فەستيۆال تەاتر ۇجىمدارى اراسىنداعى شىعارماشىلىق بايلانىستى ارتتىرىپ, كاسىبي ىنتىماقتاستىقتى دامىتۋ جانە حالىقارالىق تەاتر كەڭىستىگىنە ينتەگراتسيالانۋدى كوزدەيدى.سونىمەن قاتار فەستيۆال قازاق مادەنيەتىندە وشپەس ءىز قالدىرعان بيكەن ريموۆانىڭ ەسىمىن ماڭگى ەستە قالدىرۋعا باعىتتالعان. ۇيىمداستىرۋشىلاردىڭ ايتۋىنشا, اتالعان ءىس-شارا جاس رەجيسسەرلەر مەن اكتەرلەردىڭ, دراماتۋرگتەر مەن سۋرەتشىلەردىڭ جاڭا بۋىنىن قولداپ, ولاردىڭ كاسىبي دامۋىنا سەرپىن بەرەدى.
حالىقارالىق دەڭگەيدە وتەتىن فەستيۆال 12–17 قىركۇيەك ارالىعىندا تالدىقورعاندا ساحنالانادى. ءۇشىنشى رەت جالاۋىن كوتەرگەلى وتىرعان ونەر دوداسىنا گرۋزيا, قىرعىزستان, وزبەكستان جانە قازاقستاننىڭ تۇكپىر-تۇكپىرىنەن كەلگەن توعىز تەاتر ۇجىمى قاتىسادى. بۇل قاتىسۋشىلار شىعارماشىلىق ىزدەنىستەرى مەن تىڭ قويىلىمدارىن كوپشىلىك نازارىنا ۇسىنادى.
فەستيۆالدىڭ سىنشىلار القاسىندا ەلگە تانىمال ونەر قايراتكەرلەرى تەاترتانۋشى, ونەرتانۋ دوكتورى, پروفەسسور, «قۇرمەت» وردەنىڭ يەگەرى نۇرپەيىس باقىت كاكيقىزى, ونەرتانۋ كانديداتى, وزبەكستان مەملەكەتتىك ونەر جانە مادەنيەت ينستيتۋتىنىڭ دوتسەنتى كوپادزە ايبەك ۆەيسال وگلۋ, بەلگىلى تەاترتانۋشى, تاتارستان رەسپۋبليكاسى مادەنيەت ءمينيسترىنىڭ كەڭەسشىسى نياز يگلاموۆ جانە شوتا رۋستاۆەلي اتىنداعى تبيليسي مەملەكەتتىك تەاتر جانە كينو ۋنيۆەرسيتەتىنىڭ پروفەسسورى, ونەرتانۋ دوكتورى گيورگي تسكيتيشۆيلي مەن قازاقستان رەسپۋبليكاسىنىڭ مەملەكەتتىك سىيلىعىنىڭ ەكى مارتە يەگەرى, قىرعىز رەسپۋبليكاسىنىڭ ەڭبەك سىڭىرگەن ءارتيسى, پروديۋسسەر, رەجيسسەر جولجاقسىنوۆ دوسحان قالي ۇلى بار.
مەرەيتوي اياسىندا وتەتىن فەستيۆال قازاقستان تەاتر ونەرىنىڭ دامۋىنا جاڭا سەرپىن بەرىپ, حالىقارالىق دەڭگەيدەگى شىعارماشىلىق بايلانىستى نىعايتۋعا ىقپال ەتەدى.
