الەكساندر شەۆچەنكو العاشقى ويىنىندا-اق اتر رەيتينگىندە 18-ورىندا تۇرعان يسپانيا ساڭلاعى الەحاندرو داۆيدوۆيچ-فوكينادان ويسىراي ۇتىلدى (1:6, 1:6, 2:6). تاجىريبەلى يۋليا پۋتينتسەۆا دا الىسقا شابا المادى. العاشىندا يتاليالىق ەليزابەتت كوچچارەتتونى (6:4, 7:6) قاپى قالدىرعان جەرلەسىمىز ەكىنشى تۋردا WTA تىزىمىندە 29-ساتىعا ورنالاسقان رەسەيلىك اننا كالينسكاياعا (1:6, 5:7) جول بەردى.
ەلىمىزدىڭ ەڭ مىقتى تەننيسشىسى ەلەنا رىباكينا ءتورتىنشى اينالىمنان اسا المادى. العاشقى كەزەڭدەردە امەريكالىق دجۋلەتا پارەدجا (6:3, 6:0) مەن چەحيالىق تەرەزا ۆالەنتوۆانى (6:3, 7:6) ەركىن ەڭسەردى. ءۇشىنشى تۋردا وسىدان ءتورت جىل بۇرىن, نەبارى 18 جاسىندا «US Open» تۋرنيرىندە توپ جارعان ۇلىبريتانيا وكىلى ەمما رادۋكانۋدى ءتىپتى ويسىراتا ۇتتى (6:1, 6:2). ءتورتىنشى اينالىمدا ماركەتا ۆوندروۋشوۆامەن كۇش سىناستى. 26 جاستاعى چەحيانىڭ مىقتىسى 2019 جىلى رولان گارروستىڭ فينالىندا ويناعان, 2023 جىلى ۋيمبلدوننىڭ جەڭىمپازى اتانعان. وكىنىشكە قاراي, بۇل كەزدەسۋدە ەلەنا ءوز دەڭگەيىندە ونەر كورسەتە المادى (4:6. 6:5, 2:6).
ءتۋرنيردى الەكساندر بۋبليك قارقىندى باستادى. تۇساۋكەسەر كەزدەسۋىندە «US Open» ءتۋرنيرىنىڭ جەڭىمپازى, ۋيمبلدون مەن اقش-تىڭ اشىق بىرىنشىلىگىنىڭ ءفيناليسى, حورۆاتيالىق مارين چيليچكە (6:4, 6:1, 6:4) شاڭ قاپتىردى. ودان كەيىن اۋستراليالىق تريستان سكۋلكەيتپ (6:3, 6:3, 6:3) پەن امەريكالىق توممي پولدى (6:7, 7:6, 3:6, 7:6, 1:6) جولىنان ىعىستىردى. العاشقى ەكى قارسىلاسىن وتانداسىمىز وڭاي ۇتسا, سوڭعى ويىن 3 ساعات 37 مينۋتقا سوزىلدى. ءتورتىنشى كەزەڭدە الەكساندردىڭ جولى الەمنىڭ ءبىرىنشى راكەتكاسى ياننيك سيننەرمەن قيىستى. 24 جاستاعى يتاليانىڭ ءدۇلد ۇلى اۋستراليانىڭ اشىق بىرىنشىلىگىندە ەكى مارتە باس جۇلدەنى ولجالاپ, ۋيمبلدون مەن «US Open» تۋرنيرلەرىندە توپ جارعانىن جانكۇيەرلەر جاقسى بىلەدى. بۇل جولى دا اپەننين تۇبەگىنىڭ تارلانى ءوزىنىڭ مىقتىلىعىن مويىنداتتى. بۋبليك وعان جارىتىپ قارسىلىق كورسەتە المادى (1:6, 1:6, 1:6).
ايەلدەر اراسىنداعى فينالدىق سايىستا بەلارۋستىك ارينا سوبولەنكو مەن امەريكالىق اماندا انيسيموۆا شەبەرلىك بايقاستى. جارتىلاي فينالدا امەريكالىق دجەسسيكا پەگۋلانى (4:6, 6:3, 6:4) ۇتسا, اقش تەننيسشىسى جاپونيالىق ناومي وساكادان (6:7, 7:6, 6:3) ايلاسىن اسىردى. شەشۋشى سىندا سوبولەنكو انيسيموۆادان باسىم ءتۇستى – 6:3, 7:6.
ەرلەر اراسىنداعى جارتىلاي فينالدا يتاليالىق ياننيك سيننەر كانادالىق فەليكس وجە-ءالياسسيمدى (6:1, 3:6, 6:3, 6:4), يسپانيالىق كارلوس الكاراس سەربيالىق نوۆاك دجوكوۆيچتى (6:4, 7:6, 6:2) جەڭدى. ءسويتىپ, وسىنىڭ الدىنداعى «ۇلكەن دۋلىعا» تۋرنيرلەرى – رولان گارروس, ۋيمبلدونداعى جاعداي قايتالانىپ, الەمنىڭ ەڭ ۇزدىك تەننيسشىلەرى اقش-تىڭ اشىق بىرىنشىلىگىنىڭ باس جۇلدەسىن دە ءوزارا ساراپقا سالدى. پاريجدە الكاراس, لوندوندا سيننەر جەڭىسكە جەتكەن ەدى. نيۋ-يوركتە الكاراستىڭ اسىعى الشىسىنان ءتۇستى, ەسەپ: 6:2, 3:6, 6:1, 6:4. ناتيجەسىندە, پيرەنەي تۇبەگىنىڭ تۇلەگى باس جۇلدەنى ولجالاۋمەن قاتار اتر رەيتينگىندە كوش باستادى.
بيىلعى «US Open» ءتۋرنيرىنىڭ جۇلدە قورى 90 ميلليون اقش دوللارىن قۇرادى. ەرلەر مەن ايەلدەر اراسىنداعى جەكەلەگەن سايىستىڭ جەڭىمپازدارى 5 ميلليوننان السا, فينالدا ۇتىلعاندار سول سومانىڭ جارتىسىن يەلەندى.
