دامۋدىڭ 5 باعىتى
ۇكىمەت باسشىسىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين جولداۋدا العا قويىلعان مىندەتتەر شەڭبەرىندە جۇمىس بىرنەشە باعىت بويىنشا جالعاساتىنىن ايتتى. ولار – جاڭا ينۆەستيتسيالىق تسيكل, «Alatau City»-دى دامىتۋ, ينفلياتسيامەن كۇرەس, يمپورتقا تاۋەلدىلىكتى ازايتۋ, ەكونوميكانى ىرىقتاندىرۋ جانە كاسىپكەرلىكتى دامىتۋ.
«مەملەكەتتىڭ ينۆەستيتسيالىق بەلسەندىلىكتى ىنتالاندىرۋى ەكونوميكالىق ءوسۋدى جەدەلدەتىپ, 2029 جىلعا قاراي ىشكى جالپى ءونىمدى ەكى ەسەلەۋ ماقساتىنا جۇمىس ىستەيدى. ۇكىمەت جاھاندىق باسەكەگە قابىلەتتىلىگى جوعارى ەكسپورتتىق وندىرىستەر قۇرۋعا بولاتىن اۆتوموبيل, تەمىرجول ماشينالارىن جاساۋ, حيميا ونەركاسىبى جانە مۇناي-حيميا, سيرەك كەزدەسەتىن مەتالداردى قوسا العاندا مينەرالدىق-شيكىزات بازاسىن تولىقتىرۋ, سونداي-اق اگروونەركاسىپتىك كەشەن ونىمدەرىن قايتا وڭدەۋ سياقتى پەرسپەكتيۆالى باعىتتاردى ايقىندادى», دەدى س.جۇمانعارين.
ينفوگرافيكانى جاساعان – امانگەلدى قياس, «ەQ»
ينۆەستيتسيا تارتۋ جۇيەسىن جاڭارتۋعا قادام
پرەزيدەنت مەجەلەگەن مىندەتتەردى ورىنداۋ ءۇشىن ەلگە تارتىلاتىن ينۆەستيتسيالار اعىنىن ارتتىرۋ كەرەك. مەملەكەت باسشىسى جاڭا ينۆەستيتسيالىق كەزەڭدى باستاۋ قاجەتتىگىن ايتىپ, ۇكىمەتكە 10 كۇن ۋاقىت بەردى. سوندىقتان قىسقا مەرزىمدە ينۆەستورلارمەن بىرىڭعاي ءوزارا ءىس-قيمىل تەتىگىن قۇرىپ, ينۆەستيتسيا تارتۋ جۇيەسىن تۇبەگەيلى جاڭارتۋعا قادام جاساۋ قاجەت. ينۆەستيتسيالار اياسىندا تارتىلعان ءاربىر تەڭگەگە نورماتيۆتىك اكتىلەرمەن جانە وڭتايلى تاجىريبەمەن بەكىتىلگەن مىقتى كەپىلدىكتەر ۇسىنىلۋى شارت. ەكونوميكانىڭ جوعارى تەحنولوگيالىق سالالارىنا ينۆەستيتسيا تارتۋ ءۇشىن ارنايى ءىس-شارالار, ونىڭ ىشىندە پرەفەرەنتسيالار كوزدەلەدى. بۇل رەتتە ۇكىمەت باسشىسى باستى ءىس-ارەكەتتەر تىزبەگىن ۇسىندى.
