فوتو: اشىق دەرەككوز
«بىلتىردان بەرى «تازا قازاقستان» جالپىۇلتتىق جوباسى جۇزەگە اسىرىلىپ جاتىر. بۇل جۇمىسقا ميلليونداعان ازاماتىمىز اتسالىسىپ كەلەدى. ناتيجەسىندە 860 مىڭ گەكتاردان استام اۋماق تازالاندى, ءتورت ميلليوننان استام اعاش وتىرعىزىلدى. وسىنداي بەلسەندىلىكتىڭ ارقاسىندا قازاقستان ناعىز جاسىل ەلگە اينالادى. بۇل كەلەشەك ۇرپاققا كەرەمەت ۇلگى-ونەگە جانە وسيەت بولىپ قالارى انىق», دەدى قاسىم-جومارت توقاەۆ.
پرەزيدەنت تازالىق مادەنيەتىن قالىپتاستىرۋعا ۇلەس قوسقان ازاماتتارعا, اسىرەسە جاستارعا ريزاشىلىعىن ءبىلدىردى.
«مۇنى حالقىمىزدىڭ يگى ىستەرگە دەگەن ۇمتىلىسىنىڭ جارقىن كورىنىسى دەپ تۇسىنگەن ءجون», – دەدى مەملەكەت باسشىسى.
سونىمەن قاتار پرەزيدەنت ۇكىمەتكە ەكولوگيالىق اعارتۋ ءىسىنىڭ بىرىڭعاي ۇلگىسىن ەنگىزۋدى تاپسىردى.
تازالىق مادەنيەتىن قوعامدا تەرەڭ ورنىقتىرۋ – وتە ماڭىزدى مىندەت. وسى باعىتتا ۇكىمەت ەكولوگيالىق اعارتۋ ءىسىنىڭ بىرىڭعاي ۇلگىسىن ەنگىزۋگە ءتيىس. بۇل جۇمىس مەكتەپتەن باستاپ جوعارى وقۋ ورىندارىنا دەيىن بارلىق دەڭگەيدەگى ءبىلىم مەكەمەلەرىن قامتۋى قاجەت», دەدى مەملەكەت باسشىسى.
