الماتى قالالىق پوليتسياسى ەڭ كەڭ تارالعان الاياقتىق سىزبالارىن تۇسىندىرەتىن ارنايى الەۋمەتتىك بەينەروليك دايىندادى. ءتارتىپ ساقشىلارىنىڭ ايتۋىنشا, ءىرى سپورتتىق جانە مادەني شارالار الدىندا ينتەرنەت ارقىلى جالعان بيلەتتەر ۇسىناتىن الاياقتار ادەتتەگىدەن بەلسەندى جۇمىس ىستەي باستايدى.
پوليتسيا ازاماتتارعا بيلەتتەردى تەك رەسمي كاسسالاردان جانە ليتسەنزياسى بار تاراتۋشىلاردان الۋدى ۇسىنادى. الەۋمەتتىك جەلىلەر مەن مەسسەندجەرلەردە الدىن الا تولەم جاساۋدى تالاپ ەتەتىن كۇماندى ۇسىنىستارعا جولاماۋ قاجەت.
– قالا تۇرعىندارى مەن قوناقتارىنا ەسكەرتەمىز: الداعى ماتچقا قىزىعۋشىلىق ارتقان سايىن الاياقتىق تىزبەكتەردىڭ قاۋپى دە جوعارىلايدى. ەشقاشان بيلەتتى قولدان نەمەسە تەكسەرىلمەگەن ينتەرنەت-پلاتفورمالاردان ساتىپ الماڭىز. كۇمان تۋعان جاعدايدا رەسمي ديستريبيۋتور كاسساسىنا جۇگىنىڭىز. بۇل – ءوزىڭىزدى جانە قاراجاتىڭىزدى قورعاۋدىڭ جالعىز جولى. ءبىزدىڭ ماقساتىمىز – كيبەرقىلمىستاردى انىقتاپ قانا قويماي, ولاردىڭ الدىن الۋ. سول ءۇشىن الەۋمەتتىك بەينەروليكتەر مەن باق ارقىلى پروفيلاكتيكالىق جۇمىستاردى كۇشەيتتىك, – دەدى الماتى قالالىق پد كيبەرقىلمىسقا قارسى كۇرەس باسقارماسىنىڭ باستىعى انەس قالدىباەۆ.
پوليتسيا كۇماندى حابارلاندىرۋلار مەن الاياقتىق بەلگىلەرى انىقتالعان ساتتە بىردەن «102» نومىرىنە قوڭىراۋ شالۋدى ەسكە سالدى.
ايتا كەتەيىك, «قايرات» – «رەال مادريد» كەزدەسۋى 30 قىركۇيەك كۇنى الماتىدا وتەدى. ال «ينتەرمەن» كەزدەسۋ 5 قاراشا كۇنى ميلاندا وتەدى. «ارسەنالمەن» كەزدەسۋ 2026 جىلدىڭ 28 قاڭتارىنا جوسپارلانعان.