پرەزيدەنت مەملەكەتتىك سەكتوردى رەفورمالاۋ باعىتىندا ناقتى ۇسىنىستار دايىنداۋدى تاپسىردى. ۇلتتىق ەكونوميكا مينيسترلىگى مەملەكەتتىڭ ەكونوميكاداعى ۇلەسىنىڭ ناقتى شەگىن جانە باسقارۋعا قويىلاتىن قۇقىقتىق تالاپتاردى زاڭنامالىق تۇرعىدان بەكىتۋگە ءتيىس. بيۋدجەتتىك باعدارلامالار اكىمشىلەرى قاراجاتتى ۋاقتىلى يگەرۋدى قامتاماسىز ەتۋى قاجەت. قارجىلىق ءتارتىپتى كۇشەيتىپ, بەكىتىلگەن بيۋدجەت پارامەترلەرىن قاتاڭ ساقتاۋ مەن ءاربىر تەڭگەنى بارىنشا ءتيىمدى پايدالانۋعا كۇش سالۋ ماڭىزدى.
مەملەكەت باسشىسىنىڭ تاپسىرماسىن ىسكە اسىرۋ اياسىندا جاساندى ينتەللەكتىنى قولدانا وتىرىپ, سالىق تولەۋشىنى سەرۆيستىك سۇيەمەلدەۋ تەتىگىن ەنگىزۋ جوسپارلانۋدا. قارجى مينيسترلىگى تسيفرلاندىرۋ مينيسترلىگىمەن بىرگە مەملەكەتتىك كىرىستەر كوميتەتىنىڭ دەرەكتەردى وڭدەۋ ورتالىعىن قۇرۋدى قامتاماسىز ەتەدى. تسيفرلاندىرۋ مينيسترلىگى سالىق جانە كەدەندىك اكىمشىلەندىرۋ قىزمەتتەرىن كورسەتۋ ءۇشىن اتالعان ورتالىقتى جاساندى ينتەللەكتىگە قاتىستى قاجەتتى رەسۋرستارمەن قامتيدى.
پرەزيدەنت شەكاراداعى وتكىزۋ پۋنكتتەرىنىڭ ينفراقۇرىلىمىن دامىتۋعا ەرەكشە نازار اۋداردى. ولار كولىك-لوگيستيكالىق كەشەندى دامىتۋدىڭ ماڭىزدى ەلەمەنتى بولىپ سانالادى. قابىلدانعان شارالاردىڭ ناتيجەسىندە ەۋرازيالىق ەكونوميكالىق وداقتىڭ سىرتقى شەكاراسىنداعى وتكىزۋ پۋنكتتەرىندە ءوتۋ ۋاقىتى 2 ساعاتتان 30 مينۋتقا دەيىن قىسقاردى. ۇكىمەت شەكارادان ءوتۋ راسىمدەرىنىڭ بارلىعىن جەتىلدىرۋ بويىنشا جۇيەلى جۇمىستى جالعاستىرادى. وتكىزۋ پۋكتتەرىندە جىلدامدىق پەن جايلىلىق ستاندارتقا اينالۋعا ءتيىس. قارجى مينيسترلىگىنە كولىك مينيسترلىگىمەن, اكىمدىكتەرمەن جانە شەكارا قىزمەتىمەن بىرگە جىل سوڭىنا دەيىن ەۋرازيالىق ەكونوميكالىق وداقتىڭ سىرتقى شەكاراسىنداعى 8 وتكىزۋ پۋنكتىن جاڭعىرتۋدى اياقتاۋدى تاپسىرعان پرەمەر-مينيستر, كەدەن بەكەتتەرى اينالاسىنداعى ينفراقۇرىلىمدى – قويمالار مەن سەرۆيستىك نىسانداردى دامىتۋ قاجەت ەكەنىن ەسكە سالدى.
