڭ ىشكى جان دۇنيەسىمەن ۇندەسە وتىرىپ, ونىڭ ومىرلىك جولىنداعى كۇردەلى سەزىمدەرى مەن كۇيزەلىستەرىن بەينەلەيدى. ءاربىر تۋىندىسىندا سۋرەتشى شىنايى بولمىستى كوركەمدىك تىلمەن شەبەر جەتكىزەدى. بۇل تۋىندىلار ماڭگىلىك ءومىر مەن ءولىم, جالعىزدىق پەن ءۇمىت, باستاۋ مەن اياقتالۋ اراسىنداعى شەكسىز بايلانىستاردى جاڭاشا پايىمداۋعا مۇمكىندىك بەرەدى», دەيدى ونەرتانۋشى گۇلنار جۇبانيازوۆا.
سۋرەتشى ماڭگىلىك ساۋالعا ءمان ىزدەيدى. شىعارمالارىندا بەينەلەنگەن ءاربىر كورىنىس – تىرشىلىكتىڭ تۇپكى وزەگىنە بويلاۋ, ادامزاتتىڭ رۋحاني بولمىسىنا ءۇڭىلۋ دەپ توپشىلادىق. ول ىزگىلىك پەن مەيىرىمنىڭ عالامعا ساۋلە شاشار شىنايى نۇر ەكەنىن ايتىپ, «تازالىق – تاندە عانا ەمەس, جان مەن پەيىلدە» دەگەن ۇندەۋ تاستايدى. سول ارقىلى كورەرمەنگە ارمان مەن اقيقاتتىڭ, ساعىنىش پەن ءۇمىتتىڭ, وتكىنشى مەن ماڭگىلىكتىڭ اراسىنداعى نازىك بايلانىستى سەزىندىرگىسى كەلەتىندەي.
الماتى
