فوتو: dooralei.ru
بىلتىر ەلىمىزدىڭ تەرريتورياسى ارقىلى جۇك تاسىمالداۋ كولەمى 1 ميلليارد توننادان اسقان. ق.توقاەۆ بۇل كورسەتكىشتى ءالى دە ارتتىرۋعا زور مۇمكىندىك بارىن اتاپ ءوتتى.
«سونىمەن بىرگە ەلىمىزدىڭ ترانزيتتىك الەۋەتىن ارتتىرۋعا ءالى دە زور مۇمكىندىك بار. «سولتۇستىك – وڭتۇستىك» كولىك ءدالىزى پارسى شىعاناعى مەن وڭتۇستىك ازيا ەلدەرىنىڭ نارىعىنا تىكەلەي جول اشادى. ال «شىعىس – باتىس» ءدالىزى مەن قىتايدىڭ ء«بىر بەلدەۋ, ءبىر جول» جاھاندىق باستاماسى قازاقستاننىڭ ەۋرازياداعى نەگىزگى قۇرلىق جولى رەتىندەگى ءرولىن كۇشەيتە تۇسەدى.
سونداي-اق ءبىز ءۇشىن ترانسكاسپي كولىك باعىتىن دامىتۋدىڭ ماڭىزى ارتا باستادى. بۇل باعىتتاردىڭ ءبارى ءبىرتۇتاس جۇيە سياقتى جۇمىس ىستەپ, ەلىمىزگە ەداۋىر تابىس اكەلۋى كەرەك. سونداي-اق ينفراقۇرىلىمدى جاقسارتۋعا جاڭا ينۆەستيتسيا تارتۋى قاجەت, ساپالى جۇمىس ورىندارىن اشۋعا ىقپال ەتۋگە ءتيىس. وسى ورايدا, تسيفرلىق تاسىلدەردى اۋقىمدى تۇردە قولدانعان ابزال. ونسىز ەشقانداي تيىمدىلىك بولمايدى», دەدى مەملەكەت باسشىسى.
پرەزيدەنت الەمدە ترانزيت ءۇشىن باسەكە كۇشەيىپ بارا جاتقانىنا دا نازار اۋداردى. بۇل باعىتتا ارزان بالاما باعىتتار مەن جولدار ۇسىنىلىپ جاتقانىن ەسكەرگەن ق.توقاەۆ جاۋاپتى ورگاندارعا الدىن الا ارەكەت ەتۋدى, ءبىر قادام الدا بولۋدى تاپسىردى.
«تاعى دا قايتالاپ ايتارىم, ينفراقۇرىلىمدى جاڭعىرتۋ ءىسىن ودان ءارى جالعاستىرىپ, وسى سالاداعى وزىق ەل بولۋ ءۇشىن تسيفرلاندىرۋ مەن جاساندى ينتەللەكتىنى كەڭ اۋقىمدا پايدالانعان ءجون. بيىل ۇزىندىعى – 836 شاقىرىم بولاتىن «دوستىق – مويىنتى» تەمىر جولىنىڭ ەكىنشى جەلىسى ىسكە قوسىلادى. جوبانى ءوز كۇشىمىزبەن وتە قىسقا مەرزىم ىشىندە جۇزەگە اسىردىق. بۇل جولدىڭ ءمان-ماڭىزى ەرەكشە, سەبەبى «شىعىس-باتىس» باعىتىنىڭ جۇك وتكىزۋ مۇمكىندىگىن ايتارلىقتاي ارتتىرادى. بىراق مۇنىمەن توقتاپ قالۋعا بولمايدى. ۇكىمەت «باقتى-اياگوز», «قىزىلجار-مويىنتى» جوبالارىن ۋاقىتىلى جۇزەگە اسىرۋعا ءتيىس. سەبەبى, اتالعان جوبالار ەلىمىزدەگى تەمىرجول جۇيەسىنىڭ تولىق قاڭقاسىن قالىپتاستىرادى», دەدى پرەزيدەنت.