«پرەزيدەنت الاتاۋ قالاسى مەن ونىڭ ەرەكشە مارتەبەسىنە ايرىقشا نازار اۋداردى. ۇلتتىق ەكونوميكا مينيسترلىگى ۇكىمەتكە تىكەلەي باعىناتىنداي ەتىپ, «الاتاۋ قالاسى تۋرالى» پرەزيدەنت جارلىعىنىڭ جوباسىن 5 كۇن مەرزىمدە پىسىقتاپ, ۇكىمەت اپپاراتىنا ەنگىزسىن. سونداي-اق الاتاۋ قالاسىنىڭ قۇقىقتىق رەجىمىنە جانە ونى باسقارۋعا قاتىستى زاڭنامالىق اكتىلەردىڭ جوبالارىن ءۇش اي مەرزىمدە ازىرلەسىن. تسيفرلىق دامۋ مينيسترلىگى ءبىر اي مەرزىمدە ۇزدىك حالىقارالىق تاجىريبەنى ەسكەرە وتىرىپ, «اقىلدى قالالار» تۇجىرىمداماسىن كەڭىنەن تاراتۋ بويىنشا ءىس-شارالاردى ازىرلەسىن», دەدى ۇكىمەت باسشىسى.
ۇلتتىق ەكونوميكا مينيسترلىگى جىل سوڭىنا دەيىن وڭىرلەر ەكونوميكاسىنىڭ ءوسۋىن قامتاماسىز ەتۋ ءۇشىن الەۋمەتتىك-كاسىپكەرلىك كورپوراتسيالاردىڭ فۋنكتسياسى مەن وكىلەتتىكتەرىن كەڭەيتىپ, ولاردى دامۋ ينستيتۋتتارىنا اينالدىرۋدى كوزدەيتىن زاڭنامالىق تۇزەتۋلەر جوباسىن ۇكىمەت اپپاراتىنا ەنگىزەدى.
«Digital Qazaqstan» تۇجىرىمدامالىق قۇجاتى دايىندالادى
«ناقتى سەكتورعا قاتىستى مەملەكەت باسشىسى جولداۋدا بارلىق سالادا جاساندى ينتەللەكتى مەن تسيفرلاندىرۋدى ەنگىزۋگە باسىمدىق بەردى. جەدەل شارالار قابىلداۋ ءۇشىن تسيفرلىق شتاب قۇرىلدى, ونىڭ اياسىندا قازىر بىرقاتار شەشىم قابىلدانىپ جاتىر. ونى الدىمىزدا تۇرعان جۇيەلى ماسەلەلەردى شەشۋ ءۇشىن ودان ءارى پايدالانامىز. تسيفرلىق شتاب قابىلداعان بارلىق شەشىم مۇلتىكسىز ورىندالۋعا ءتيىس ەكەنىن تاعى دا اتاپ وتكىم كەلەدى. تسيفرلىق دامۋ مينيسترلىگى پارلامەنتتە تسيفرلىق كودەكستىڭ جانە «جاساندى ينتەللەكت تۋرالى» زاڭ جوبالارىنىڭ پىسىقتالۋىن جەدەلدەتسىن. بۇدان بولەك, تسيفرلاندىرۋدى جانە جاساندى ينتەللەكتىنى دامىتۋ جونىندەگى «Digital Qazaqstan» تۇجىرىمدامالىق قۇجاتىن ازىرلەۋگە كىرىسۋ كەرەك», دەيدى و.بەكتەنوۆ.
ونىڭ ايتۋىنشا, اتالعان قۇجات سالانىڭ الداعى ءۇش جىلعا ارنالعان نەگىزگى باعىتتارىن قامتىپ, جاۋاپكەرشىلىكتىڭ اراجىگىن ناقتى ءبولىپ بەرۋى قاجەت. بۇعان قوسا, قۇجاتتا ءتيىستى ناتيجەلەر دە كورىنىس تابۋى كەرەك. سونداي-اق تسيفرلاندىرۋ مينيسترلىگى قايتا ۇيىمداستىرۋ مەن جاساندى ينتەللەكت جانە تسيفرلىق دامۋ مينيسترلىگىن قۇرۋ تۋرالى پرەزيدەنت جارلىعىنىڭ جوباسىن ەنگىزۋگە ءتيىس. اتاپ وتەتىن جايت, جاپپاي تسيفرلاندىرۋ جاڭا سالالىق ۆەدومستۆوعا عانا قاتىستى ەمەس. بارلىق سالالىق مەملەكەتتىك ورگاندار مەن وڭىرلەردىڭ باسشىلارىنا دا جاۋاپكەرشىلىك جۇكتەلمەك.
