«Almaty Museum of Arts»-تىڭ ميسسياسى – زاماناۋي ونەر ۇدەرىستەرىن قولداۋ جانە زەرتتەۋ, ولاردىڭ الەمدىك مادەنيەتتەگى ماڭىزىن اشۋ. مۋزەي قورىنا قازاقستاننان جانە باسقا دا ەلدەردەن جينالعان 700 ونەر تۋىندىسى ەندى. مۋزەيدىڭ كوركەمدىك ستراتەگياسى مەن باعدارلامالىق مازمۇنىن كوركەمدىك جەتەكشى مەرۋەرت قاليەۆا ازىرلەدى. مۋزەيدە ەكى جوبا اشىلدى. ونىڭ ءبىرى – «قوناقتار» اتتى مۋزەيدىڭ ءوز كوللەكتسياسى قويىلعان كورمە جانە وتاندىق سۋرەتشى الماگۇل مەڭلىباەۆانىڭ «مەن ءبارىن تۇسىنەمىن» اتتى رەتروسپەكتيۆالىق ەكسپوزيتسياسى.
ءىس-شارا بارىسىندا ايدا بالاەۆا بۇل مۋزەي ونەردى, زاماناۋي تەحنولوگيالاردى, مۋلتيمەديالىق شەشىمدەر مەن كرەاتيۆتى يندۋستريا قۇرالدارىن بىرىكتىرەتىن جاڭا مادەني باستاما ەكەنىن اتاپ ءوتتى. مينيستر پرەزيدەنت جولداۋىنداعى تۇجىرىمداردى ەسكە سالىپ, جاس ۇرپاق ءۇشىن ءپاتريوتيزمنىڭ باستى كورسەتكىشى جاسامپازدىق پەن جاڭاشىلدىقتا ەكەنىن جەتكىزدى. ول ۇلگى رەتىندە كاسىپكەر ءارى مەتسەنات نۇرلان سماعۇلوۆتىڭ ايرىقشا قىزمەتىن اتاپ ءوتتى.
«بۇل مۋزەي تەك ونەردى تاماشالاۋ الاڭى ەمەس, شىعارماشىلىق ويدىڭ, جاڭا يدەيالار مەن حالىقارالىق ديالوگتىڭ ورتالىعىنا اينالاتىنىنا سەنەمىن. مۋزەي الماتىنىڭ مادەني ءومىرىن بايىتىپ, ورتالىق ازيا ونەرىن حالىقارالىق دەڭگەيدە دامىتۋعا زور ۇلەس قوسادى», دەدى ا. بالاەۆا.
جالپى اۋماعى 10 مىڭ شارشى مەتردەن اساتىن مۋزەي عيماراتىن بريتاندىق «Chapman Taylor» ساۋلەت بيۋروسى جوبالاعان. ءبىرىنشى قاباتتا كەڭ كورمە زالدارى ورنالاسقان, سونىڭ ىشىندە « ۇلى دالا» جانە «سارىارقا» زالدارى بار. ورتالىق كەڭىستىك «Art Street» اتريۋمىنا بەرىلگەن, ول شارىن شاتقالىنىڭ تابيعي پىشىندەرىن بەينەلەيدى. سونداي-اق مۇندا كاسىبي قور ساقتاۋ ورنى, رەستاۆراتسيالىق ورتالىق جانە «شەبەرحانا» اتتى كرەاتيۆتى كەڭىستىك ورنالاسقان.
مۋزەي كوللەكتسياسىنىڭ 70%-دان استامى حح عاسىردىڭ كورنەكتى وتاندىق سۋرەتشىلەردىڭ ەڭبەگىنەن تۇرادى. اتاپ ايتساق, جاڭاتاي شاردەنوۆ, توقبولات توعىزباەۆ, ماقىم قيسامەدينوۆ, شايماردان ساريەۆ شىعارمالارى قويىلعان. سونداي-اق وتاندىق زاماناۋي ونەردىڭ نەگىزگى تۇلعالارى اتانعان رۇستەم حالفين, ساۋلە سۇلەيمەنوۆا, سايد اتابەكوۆ جۇمىستارى دا بار. بولاشاقتا مۋزەي ءوز كوللەكتسياسىن تولىقتىرىپ, ماقساتىن جالعاستىرا بەرمەك. مۇراجاي قازاقستان مەن ورتالىق ازيا ايماعىنداعى ونەردى ۇسىنۋ جانە زەرتتەۋ جانە حالىقارالىق دەڭگەيدە تانىتۋدى ماقسات ەتەدى.
مۋزەي 12 قىركۇيەكتەن باستاپ ءوز قىزمەتىنە باستايدى.
