اليانس عىلىم, ءبىلىم مەن ونەركاسىپتىڭ ءوزارا ىقپالداستىعىن جەدەلدەتۋ, ترانسشەكارالىق تەحنولوگيالار ترانسفەرىن دامىتۋ جانە قازاقستان مەن وڭىردە جاساندى ينتەللەكت يندۋسترياسىن جاڭعىرتۋعا ارنالعان اشىق پلاتفورما رەتىندە قۇرىلىپ وتىر.
اليانستىڭ قۇرىلتايشىلارى – پرەزيدەنت جانىنداعى ۇلتتىق عىلىم اكادەمياسى, چجەتسزيان تەحنولوگيالىق ۋنيۆەرسيتەتى (قحر), قازاق ۇلتتىق اگرارلىق زەرتتەۋ ۋنيۆەرسيتەتى جانە Zhejiang Zhonghe Technology Co., Ltd. (قحر).
ۇلتتىق عىلىم اكادەمياسىنىڭ پرەزيدەنتى ا.كۇرىشباەۆ عالىمداردىڭ قحر-عا ساپارىنىڭ ماڭىزدى تەتىكتەرىنە توقتالىپ, حالىقارالىق ارىپتەستىك اياسىندا ىسكە اساتىن نەگىزگى باعىتتاردى اتادى.
ولاردىڭ قاتارىندا:
كەڭىستىكتىك-ۋاقىتتىق ينتەللەكت جانە تۇراقتى دامۋ جونىندەگى بىرلەسكەن زەرتحانانى دامىتۋ;
ەلىمىزدەگى العاشقى ءىرى جاساندى ينتەللەكت تىلدىك مودەلىن DeepBas ازىرلەۋ;
توتەنشە جاعدايلار, ەكولوگيا, ەنەرگەتيكا جانە تۇراقتى دامۋ سالالارىنا ارنالعان جاساندى ينتەللەكتىڭ سەرۆيستىك پلاتفورماسىن قۇرۋ;
سپۋتنيكتىك تەحنولوگيالاردى, ۇشقىشسىز جۇيەلەردى, سەنسورلار مەن «بەيدوۋ» ناۆيگاتسياسىن ينتەگراتسيالاۋ مەن بىرلەسكەن ءبىلىم بەرۋ باعدارلامالارى ارقىلى كادرلار دايارلاۋ;
وقىتۋشىلارمەن الماسۋ, جاڭا وقۋلىقتار مەن وقۋ رەسۋرستارىن شىعارۋ جوسپارلانىپ وتىر.
الداعى بەس جىلدا ەكى ەلدە باكالاۆريات, ماگيستراتۋرا جانە دوكتورانتۋرا باعدارلامالارى بويىنشا كەمىندە 100 ستۋدەنتتى دايىنداۋ, سونداي-اق جىل سايىن 200-دەن استام ماماندى كاسىبي وقىتۋ جوسپارلانعان. ماڭىزدى ناتيجەلەردىڭ ءبىرى — DeepBas مودەلىن ەنگىزۋ, ەكولوگيالىق مونيتورينگ جۇيەلەرىن, سمارت اۋىل شارۋاشىلىعىن, كولىك جانە ەنەرگەتيكالىق قاۋىپسىزدىك شەشىمدەرىن دامىتۋ بولماق.
جوبا ەلىمىز ءۇشىن اۋىل شارۋاشىلىعى, كولىك جانە ەنەرگەتيكا سالالارىنا وزىق تەحنولوگيالاردى ەنگىزۋدە, ال اسپان استى ەلى ءۇشىن ايماقتاعى عىلىمي-ءبىلىم بەرۋ جانە تەحنولوگيالىق ىنتىماقتاستىقتى كەڭەيتۋ مۇمكىندىگى رەتىندە ستراتەگيالىق ماڭىزعا يە.
عالىمداردىڭ پىكىرىنشە, ەكى ەل اراسىنداعى ءبىلىم مەن عىلىم ىنتىماقتاستىعى ۇزاق مەرزىمدى پەرسپەكتيۆادا ء«بىر بەلدەۋ — ءبىر جول» باستاماسى اياسىنداعى ىنتىماقتاستىق ءبىلىم مەن تەحنولوگيالاردىڭ ءتيىمدى ترانسفەرىن قامتاماسىز ەتىپ, ءوڭىردىڭ عىلىمي-ءبىلىم بەرۋ الەۋەتىن نىعايتادى جانە جاڭا بۋىن زەرتتەۋشىلەر مەن مامانداردى دايارلاۋعا جول اشادى.
الماتى
