عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى مەن تۇركىستان وبلىسى اكىمدىگى بىرلەسە ۇيىمداستىرعان بايقاۋعا 15 وڭىردەن ىرىكتەۋدەن وتكەن مەملەكەتتىك قىزمەتشىلەر قاتىستى. ولار ءۇش كەزەڭ بويىنشا باق سىنادى. ءبىرىنشى كەزەڭدە قاتىسۋشىلار قازاق تىلىندەگى كونەرگەن سوزدەردىڭ ماعىناسىن اشسا, ەكىنشى كەزەڭدە ورىس تىلىندە ەلىمىزدىڭ وڭىرلەرى مەن ۇلتتىق قۇندىلىقتارى تۋرالى سۇراقتارعا جاۋاپ بەردى. ال ءۇشىنشى كەزەڭدە اعىلشىن تىلىندە قازاقستاننىڭ ۇلى تۇلعالارى مەن ۇلتتىق داستۇرلەرى تۋرالى تانىمدىق تاقىرىپتاردى ءتۇسىندىرىپ بەردى.
قازىلار القاسى قۇرامىنداعى ءۇش ءتىلدى مەڭگەرگەن فيلولوگ عالىمدار مەن ءتۇرلى سالا ماماندارى قاتىسۋشىلاردىڭ تىلدەردى مەڭگەرۋ دەڭگەيى مەن كاسىبيلىگىن جوعارى باعالادى. بايقاۋدىڭ تارتىستى وتكەنىن ايتىپ, بارلىق قاتىسۋشىعا العىسىن ءبىلدىردى. بايقاۋ قورىتىندىسى بويىنشا ءى ورىندى ارداق نۇرعازى (الماتى قالاسى), ءىى ورىندى نۇرحات بەردىبەك (قىزىلوردا وبلىسى), ءىىى ورىندى راۋان جاقسان (قوستاناي وبلىسى) مەن داۋلەتجان مۇحانبەتقاليەۆ (ورال قالاسى) يەلەندى. ىنتالاندىرۋ سىيلىعى رينات بەكمۇحانبەتكە (اتىراۋ وبلىسى), سلامبەك مۇقاشەۆ (الماتى وبلىسى), سۇلتان بەردىبەك (تۇركىستان وبلىسى), ءاليا جانتاەۆا (اقمولا وبلىسى), ماديار بەيسالىعا ( ۇلىتاۋ وبلىسى) تابىس ەتىلدى.
