فوتو: اشىق دەرەككوز
قوردىڭ ءباسپاسوز قىزمەتىنىڭ حابارلاۋىنشا, بۇل جىلى گرانتتار 72 جوعارى جانە ورتا بىلىمنەن كەيىنگى وقۋ ورنىندا قاراستىرىلعان. ونىڭ ىشىندە 70 وقۋ ورنىنان كونكۋرس كوميسسيالارىنىڭ حاتتامالارى مەن تالاپكەرلەردىڭ قۇجاتتارى ۇسىنىلسا, ەكى وقۋ ورنىندا باعدارلاما تالاپتارىنا ساي ۇمىتكەر تابىلماعان.
قورىتىندىسىندا 449 تالاپكەر گرانت يەگەرى اتانىپ, كەلەسى ساناتتار بويىنشا ءبىلىم الۋ مۇمكىندىگىنە يە بولدى:
- 2022 جىلعى قاڭتار وقيعاسىندا قازا تاپقانداردىڭ بالالارى – 1 ادام;
- جەتىمدەر مەن اتا-اناسىنىڭ قامقورلىعىنسىز قالعاندار – 135 ادام;
- مۇگەدەكتىگى بار جاستار – 86 ادام;
- الەۋمەتتىك جاعدايى تومەن اۋىلدىق جەرلەر مەن شاعىن قالالاردان شىققان تالاپكەرلەر – 65 ادام;
- مۇگەدەك بالانى تاربيەلەپ وتىرعان وتباسىلاردان شىققان جاستار – 162 ادام.
ايتا كەتەيىك, باعدارلاما ىسكە قوسىلعالى ءۇش جىلدىڭ ىشىندە 93 وقۋ ورنىنان 3 859 ستۋدەنت ءبىلىم گرانتىن يەلەنگەن. بيىلعى كورسەتكىشپەن بىرگە قوردىڭ قولداۋىمەن جوعارى ءبىلىم الۋ مۇمكىندىگىنە قول جەتكىزگەن جاستاردىڭ جالپى سانى 4 308 ادامعا جەتكەن.
