تاياۋدا عانا قۇرىلعان «Ali Akhmedov Promotions» كومپانياسى ۇيىمداستىرعان جارىستا ەسىمدەرى كوپشىلىككە بەيمالىم بىرقاتار بوكسشىعا ءوز شەبەرلىكتەرىن كورسەتۋگە مۇمكىندىك بەرىلدى. ولاردىڭ دەنى سەنىمدى اقتاپ, جەرگىلىكتى جانكۇيەرلەردى جارقىن جەڭىستەرىمەن قۋانتتى. اتاپ ايتساق, قانات سانگيل (8-0, 4 كو) ۇندىستاندىق حاردجوت سينگحتى (11-2-1, 11 كو), رولان وگاي (1-0) تايلاندتىق كومسان ۆونگسۋريندى (1-11, 1 كو) ءبىرىنشى راۋندتا-اق ۇرىپ جىقسا, باۋىرجان بەكمۇرزاەۆ (6-0-1, 5 كو) وزبەكستاندىق شاروبيددين دجۋراحونوۆتى (2-7-1, 2 كو) ەكىنشى راۋندتا ەسىنەن تاندىردى. فارۋح توقتاسىنوۆتىڭ (3-0, 2 كو) قارسىلاسى شاروبيددين دجۋراحونوۆ (2-7-1, 2 كو) جەكپە-جەكتى جالعاستىرۋدان باس تارتتى. ۆيكتور تەمىروۆ (9-0, 6 كو) ءۇندى ەلىنىڭ تاعى ءبىر وكىلى سانتوش ءباراليدى (2-2, 1 كو) ۇپاي سانىمەن ۇتتى. دوستانبەك مامۇتوۆ (1-0) پەن رافايل يۆانوۆ (0-1), نۇرجان سەرىكباەۆ (7-2, 7 كو) پەن ىنتىماق ءداۋىت (2-2, 1 كو) سىندى جەرلەستەرىمىزدىڭ ءوزارا ايقاسى العاشقىلاردىڭ پايداسىنا شەشىلدى.
سپورتتىق مانسابىن اۋەسقوي رينگتەن باستاعان بالاۋسا مۇزدىمان (8-0, 6 كو) قازىرگى كەزدە كاسىپقويلار اراسىندا تابىستى ونەر كورسەتىپ ءجۇر. بۇعان دەيىنگى كەزدەسۋلەرىنىڭ بارلىعىندا جەڭىسكە جەتكەن بالاۋسا بۇل جولى ۇندىستاندىق مامتا سينگحتى (7-2-1, 4 كو) ءتورتىنشى راۋندتا نوكاۋتقا جىبەردى.
كوپتەن بەرى كورىنبەي كەتكەن جانقوش تۇراروۆتى (28-0, 20 كو) جانكۇيەرلەر ساعىنىپ قالعان ەكەن. بالۋان شولاق اتىنداعى سپورت سارايىنا جينالعان كورەرمەندەر ساقا سپورتشىنى ەرەكشە قوشەمەتپەن قارسى الدى. جانقوشتىڭ جولى فيليپپيندىك ءالي كانەگامەن (12-2-1, 8 كو) قيىستى. قانداسىمىز قارسىلاسىن باسەكەنىڭ باسىنان اياعىنا دەيىن تومپەشتەدى. تىپتەن بىرنەشە مارتە نوكداۋنعا دا جىبەردى. جەكپە-جەك اياقتالعاننان سوڭ, تورەشىلەر ءبىراۋىزدان جانقوشتىڭ مىقتىلىعىن مويىندادى.
الىستاعى امەريكادا شىڭدالىپ, ۇزاق ۋاقىت بويى داڭقتى گەننادي گولوۆكينمەن بىرگە جاتتىققان ءالي احمەدوۆ (24-2, 17 كو) الماتىداعى جارىستا تانزانيادان كەلگەن دجوزەف مايگۆيسيانىڭ (14-4, 10 كو) تاس-تالقانىن شىعاراتىنىنا سەنىمدى ەدىك. بىراق ءبىز ويلاعانداي بولمادى. افريكالىق بوكسشى قايمىقپاي ايقاسىپ, اليگە اجەپتاۋىر قارسىلىق كورسەتتى. دەسەك تە مايگۆيسياعا قاراعاندا ءبىزدىڭ بوكسشىنىڭ سوققىلارى دالىرەك ءارى قاتتىراق ءتيدى. سول سەبەپتى دە تورەشىلەر ءا.احمەدوۆتى جەڭىمپاز دەپ تانىدى.