پرەزيدەنت وڭدەۋ ونەركاسىبىنە تىڭ سەرپىن بەرىپ, وسى باعىتتا جۇيەسىز جۇرگىزىلىپ جاتقان قولداۋ شارالارىن رەتكە كەلتىرۋدى تاپسىردى. وسى ورايدا ونەركاسىپ مينيسترلىگىنە ۇلتتىق ەكونوميكا مينيسترلىگىمەن, «بايتەرەك» حولدينگىمەن بىرلەسىپ, ءبىر اي مەرزىمدە بىتىراڭقى جانە قايتالاناتىن تاسىلدەردى الىپ تاستاپ, وڭدەۋ ونەركاسىبىن قولداۋ شارالارىنىڭ بىرىڭعاي جۇيەلەنگەن ءىس-شارالار پاكەتىن ازىرلەۋ تاپسىرىلدى. ارنايى ەكونوميكالىق ايماقتارعا كوپ ءۇمىت ارتىلعانىنا قاراماستان, اتالعان قۇرالداردىڭ ءوڭىر ونەركاسىبىن دامىتۋعا قوسقان ۇلەستەرى قويىلعان مىندەتتەرگە سايكەس كەلمەيدى.
«اكىمشىلەندىرۋ مەن ينۆەستورلار تارتۋدىڭ جاڭا تاسىلدەرى ەسەبىنەن ارنايى ەكونوميكالىق ايماقتاردىڭ تيىمدىلىگىن ارتتىرۋ قاجەت. ونەركاسىپ جانە قۇرىلىس مينيسترلىگى ەكى اي مەرزىم ىشىندە ارنايى ەكونوميكالىق ايماقتاردى باسقارۋدى جەكە, سونىڭ قاتارىندا شەتەلدىك كومپانيالارعا بەرۋ مۇمكىندىگىن قاراستىرا وتىرىپ, ولاردى باسقارۋ تاسىلدەرىن وزگەرتۋ بويىنشا ۇسىنىستار دايىنداسىن», دەدى پرەمەر-مينيستر.
جاڭا تۇرعىن ءۇي قۇرىلىسىنىڭ قارقىنىن ارتتىرىپ قانا قويماي, ولاردىڭ ساپاسىنا دا باسا ءمان بەرۋ – ماڭىزدى مىندەت. وسى رەتتە جاساندى ينتەللەكتىنى قولدانا وتىرىپ, عيماراتتاردى اقپاراتتىق مودەلدەۋ قۇرالىن قولدانعان ءجون بولماق. ونەركاسىپ جانە قۇرىلىس مينيسترلىگىنە جىل سوڭىنا دەيىن قۇرىلىس بويىنشا بىرىڭعاي اقپاراتتىق جۇيەنى ىسكە قوسۋ جۇكتەلدى. سونداي-اق مينيسترلىك قۇرىلىس كودەكسىنىڭ جوباسىنا قاتىستى بارلىق ماسەلەنى دەپۋتاتتىق كورپۋسپەن جەدەل پىسىقتاۋعا ءتيىس.
