ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, وتسك مەملەكەتتىك ورگانداردىڭ قولدانىستاعى بارلىق اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى. بۇگىندە ەلىمىزدىڭ 20,2 ملن ازاماتى (6,2 ملن-نان استام وتباسى) تۋرالى اقپارات جيناقتالعان.
وتسك ەنگىزۋدىڭ باستى ماقساتى – ەل ازاماتتارىنىڭ مەملەكەتتىك قولداۋ جۇيەسىنە تەڭ قولجەتىمدىلىگىن قامتاماسىز ەتۋ. الەۋمەتتىك كودەكستە وتسك الەۋمەتتىك ساياساتتىڭ ورتا جانە ۇزاقمەرزىمدى مىندەتتەرى مەن باعىتتارىن ايقىنداۋ قۇرالى رەتىندە بەلگىلەنگەن. سونداي-اق وتسك ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ دا ءبىر ءتۇرى.
قازىردە وتسك مەملەكەتتىك قولداۋ شارالارىن الۋعا قۇقىعى بار جاندارعا قانداي دا ءبىر ءوتىنىشسىز جاردەماقىلار مەن الەۋمەتتىك تولەمدەردىڭ 11 ءتۇرىن رەسىمدەۋگە مۇمكىندىك بەرەدى. ولار: ەڭبەك ەتۋ قابىلەتىنەن ايرىلعان جاعدايدا الەۋمەتتىك تولەم; جۇمىسىنان ايرىلعان جاعدايدا الەۋمەتتىك تولەم; اسىراۋشىسىنان ايىرىلۋ بويىنشا الەۋمەتتىك تولەم; بالانىڭ تۋىنا, بالا ءبىر جارىم جاسقا تولعانعا دەيىن ونىڭ كۇتىمىنە بايلانىستى جاردەماقىلار; مۇگەدەكتىگى بار بالانى تاربيەلەپ وتىرعان اتا-اناسىنا (قامقورشىسىنا) جاردەماقى; مۇگەدەكتىگى بويىنشا جاردەماقى; كوپبالالى وتباسىلارعا بەرىلەتىن جاردەماقى; «التىن القا», «كۇمىس القامەن» ماراپاتتالعان كوپبالالى انالارعا بەرىلەتىن جاردەماقى; اتاۋلى الەۋمەتتىك كومەك; سونداي-اق جەرلەۋگە ارنالعان بىرجولعى تولەم.
مەملەكەتتىك قولداۋ شارالارىن الۋعا قۇقىق بەلگىلەنگەن كەزدە وتسك الۋشىعا 1414 بىرىڭعاي بايلانىس ورتالىعىنان SMS-حابارلاما جىبەرىلەدى. حابارلاما العان ازامات وعان كەلىسىمى تۋرالى جاۋاپ بەرۋى كەرەك. ءوتىنىشتى راسىمدەۋ, الەۋمەتتىك جاردەماقى نەمەسە تولەم تاعايىنداۋ اۆتوماتتى رەجىمدە ىسكە اسادى. سودان كەيىن اقشا قاراجاتى الۋشىنىڭ بانك شوتىنا اۋدارىلادى.
