فوتو: bbc.com
بۇۇ باعالاۋى بويىنشا, گازا قالاسى مەن ونىڭ ماڭىندا شامامەن ءبىر ميلليون ادام تۇرادى. يزرايل حاماس-تىڭ نەگىزگى بەكىنىستەرى وسى اۋماقتا ورنالاسقانىن ايتىپ, قالانى تولىق باقىلاۋعا الۋعا دايىندالىپ جاتىر.
COGAT – يزرايل قورعانىس مينيسترلىگىنىڭ پالەستينا اۋماقتارىنداعى ازاماتتىق ىستەردى قاداعالايتىن قۇرىلىمىنىڭ مالىمەتىنشە, سوڭعى كۇندەرى گازانىڭ سولتۇستىگىنەن وڭتۇستىككە قاراي تۇرعىنداردىڭ بەلسەندى تۇردە كوشىپ جاتقانى بايقالعان. سولتۇستىك اۋدانداردى شامامەن 70 مىڭ ادام تاستاپ كەتكەن.
حالىقارالىق ۇيىمدار ەكى جىلعا سوزىلعان قاقتىعىس كەزىندە گازاداعى تۇرعىنداردىڭ باسىم بولىگى, ياعني 2 ميلليوننان استام ادامنىڭ كەمىندە ءبىر رەت قونىس اۋدارعانىن ەسكە سالدى.
يزرايل قونىس اۋدارۋشىلار ءۇشىن قاۋىپسىز گۋمانيتارلىق ايماق جاساقتاۋعا ۋادە بەرىپ وتىر. رەسمي جاريالانىم جاقىن كۇندەرى كۇتىلەدى. بۇل ايماق بوسقىندار شوعىرلانعان ورتالىق لاگەرلەردەن وڭتۇستىكتەگى ءال-ماۆاسي اۋدانىنا دەيىن, ءارى شىعىسقا قاراي جالعاساتىنى ايتىلىپ وتىر.
الايدا حالىقارالىق ساراپشىلار يزرايل سوعىستىڭ العاشقى كەزەڭىندە ءال-ماۆاسيدى گۋمانيتارلىق ايماق دەپ اتاعانىمەن, كەيىن ول جەرگە بىرنەشە رەت سوققى بەرگەنىن العا تارتقان.
حالىقارالىق قىزىل كرەست قاقتىعىس ءجۇرىپ جاتقان جاعدايدا تۇرعىنداردى قاۋىپسىز كوشىرۋ مۇمكىن ەمەستىگىن اتاپ ءوتتى.
تامىز ايىنىڭ سوڭىندا گازا قالاسىندا اشارشىلىق رەسمي تۇردە تىركەلدى. بۇل تۋرالى بۇۇ اگەنتتىكتەرى, گۋمانيتارلىق ۇيىمدار مەن بىرقاتار ەلدىڭ ۇكىمەتتەرى بىرىگىپ جۇرگىزگەن جاھاندىق زەرتتەۋ IPC قورىتىندىسى جاريالادى.
وسى تۇستا يزرايل گازا قالاسىنا وپەراتسياعا دايىندىقتى كۇشەيتىپ جاتىر. مىڭداعان زاپاس اسكەر شاقىرىلعان. پرەمەر-مينيستر بينيامين نەتانياحۋ حاماس تولىق جويىلمايىنشا اسكەري قيمىل جالعاساتىنىن مالىمدەدى.
يزرايل ارمياسى قازىردىڭ وزىندە گازا قالاسىنىڭ شەتىنە جەتكەن. تساحال دەرەككوزدەرى شابۋىلدىڭ قىركۇيەكتىڭ ورتاسىنا جوسپارلانعانىن حابارلادى.
ءيزرايلدىڭ قاۋىپسىزدىك كابينەتى بۇل شەشىمدى ءبىر اي بۇرىن ماقۇلداعان. اسكەردىڭ باستى ماقساتى كەپىلدە وتىرعان 48 ادامدى بوساتۋ. ولاردىڭ ىشىندە 20-سىنىڭ ءتىرى ەكەنى ايتىلعان.
