بۇل جوبا قازۇۋ مەن قىتايدىڭ جەتەكشى جوعارى تەحنولوگيالىق كومپانياسى — «Jiangsu Huibo Robotics Technology Co., Ltd.» اراسىنداعى ستراتەگيالىق ارىپتەستىكتىڭ ناتيجەسىندە جۇزەگە استى. اشىلۋ ءراسىمى قازاقستان-قىتاي ىسكەرلىك كەڭەسىنىڭ وتىرىسى بارىسىندا ءوتتى.
سالتاناتتى ءىس-شاراعا قازۇۋ رەكتورى جانسەيىت تۇيمەباەۆ پەن «Jiangsu Huibo Robotics Technology Co., Ltd.» كومپانياسىنىڭ وكىلى لي ۆەن حانىم قاتىستى. قوس تاراپ ءبىلىم, عىلىم جانە يننوۆاتسيا سالاسىنداعى ىنتىماقتاستىقتى تەرەڭدەتۋگە ۋاعدالاستى.
جيىن بارىسىندا ينستيتۋت پەن روبوتتەحنيكا ورتالىعى تۋرالى ارنايى بەينەروليك كورسەتىلدى. جاڭا ورتالىق KazNU Hub اۋماعىندا ورنالاسقان, جالپى اۋدانى – 600 شارشى مەتردى قۇرايدى. جوباعا 2,5 ملن دوللار كولەمىندە ينۆەستيتسيا قۇيىلىپ, 13 زاماناۋي روبوت ورناتىلعان. مۇندا باكالاۆريات, ماگيستراتۋرا جانە دوكتورانتۋرا دەڭگەيلەرىندە «روبوتتەحنيكا», «مەحاترونيكا», «جاساندى ينتەللەكت» جانە «زاتتار ينتەرنەتى» باعىتتارى بويىنشا بىرلەسكەن باعدارلامالار جۇزەگە اسىرىلماق.
سونىمەن قاتار عىلىمي زەرتتەۋ جۇمىستارى جۇرگىزىلىپ, وندىرىستىك, سەرۆيستىك جانە ءبىلىم بەرۋ روبوتتارى بويىنشا جاڭا جوبالار ازىرلەنەدى. جاساندى ينتەللەكت پەن اۆتوماتتاندىرۋ سالاسىندا ستارتاپتار مەن يننوۆاتسيالىق كومپانيالاردى قولداۋ دا كوزدەلگەن.
بۇل باستاما ەلىمىزدىڭ تسيفرلىق دامۋ قارقىنىن كۇشەيتىپ, مەملەكەتتىڭ حالىقارالىق يننوۆاتسيالىق كەڭىستىكتەگى بەدەلىن ارتتىرۋعا سەرپىن بەرمەك.
