فوتو: til.kz
ءىس-شاراعا قر عىلىم جانە جوعارى ءبىلىم ءمينيسترى ساياسات نۇربەك, قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ, «قازاقتەلەكوم» اق باسقارما توراعاسى باعدات مۋسين, شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ماقپال جۇماباي جانە عالىمدار مەن سالا ماماندارى قاتىستى. سونداي-اق, ەلىمىزدىڭ بارلىق وڭىرىنەن ءتىل ساياساتىنا جاۋاپتى قىزمەتكەرلەر مەن ءبىلىم باسقارمالارىنىڭ وكىلدەرى ونلاين تۇردە قوسىلدى.
جيىندا عىلىم, ءبىلىم, تەحنولوگيا, ءتىل ساياساتى مەن تسيفرلىق دامۋ ماسەلەلەرى تالقىلانىپ, مەملەكەتتىك ءتىلدىڭ قازىرگى عىلىمي جانە تسيفرلىق كەڭىستىكتەگى ورنى مەن الەۋەتى جان-جاقتى قاراستىرىلدى.
حالىقارالىق «قازاق ءتىلى» قوعامىنىڭ پرەزيدەنتى راۋان كەنجەحان ۇلى قازاق تىلىندەگى ءماتىندى دىبىستىق فورماتقا اينالدىراتىن «TTS» (Text-to-Speech) جوباسىن ۇسىندى. بۇل جوبا قازاق ءتىلىنىڭ دىبىستىق قورىن جاساندى ينتەللەكت جۇيەسىنە ەنگىزىپ, ونى عىلىم مەن تەحنولوگيا سالاسىندا قولدانۋ اياسىن كەڭەيتۋدى كوزدەيدى. قازاقشا دىبىس مودەلى الەمدىك Hugging Face پلاتفورماسىندا جاريالاناتىن بولادى.
سونىمەن قاتار, كونفەرەنتسيا بارىسىندا حالىقارالىق «قازاق ءتىلى» قوعامى مەن ء«تىل-قازىنا» ورتالىعى بىرلەسىپ, «ۇلتتىق ديكتانت» جوباسىنىڭ رەسمي باستالعانىن حابارلادى. ونىڭ ماقساتى – جازۋ مادەنيەتىن جەتىلدىرۋ, ساۋاتتى جازۋ داعدىلارىن قالىپتاستىرۋ جانە ءتىل ارقىلى ۇلتتىق بىرەگەيلىكتى نىعايتۋ. ديكتانت وفلاين جانە ونلاين فورماتتا وتكىزىلىپ, وعان بارلىق ازاماتتار قاتىسا الادى.
كونفەرەنتسيانىڭ رەسمي بولىگى اياقتالعاننان كەيىن قاتىسۋشىلاردىڭ بارلىعى «ۇلتتىق ديكتانتقا» قاتىستى. شارانى بەلگىلى ديكتور قىمبات دوسجان جۇرگىزدى. ديكتانت ءماتىنى قازاق ادەبيەتىنىڭ كلاسسيكتەرىنەن الىندى. بۇل سىناقتا باعا قويىلمايدى, اركىم ءوز ءبىلىمىن ءوزى تەكسەرەدى.
ونلاين ديكتانتتى www.til.kz سايتىنداعى ارنايى پاراقشادا كەز كەلگەن ۋاقىتتا ورىنداۋعا مۇمكىندىك بار. قاتىسۋشىلارعا ەلەكتروندى العىس حاتپەن قاتار KITAP پلاتفورماسىنا تەگىن جازىلىم بەرىلەدى.
جوبا ناتيجەلەرى جىل سوڭىنا دەيىن جاريالانىپ, «ۇلتتىق ديكتانت» ءداستۇرلى تۇردە جىل سايىن وتكىزىلمەك.
