جارىستىڭ جالپى جۇلدە قورى – 850 مىڭ اقش دوللارى. ەرلەر سايىسىندا وزعان ويىنشىعا 90 مىڭ دوللار تابىس ەتىلسە, ايەلدەر اراسىنداعى باسەكەدە باس جۇلدەنى ولجالاعانعا 40 مىڭ دوللار تابىس ەتىلەدى. ەڭ باستىسى, سامارقانداعى دودادا ءبىرىنشى, ەكىنشى ورىندى يەلەنگەن شاحماتشىلار 2026 جىلى وتەتىن «ۇمىتكەرلەر تۋرنيرىنە» قاتىسۋ مۇمكىندىگىنە يە بولادى.
قاتىسۋشىلار جايىندا ايتار بولساق, ايەلدەردىڭ جارىسىندا الەمنىڭ بىرنەشە دۇركىن چەمپيونى حوۋ يفان (2609 ۇپاي, قىتاي) مەن قازىرگى چەمپيوندىق ءتاجدىڭ يەگەرى تسزيۋي ۆەنتسزيۋننەن (2570, قىتاي) باستاپ, چجۋ تسزينەر (2548, قىتاي), الەكساندرا گورياچكينا (2528, FIDE), ديۆيا دەشمۋح (2478, ءۇندىستان), حامپي كونەرۋ (2535, ءۇندىستان), تان چجۋني (2531, قىتاي), اننا مۋزىچۋك (2535, ۋكراينا), كاتەرينا لاگنو (2505, FIDE), تاعى دا باسقا مىقتىلار ونەر كورسەتەدى.
ەرلەر باسەكەسىندە 116 سپورتشى باق سىنايدى. سولاردىڭ اراسىنان الەم چەمپيونى گۋكەش دوممارادجۋدى (2767, ءۇندىستان), ونىڭ وتانداستارى دۇنيەجۇزىلىك وليمپيادانىڭ جەڭىمپازدارى رامەشبابۋ پراگناناندحا (2785) مەن اردجۋن ەريگايسيدى (2771) بولە-جارا اتاپ وتۋگە بولادى.
تۋرنيردە ەلىمىزدىڭ نامىسىن ءبيبىسارا اساۋباەۆا (2509), مەرۋەرت كاماليدەنوۆا (2349), كسەنيا بالاباەۆا (2383), ەلناز قالياحمەت (2299) سىندى شاحماتشىلار قورعايدى. ەسىمدەرى اتالعان وسى ويىنشىلاردىڭ بىلتىر ماجارستاننىڭ استاناسى – بۋداپەشتە جالاۋى جەلبىرەگەن دۇنيەجۇزىلىك شاحماتشىلار وليمپياداسىندا كۇمىس مەدال يەلەنگەنىن جانكۇيەرلەر جاقسى بىلەدى.
