شىنى كەرەك, بيىل جەرلەستەرىمىزدىڭ ىرىكتەۋ تۋرنيرىنەن ەش ىركىلمەي وتەتىنىنە كۇمانىمىز جوق ەدى. بىراق ءبارى ءبىز ويلاعانداي بولمادى. دانيا, البانيادان وزعانىمىزبەن, ويدا-جوقتا ارمەنياعا جول بەردىك. سونىڭ سالدارىنان قاپ تاۋىنىڭ قىراندارى «ەۋرو-2026» دوداسىنا بىردەن جولداما الدى. ەندى ءبىزدىڭ جىگىتتەرگە تاعى ءبىر ىرىكتەۋ سىنىنان وتۋگە تۋرا كەلەدى.
15–24 قىركۇيەك ارالىعىندا ۇيىمداستىرىلاتىن پلەي-وفف سايىستارىندا ەلىمىزدىڭ فۋتزالشىلارى يتالياعا قارسى وينايدى. بىزدەن بولەك, وسى مەجەگە گرۋزيا, بەلگيا, بوسنيا مەن گەرتسەگوۆينا, رۋمىنيا, سلوۆاكيا, ماجارستان قۇرامالارى جەتتى. سول كۇندەرى ولار دا قۇرلىقتىڭ باستى دوداسىنىڭ جولداماسىن ساراپقا سالادى. ال ءوز توپتارىندا ءبىرىنشى ورىن العان ۋكراينا, بەلارۋس, پولشا, سلوۆەنيا, حورۆاتيا, ارمەنيا, پورتۋگاليا, يسپانيا, چەحيا, فرانتسيا العا قويعان جوسپارلارىن كۇنى بۇرىن ويداعىداي جۇزەگە اسىرىپ, قازىر «ەۋرو-2026» دوداسىنا ەش الاڭسىز دايارلانىپ جاتىر.
پلەي-وففتا ەلىمىزگە قارسىلاس اتانعان كوماندا جايىندا ءبىز نە بىلەمىز؟ يتاليا قۇراماسى الەم چەمپيوناتىنا جەتى رەت قاتىسىپ, ءۇش رەت ولجالى بولدى. 2004 جىلى اپەننين تۇبەگىنىڭ تۇلەكتەرى فينالدا عانا يسپاندىقتارعا ەسە جىبەردى (1:2). 2008, 2012 جىلدارداعى الەمدىك دودادا قولا مەدال يەلەندى. برازيلياداعى جارىستىڭ جارتىلاي فينالىندا يسپانياعا (2:3) جول بەرىپ, ءۇشىنشى ورىن ءۇشىن تارتىستا رەسەيدى (2:1) جەڭدى. تايلاندتاعى ءتۋرنيردىڭ شەشۋشى تۇسىندا تاعى سول پيرەنەي تۇبەگىنىڭ تارلاندارىنان (1:4) ۇتىلىپ, كولۋمبيانى (3:0) قاپى قالدىردى.
ءبىزدىڭ جىگىتتەر دە قارا جاياۋ ەمەس. جەرلەستەرىمىز ءاۋ باستا ازيا چەمپيوناتىندا ەكى رەت, كەيىننەن ەۋروپا بىرىنشىلىگىندە ءبىر مارتە جۇلدەگەرلەر قاتارىنان كورىندى. 2021 جىلعى الەمدىك دودادا ءتورتىنشى ورىنعا تابان تىرەدى. وسى ورايدا, يتاليالىقتاردىڭ 2018, 2022 جىلدارداعى «ەۋرونىڭ» توپتىق تۋرنيرلەرىندە سۇرىنگەنىن دە ەستەن شىعارمايىق. ەلىمىز قۇراماسى سول جارىستاردىڭ ەكەۋىندە دە پلەي-وففتا باق سىنادى. سلوۆەنيادا وتانداستارىمىز ءتورتىنشى ورىن السا, نيدەرلاندتا شيرەك فينالعا دەيىن جەتتى. سونىمەن قاتار يتاليالىقتاردىڭ كەيىنگى ەكى الەم چەمپيوناتىنان سىرت قالعانىن دا ايتا كەتكەن ءجون. ەلىمىز سونىڭ ەكەۋىنە دە قاتىستى. 2021 جىلى ليتۆادا ءتورتىنشى ساتىعا جايعاسساق, 2024 جىلى تاشكەنتتە ۇزدىك سەگىز كوماندانىڭ قاتارىنا قوسىلدىق. مىنە, وسى جاعدايدىڭ بارلىعىن قاپەرگە الا وتىرىپ, فۋتزالشىلارىمىزدىڭ يتاليالىقتاردى جارتى جولعا قالدىرىپ, قارت قۇرلىقتىڭ باستى دوپ دوداسىنىڭ جولداماسىن يەلەنۋگە كۇش-جىگەرى جەتەدى دەپ توپشىلاۋعا بولادى.
