جالعىز گولدى 24-مينۋتتا قوناقتار ساپىندا شابۋىل شەبىندە ويناعان كيففەر مۋر سوقتى. باس باپكەر ءالي اليەۆ ءباسپاسوز ءماسليحاتىندا كوماندا سىن تەزىندە تۇرعانىن, باقتيار زاينۋتدينوۆ, ەركىن تاپالوۆ سىندى ويىنشىلار جاراقاتىنا بايلانىستى ويىنعا قاتىسا المايتىنى دا ۇجىمنىڭ الەۋەتىنە ايتارلىقتاي اسەر ەتكەنىن ايتقان ەدى.
«جىگىتتەردىڭ دايىندىعى ويداعىداي ءوتتى. ىشكى چەمپيوناتتىڭ ماتچتارىنا قاتىسىپ, ۇلتتىق قۇراما ويىنشىلارىنىڭ قارىم-قابىلەتىن كوردىك. فۋتبول جاراقاتقا ءجيى ۇرىندىرادى. تاجىريبەلى فۋتبولشىلاردىڭ كەيبىرى جاراقاتتانىپ, قاتارعا قوسىلا الماعانى قىنجىلتادى. دەگەنمەن دە وزگە جىگىتتەر سەنىمدى اقتاۋعا بارىن سالدى. 1-تايمنىڭ باسىنان تىزگىن قارسىلاستاردا بولىپ, قىسپاققا الدى. ۇزىلىسكە دەيىن ەسەپتى ساقتاۋعا كۇش سالدىق. 2-تايمدا قارسىلاس كوماندانىڭ جاساندى الاڭعا جەرسىنە الماۋىن, جەرگىلىكتى جانكۇيەرلەردىڭ ءبىزدى قىزۋ قولداۋىن, ۋەلس ويىنشىلارىنىڭ شارشاپ قالعانىن ۇتىمدى پايدالانۋعا تىرىستىق. سوعان سۇيەنىپ دۇركىن-دۇركىن شابۋىل ۇيىمداستىردىق. وكىنىشتىسى, جولىمىز بولمادى, بىرنەشە رەت دوپ قارسىلاس قاقپاسىنىڭ ماڭدايشاسىنان قايتتى. جانكۇيەرلەرگە ەرەكشە العىس ايتامىز, قۇراما وراسان قولداۋدى سەزىندى», دەدى ءالي ءحانالي ۇلى.
جالپى, جىگىتتەر ۇجىمدىق ويىن ۇلگىسىن كورسەتتى. جارتىلاي قورعاۋشى عالىمجان كەنجەبەكتىڭ بىرنەشە سوققىسى ۋەلس ويىنشىلارىن ايتارلىقتاي ابدىراتتى. ۇلتتىق قۇرامانى الاڭعا باستاپ شىققان كاپيتان ءنۇرالى ءالىپتىڭ ءسىڭىرىن سوزىپ, ورتا جولدا تارتىستان شىعىپ قالعانى وكىنىشتى. ماتچتا تەڭ ناتيجە تىركەۋگە مۇمكىندىك مول بولدى. ۇلتتىق قۇراما جەيدەسىن جاڭا كيگەن جاستاردىڭ جىگەر تانىتۋى جانكۇيەرلەردى ءسۇيسىنتتى. فۋتبولشىلارىنىڭ ءبىرازى انگليا بىرىنشىلىگىندە ويناپ, شاربولاتتاي شىڭدالعان ۋەلس قۇراماسىن كادىمگىدەي ساستىردى. ۇلتتىق قۇراما ساپىنداعى العاشقى ماتچىنا قاتىسقان قاقپاشى تەمىرلان اناربەكوۆ قارسىلاستاردىڭ بىرنەشە قاۋىپتى سوققىسىن تويتاردى.
ۆالليلىكتەردىڭ باس باپكەرى كرەيگ بەللامي ستاديوننىڭ جاساندى الاڭى ايتارلىقتاي اۋىر سوققانىن ايتتى. ءتىپتى تابيعي كوك مايسا ۇستىندە دوپ تەۋىپ داعدىلانعان ويىنشىلارعا جاراقات كولدەنەڭ كيلىگە مە دەپ قاۋىپتەنگەنىن دە جاسىرمادى.
ء«بىزدىڭ جىگىتتەردىڭ كوپشىلىگىنىڭ فۋتبول ماۋسىمى ەندى باستالادى, ال مۇندا ىشكى چەمپيونات ناعىز قىزعان شاعىندا. بۇعان دەيىن مۇنداي جاساندى الاڭدا ويناپ كورمەگەندىكتەن دە ويىن جەڭىل تيگەن جوق, جىگىتتەر ايتارلىقتاي شارشاپ قالدى», دەدى.
ەلىمىزدىڭ ۇلتتىق قۇراما فۋتبولشىلارى الەم چەمپيوناتىنىڭ فينالدىق كەزەڭىنە ىرىكتەۋ ويىندارىن J توبىندا وتكىزىپ جاتىر. ازىرگە قورجىنىمىزدا 3 ۇپاي عانا. بۇعان دەيىن 22 ناۋرىزدا سىرت الاڭدا ۋەلس قۇراماسىنان 3:1 ەسەبىمەن ۇتىلدى. 25 ناۋرىزدا ليحتەنشتەين قۇراماسىن 0:2 ەسەبىمەن جەڭدى. 9 شىلدەدە وسى «استانا ارەنا» ستاديونىندا سولتۇستىك ماكەدونيا فۋتبولشىلارىنا 0:1 ەسەبىمەن جول بەردى. بەس ماتچتان سوڭ 10 ۇپاي جيناعان ۋەلس قۇراماسى ازىرگە كوش باستاپ تۇر.
ۇلتتىق قۇراما ەرتەڭ سىرت الاڭدا بەلگيا قۇراماسىنا قارسى ويىن وتكىزەدى. 10 قازاندا ليحتەنشتەين كومانداسىن قابىلدايدى, 13 قازاندا سولتۇستىك ماكەدونياعا بارادى. ىرىكتەۋ كەزەڭىن تۇيىندەر ماتچ 15 قاراشا كۇنى «استانا ارەنادا» وتەدى, جىگىتتەر بەلگيا قۇراماسىنا قارسى تارتىسقا تۇسەدى.