«مەملەكەت باسشىسى كومىرسۋتەگى شيكىزاتىن تەرەڭ وڭدەيتىن بىرقاتار وزىق جوبانى جۇزەگە اسىرۋ, سونىڭ ىشىندە اتىراۋدا گاز-حيميا كەشەنىن, پاۆلوداردا سۇيىتىلعان تابيعي گاز وڭدەيتىن كاسىپورىندى ىسكە قوسۋ قاجەتتىگىن اتاپ ءوتتى. بارلىق جوبانى بەلگىلەنگەن مەرزىمدە ۋاقتىلى ىسكە قوسۋ ءۇشىن شارالار قابىلداۋ قاجەت. ەنەرگەتيكا مينيسترلىگى «سامۇرىق-قازىنا» قورىمەن بىرلەسىپ, ەكى اي ىشىندە جاڭا ينۆەستيتسيالىق جوبالار ءۇشىن گازدى ۇزاقمەرزىمدى كەپىلدى تۇردە جەتكىزۋدى قامتاماسىز ەتۋ تەتىگىن ازىرلەيدى. بۇگىندە ەلىمىز ەنەرگەتيكا جانە تۇرعىن ءۇي-كوممۋنالدىق شارۋاشىلىق ينفراقۇرىلىمىن باسقارۋدىڭ جاڭا مودەلىن قۇرىپ جاتىر. ول تاريفتەر وسكەن سايىن كورسەتىلەتىن قىزمەتتەردىڭ سەنىمدىلىگى مەن ساپاسىن كوتەرەدى. بۇل, ارينە, سالانىڭ ينۆەستيتسيالىق تارتىمدىلىعىن ارتتىرۋعا ىقپال ەتەدى», دەدى پرەمەر-مينيستر.
الەۋمەتتىك كودەكسكە اۋديت تەتىكتەرى ەنەدى
الەۋمەتتىك بلوك بويىنشا, ەڭبەك مينيسترلىگى مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ, وسى جىلدىڭ 1 جەلتوقسانىنا دەيىن الەۋمەتتىك قولداۋ شارالارىنىڭ بارلىق وڭىرگە ارنالعان بىرىڭعاي ستاندارتىن ازىرلەيدى.
ء«بىز الەۋمەتتىك ادىلدىكتى ساقتاپ, ماسىلدىق پيعىلدى ازايتۋ ءۇشىن شارالار قابىلدايمىز. ۇكىمەتتىڭ مىندەتى – بارلىعىنا بىردەي جاعداي جاساۋ, ال ازاماتتار جۇمىس ىستەپ, ءوزىن جانە وتباسىن اسىراۋعا ۇمتىلۋى كەرەك. تسيفرلاندىرۋ مينيسترلىگىمەن بىرلەسىپ, وسى جىلدىڭ 1 قاراشاسىنا دەيىن ەڭبەك مينيسترلىگى جانىنداعى الەۋمەتتىك سالانىڭ بىرىڭعاي تسيفرلىق پلاتفورماسىن ەنگىزۋ قاجەت. سونداي-اق مەملەكەتتىك ورگاندار الەۋمەتتىك كودەكسكە الەۋمەتتىك اۋديت تەتىكتەرىن ەنگىزۋدى كوزدەيتىن وزگەرىستەر مەن تولىقتىرۋلار ەنگىزۋ جونىندەگى زاڭ جوباسىنىڭ جەدەل كەلىسىلۋىن قامتاماسىز ەتسىن», دەپ تاپسىرما بەردى پرەمەر-مينيستر.
ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ, ءبىر اپتا ىشىندە مەملەكەت باسشىسىنىڭ جولداۋىن ىسكە اسىرۋ جونىندەگى جالپىۇلتتىق جوسپار جوباسىن ازىرلەپ, ونى كەلەسى وتىرىسقا شىعارۋعا مىندەتتەلدى.
«جالپىۇلتتىق جوسپاردىڭ ءاربىر تارماعىنىڭ ۋاقتىلى ورىندالۋىنا مونيتورينگ جۇرگىزۋ ءۇشىن ينتەللەكتۋالدىق تسيفرلىق قۇرالدار مەن تەتىكتەردى قولدانۋ قاجەت. ۇكىمەت قابىلدايتىن بارلىق شارا مەن قادامدار ازاماتتارىمىزدىڭ تۇرمىس دەڭگەيى مەن ءال-اۋقاتىن ارتتىرۋعا باعىتتالۋعا ءتيىس», دەدى و.بەكتەنوۆ.
