سۋرەت: qaragandyhabary.kz
ورتالىق كوممۋنيكاتسيالار قىزمەتى الاڭىندا وتكەن بريفينگتە ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى قۋاندىق ءالجانوۆ جىل باسىنان بەرى 8 ايدىڭ ىشىندە ەلدەگى ەسىرتكى قىلمىستارىنىڭ سانى 2,8%-عا ارتقانىن ايتتى. تاركىلەنگەن ەسىرتكى زاتتارىنىڭ كولەمى ەكى ەسەگە ءوسىپ, 13,5 توننانى قۇراعان. ونىڭ ىشىندە سينتەتيكالىق ەسىرتكىنىڭ ۇلەسى – 1,1 توننا.
ء«تارتىپ ساقشىلارىنىڭ قىراعى قىزمەتىنىڭ ارقاسىندا 7 ملن-نان اسا دوزا ەسىرتكى زاتى زاڭسىز اينالىمعا جىبەرىلمەدى. 105 جاسىرىن ەسىرتكى زەرتحاناسى جويىلدى. ولاردىڭ 12-ءسى سينتەتيكالىق ەسىرتكى وندىرۋمەن اينالىسقان. مىسالى, مامىر ايىندا الماتى وبلىسىندا سينتەتيكا وندىرگەن زەرتحانانىڭ قىزمەتى توقتاتىلىپ, ءبىر شەتەلدىك ازامات ۇستالىپ, 140 كيلودان اسا دايىن ءونىم مەن 8 توننا حيميالىق زات تاركىلەندى. بۇل زاتتاردان 4 توننا سينتەتيكالىق ەسىرتكى دايىنداۋ جوسپارلانعان», دەدى ول.
ءىىم دەرەگىنشە, «قاراسورا-2025» كەڭ اۋقىمدى وپەراتسياسى جىل سايىن جاز-كۇز مەزگىلىندە, اتاپ ايتقاندا, 1 ماۋسىمنان 31 قازانعا دەيىن وتەدى. اسىرەسە قۇرامىندا ەسىرتكىسى بار وسىمدىكتەر وسەتىن وڭتۇستىك ايماقتارعا ءمان بەرىلەدى. وپەراتسيا بارىسىندا قاراسورا ءوسىرۋ, جيناۋ مەن تاسىمالداۋعا قارسى ارەكەت ەتۋ, ەسىرتكى تاراتۋمەن اينالىساتىن ۇيىمداسقان قىلمىستىق توپتاردىڭ جولىن كەسۋ سەكىلدى مىندەتتەر ورىندالادى.
«ينتەرنەت جەلىسىندەگى ەسىرتكى قىلمىستارىن انىقتاۋ بويىنشا جۇيەلى جۇمىس جۇرگىزىلىپ جاتىر. جاساندى ينتەللەكت نەگىزىندە ينتەرنەت كەڭىستىگىن باقىلاۋعا ارنالعان اقپاراتتىق جۇيەلەر ىسكە قوسىلدى. جەتەكشى IT-كومپانيالار مەن قوعامدىق ۇيىمدارىنىڭ ماماندارى تارتىلىپ, ەسىرتكى سايتتارى انىقتالىپ, «كيبەرباقىلاۋ» جۇيەسى ارقىلى بۇعاتتاۋ ءۇشىن مادەنيەت جانە اقپارات مينيسترلىگىنە جولدانادى. وسى جىلى ەسىرتكى ساتۋمەن بايلانىسى بار 23 مىڭنان اسا رەسۋرس انىقتالدى», دەدى ق.ءالجانوۆ.
سونىمەن قاتار ەسىرتكى بيزنەسىندە پايدالانىلعان 44 مىڭنان اسا كارتالىق شوت بۇعاتتالىپ, 2,5 ملرد تەڭگە كولەمىندەگى قاراجاتقا توسقاۋىل قويىلعانىن جەتكىزدى.
بۇگىندە «قاراسورا-2025» وپەراتسياسى جامبىل, قىزىلوردا, اقتوبە, ۇلىتاۋ, تۇركىستان, الماتى, جەتىسۋ وبلىستارىندا بەلسەندى ءوتىپ جاتىر.
«بۇعان قوسا 2026–2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەستىڭ كەشەندى جوسپارى ازىرلەنىپ جاتقانىنا نازارلارىڭىزدى اۋدارعىم كەلەدى. بۇل – 2016 جىلدان بەرى ەكىنشى رەت ازىرلەنىپ وتىرعان باعدارلامالىق قۇجات. ول ەسىرتكىگە قارسى قىزمەتتىڭ بارلىق باعىتىن قامتيدى جانە وعان مەملەكەتتىك, جەرگىلىكتى اتقارۋشى ورگاندار مەن ۇكىمەتتىك ەمەس سەكتور وكىلدەرى تارتىلىپ جاتىر», دەدى ءىىم وكىلى.
