پرەزيدەنت مەملەكەتتىك قىزمەتتەردى تسيفرلاندىرۋدا ايتارلىقتاي جەتىستىكتەرگە قول جەتكىزىلگەنىن, بىراق بيۋروكراتيالىق راسىمدەردىڭ ءالى دە بيزنەسكە كەدەرگى بولىپ وتىرعانىن ايتتى.
مەملەكەت باسشىسى ەڭ الدىمەن سالىقتىق اكىمشىلەندىرۋدى تۇبەگەيلى جەتىلدىرۋ قاجەتتىگىن اتاپ ءوتتى. ونىڭ ايتۋىنشا, مەملەكەتتىك كىرىستەر كوميتەتى تسيفرلاندىرۋ ۇدەرىسىندە كوشباسشىعا اينالىپ, جاساندى ينتەللەكت پەن جاڭا تەحنولوگيالاردى سالىق تولەۋشىلەردىڭ مۇددەسىنە ساي ءتيىمدى قولدانۋى ءتيىس.
سونىمەن قاتار جاڭا سالىق كودەكسى تەك نورمالاردى وزگەرتۋمەن شەكتەلمەي, اشىقتىق پەن ادالدىققا نەگىزدەلگەن جاڭا سالىق مادەنيەتىن قالىپتاستىرۋى قاجەت.
«مەملەكەت ادال جۇمىس ىستەيتىن سالىق تولەۋشىلەردىڭ مۇددەسىن قورعايدى. ولاردىڭ ادال ەڭبەگىنەن تۇسكەن سالىقتى ەلىمىزدى دامىتۋعا جۇمسايدى. سالىقتان تۇسكەن ءار تەڭگە حالىقتىڭ يگىلىگىنە جۇمسالۋعا ءتيىس», دەدى پرەزيدەنت.
قاسىم-جومارت توقاەۆ دامۋ ينستيتۋتتارىنىڭ دا ءرولىن كۇشەيتۋدى تاپسىردى. ونىڭ ايتۋىنشا, بۇل قۇرىلىمدار ناقتى سالالارعا باعىتتالعان, تەرەڭ تالداۋ جۇرگىزىپ, ينۆەستيتسيا سالۋعا قۇقىلى تولىققاندى دامۋ ينستيتۋتتارى رەتىندە جۇمىس ىستەۋى قاجەت.
