سۋرەت «ەگەمەن قازاقستاننىڭ» ارحيۆىنەن الىندى
عىلىم جانە جوعارى ءبىلىم مينيسترلىگىنىڭ مالىمەتىنشە, كادر دايارلاۋعا بەرىلەتىن مەملەكەتتىك تاپسىرىس كولەمى جىل سايىن ارتىپ كەلەدى. 2024–2025 وقۋ جىلىنا 94 251 گرانت بولىنگەن. 2025–2026 وقۋ جىلىندا دا وسى شاما ساقتالىپ وتىر. ونىڭ ىشىندە باكالاۆرياتقا – 77 مىڭ, ماگيستراتۋراعا – 10 مىڭ, دوكتورانتۋراعا 3 مىڭ گرانت قاراستىرىلعان. بيىلعى مەملەكەتتىك گرانتتار ەل ەكونوميكاسىنىڭ بولجامدى كادرلىق قاجەتتىلىكتەرىن ەسكەرە وتىرىپ بولىنگەن. ەڭ كوپ گرانت تەحنيكالىق, پەداگوگيكالىق جانە ءىت سالالارىنا تيەسىلى. پرەزيدەنت وتكەن جىلعى جولداۋىندا: «ەڭ الدىمەن, سۋ, ەنەرگەتيكا, قۇرىلىس جانە باسقا دا سالالاردا قاتتى بايقالىپ وتىرعان كادر تاپشىلىعىن جويۋ قاجەت», دەپ باسا ايتقان. عىلىم جانە جوعارى ءبىلىم مينيسترلىگىنە قاراستى جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى جاننا ەسەنباەۆانىڭ ايتۋىنشا, بيىل وسى تاپسىرما نازارعا الىنعان.
«بىلتىر دا 78 مىڭعا جۋىق گرانت بولىنگەن ەدى. بيىل مەملەكەتتىك ءبىلىم بەرۋ تاپسىرىسى وسى كولەمدە بولدى. پەداگوگيكا سالاسىنا 13 مىڭنان استام, اقپاراتتىق كوممۋنيكاتسيالىق تەحنولوگيالارعا جانە ينجەنەرلىك باعىتتا 20 مىڭنان استام گرانت قاراستىرىلعان. باسقا سالالارعا قاجەتتىلىگىنە ساي ءبولىندى. ءبىزدىڭ ەكونوميكامىزعا بايلانىستى قازىر ينجەنەرلىك, سۋ, ەنەرگەتيكا, جول قۇرىلىسى, كولىك, اۋە جولدارى مەن تەمىرجول سالاسىنداعى ماماندار قاجەت. سول سەبەپتى ءدال وسى سالالارعا ءتيىستى گرانتتار ءبولىنىپ وتىر. تالاپكەرلەردىڭ اراسىندا مەديتسينالىق, پەداگوگيكالىق جانە ينجەنەرلىك باعىتتاردا, بيوتەحنولوگيا, جەڭىل ونەركاسىپ, تاۋ-كەن ىستەرى ماماندىقتارىنا سۇرانىس كوپ», دەدى ول.
ينفوگرافيكانى جاساعان – زاۋرەش سماعۇل, «ەQ»
جوعارى بىلىمگە قولجەتىمدىلىكتى كەڭەيتۋ ماقساتىندا ستۋدەنتتەردىڭ شاكىرتاقىسى دا جىل سايىن جوعارىلاپ جاتىر. بيىلعى وقۋ جىلىندا 20 پايىزعا كوتەرىلگەن. مىسالى, باكالاۆرياتتىڭ مەديتسينالىق جوعارى وقۋ ورىندارىنىڭ ستۋدەنتتەرى ءۇشىن ستيپەنديا 2024 جىلى 75 600 تەڭگەدەن 2025 جىلى 84 000 تەڭگەگە دەيىن, ينتەرناتۋرا ستۋدەنتتەرى ءۇشىن – 94 863 تەڭگەگە دەيىن, رەزيدەنتۋرا ستۋدەنتتەرى ءۇشىن 134 664 تەڭگەگە دەيىن ءوستى.
سونداي-اق جي ماماندارىن دايارلاۋعا دا ەرەكشە كوڭىل ءبولىنىپ وتىر. عىلىم جانە جوعارى ءبىلىم مينيسترلىگىنىڭ دەرەگىنشە, 20 جوعارى وقۋ ورنىندا جاساندى ينتەللەكت بويىنشا 21 جاڭا ءبىلىم باعدارلاماسى اشىلعان. ونىڭ ىشىندە «قولدانبالى جاساندى ينتەللەكت», «جي جانە بلوكچەين ينجەنەرياسى», «مەديتسيناداعى جي», «كومپيۋتەرلىك عىلىم جانە جاساندى ينتەللەكت» سياقتى زاماناۋي باعىتتار قامتىلعان. قازىردىڭ وزىندە 2196 ستۋدەنت وسى باعدارلامالاردا ءبىلىم الىپ جاتىر. بۇعان قوسا يننوۆاتسيالىق جوبالاردى جۇزەگە اسىرۋ جولعا قويىلعان. قورقىت اتا اتىنداعى قىزىلوردا ۋنيۆەرسيتەتىندە سەۋل تەحنيكالىق ۋنيۆەرسيتەتىمەن بىرلەسكەن جي جانە ينفورماتيكا جوعارى مەكتەبى اشىلدى. ق.ساتباەۆ ۋنيۆەرسيتەتىندە «City University of Hong Kong» فيليالى جۇمىس ىستەپ تۇر. ال شقتۋ بازاسىندا لۋ بان شەبەرحاناسى اياسىندا حالىقارالىق جي زەرتتەۋ ورتالىعى قۇرىلدى.
