فوتو: اشىق دەرەككوز
مونيتورينگ ناتيجەسىندە, ەلدە 108 مىڭنان استام ادامنىڭ تۇراقتى تىركەۋى جوق, ال تاعى 28 مىڭنان استامى تەك ۋاقىتشا تىركەلگەنى انىقتالعان. ەگەر تۇزەتۋلەر قابىلدانسا, مۇنداي ازاماتتاردىڭ زەينەتاقىسى مەن جاردەماقىسى ۋاقىتشا توقتاتىلادى.
قۇجاتتا بۇل وزگەرىستەرگە قاتىستى نارازىلىق بولۋى مۇمكىن ەكەنى دە اتاپ وتىلگەن:
«وسى نورمالاردى قابىلداۋ ەلدەن تىس جەرلەرگە كەتكەن جانە وسى ەلدە تۇرۋعا ىقتيارحات العان زەينەتاقى مەن جاردەماقى الۋشىلار (قازاقستان ازاماتتارى) تاراپىنان نارازىلىققا اكەپ سوعۋى مۇمكىن. مۇنداي جاعدايدا تولەمدەر ءمان-جايدى انىقتاعانعا دەيىن توقتاتىلا تۇرادى», دەلىنگەن تۇسىندىرمەدە.
بۇدان بولەك, تولىق مەملەكەتتىك قامسىزداندىرۋدا جۇرگەن الەۋمەتتىك قىزمەت كورسەتۋ ورتالىقتارىنداعى جانە قىلمىستىق-اتقارۋ جۇيەسى مەكەمەلەرىندە تۇراتىن ازاماتتارعا زەينەتاقى تولەمدەرى توقتاتىلادى.
تۇزەتۋلەر اتاۋلى الەۋمەتتىك كومەك جۇيەسىنە دە اسەر ەتەدى. ەندى ونى تاعايىنداۋ كەزىندە وتباسىنىڭ تابىسىمەن قاتار, شىعىستارى, نەسيەلەرى, دەپوزيتتەرى جانە مۇلكى دە ەسكەرىلەتىن بولادى. مينيسترلىكتىڭ ايتۋىنشا, بۇل شارا تولەمدەردىڭ ناقتىلىعىن ارتتىرىپ, بيۋدجەت قاراجاتىن نەگىزسىز جۇمساۋدى ازايتۋعا باعىتتالعان.
سونىمەن قاتار قۇجاتتا دەكرەتتىك تولەمدەردىڭ ەڭ جوعارعى مولشەرىن شەكتەۋ قاراستىرىلعان. جاڭا ەرەجە بويىنشا, بۇل سوما 7 ەڭ تومەنگى جالاقىدان اسپايدى, ال جۇمىسسىزدىق بويىنشا جاردەماقى تاعايىنداۋعا باقىلاۋ كۇشەيەدى.
ەڭبەك مينيسترلىگى بۇل شارالار الەۋمەتتىك ساقتاندىرۋ جۇيەسىنىڭ قارجىلىق تۇراقتىلىعىن كەمىندە 2032 جىلعا دەيىن قامتاماسىز ەتۋگە باعىتتالعانىن مالىمدەدى.
زاڭ جوباسىن 2025 جىلدىڭ جەلتوقسان ايىندا قابىلداۋ جوسپارلانىپ وتىر.