وزىق ماماندارمەن قامتاماسىز ەتۋ ماقساتىندا «ماماندىعىم – بولاشاعىم» جوباسى ىسكە اسىرىلىپ جاتىر. قازىرگى تاڭدا 20 وڭىردە وسى جوبانى جۇزەگە اسىرۋ بويىنشا وڭىرلىك جول كارتالارى بەكىتىلگەن. عىلىم جانە جوعارى ءبىلىم مينيسترلىگىنىڭ مالىمەتىنشە, 9 وڭىردە (پاۆلودار, ماڭعىستاۋ, قاراعاندى, اقتوبە, جامبىل, اقمولا, جەتىسۋ, استانا, الماتى) 45 سالا بويىنشا ماماندارعا قاجەتتىلىكتىڭ وڭىرلىك كارتالارى ازىرلەندى. سونىڭ نەگىزىندە 91 جوعارى وقۋ ورنى جاڭا كاسىپتەردىڭ سالالىق اتلاستارى مەن وڭىرلىك كارتالارعا سۇيەنە وتىرىپ, 902 ءبىلىم بەرۋ باعدارلاماسى دايىندالعان. قازىرگى كەزدە تاعى 5 وڭىردە – الماتى, اتىراۋ, قوستاناي, تۇركىستان, ۇلىتاۋ وبلىستارىندا, وڭىرلىك كارتالاردى ازىرلەۋ جۇمىسى ءجۇرىپ جاتىر. جۇمىس بارىسى 2025 جىلدىڭ سوڭىنا دەيىن اياقتالادى. مينيسترلىك «ماماندىعىم – بولاشاعىم» جوباسىن حالىقارالىق اتلاس دەڭگەيىنە كوتەرۋدى كوزدەپ وتىر. QS ۇيىمىمەن بىرلەسىپ, ستۋدەنتتەردى ەڭبەك نارىعىنا دايىنداۋعا كومەكتەسەتىن 1Mentor ينتەراكتيۆتى قۇرالىمەن ينتەگراتسيالاۋ جۇمىستارى باستالعان. 1Mentor – بۇل QS ازىرلەگەن جاساندى ينتەللەكت پلاتفورماسى. ول 200 ميلليوننان استام بوس جۇمىس ورنى تۋرالى حابارلاندىرۋدى تالداپ, يندۋستريانىڭ ناقتى قاجەتتىلىكتەرىن جانە سۇرانىسقا يە داعدىلاردى انىقتايدى. پلاتفورما وقۋ ورىندارىنا ءبىلىم باعدارلامالارىن بەيىمدەۋگە, مانساپتىق كەڭەس بەرۋگە, ستۋدەنتتەرگە كاسىبي ماقساتتارىنا جەتۋ ءۇشىن ءتيىستى كۋرستاردى تاڭداۋعا مۇمكىندىك بەرەدى. ياعني بۇل قۇرال ستۋدەنتتەرگە وقۋ تراەكتورياسىن تۇزەپ, ەڭبەك نارىعىنا قاجەتتى باعىتقا جول كورسەتەدى.
تەحنيكالىق جانە كاسىپتىك ءبىلىم ۇيىمدارىندا دا مامان دايارلاۋ ىسىنە تىڭعىلىقتى كوڭىل ءبولىنىپ وتىر. وقۋ-اعارتۋ مينيسترلىگىنىڭ مالىمەتىنشە, ەڭ الدىمەن, قايتالاناتىن ماماندىقتاردى قىسقارتۋ, ەڭبەك نارىعىندا سۇرانىسقا يە جاڭا باعىتتاردى اشۋ قولعا الىنعان. تجكب ۇيىمدارىنا اكادەميالىق دەربەستىك بەرىلگەننەن باستاپ كوللەدجدەرگە 4000-نان استام جاڭارتىلعان, سۇرنىسقا ساي ءبىلىم باعدارلامالارى ەنگىزىلگەن.
سونىمەن قاتار دۋالدى وقىتۋ جۇيەسى كەڭەيىپ كەلەدى. بۇگىندە 558 كوللەدجدە 8013 كاسىپورىننىڭ قاتىسۋىمەن 72 مىڭنان استام ستۋدەنت قامتىلعان. 498 كومپانيا وقۋ ورىندارىمەن مەموراندۋمدارعا قول قويىپ, قامقورشىلىق كەڭەستەرگە ەنىپ, ستۋدەنتتەردى وندىرىستىك تاجىريبەگە قابىلداۋ تۋرالى كەلىسىم جاساسقان. سونىڭ ارقاسىندا جىل سايىن كوللەدج تۇلەكتەرىنىڭ جۇمىسقا ورنالاسۋى دەڭگەيى ارتىپ كەلەدى.
