فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, جىل باسىنان بەرى ەلىمىزدىڭ بارلىق وڭىرلەرىنەن 68,9 مىڭ ءوتىنىم سىرتتاي فورماتتا قارالعان.
«قازىرگى تاڭدا مەديتسينالىق-الەۋمەتتىك ساراپتامانى قاشىقتان وتكىزۋ 30 نوزولوگيالىق نىسان بويىنشا جۇرگىزىلىپ جاتىر. 2024 جىلى 96,9 مىڭنان استام ءوتىنىم سىرتتاي فورماتتا قارالدى, بۇل كۋالاندىرۋدان وتكەن مۇگەدەكتىگى بار ادامداردىڭ جالپى سانىنىڭ 37,4%-ىن قۇرايدى», دەلىنگەن حابارلامادا.
ەستەرىڭىزگە سالا كەتەيىك, ۇلتتىق قوعامدىق سەنىم كەڭەسىنىڭ VI وتىرىسىندا مەملەكەت باسشىسى ەرەكشە قاجەتتىلىكتەرى بار ادامدار ءۇشىن بارىنشا ىڭعايلى جاعداي جاساۋدى تاپسىرعان ەدى. اتاپ ايتقاندا, ازاماتتاردىڭ ءتۇرلى مەكەمەلەرگە بارۋىن قىسقارتۋ, ارتىق قۇجات جيناتۋدى بولدىرماۋ جانە قىزمەت الۋشى مەن قىزمەت كورسەتۋشى اراسىنداعى تىكەلەي بايلانىستى ازايتۋ مىندەتى قويىلدى.
وسى تاپسىرمالاردى ورىنداۋ ءۇشىن قر ەڭبەك جانە حالىقتى الەۋمەتتىك قورعاۋ مينيسترلىگى دەنساۋلىق ساقتاۋ مينيسترلىگىمەن جانە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, قازاقستاننىڭ بارلىق 20 وڭىرىندە مەديتسينالىق-الەۋمەتتىك ساراپتامانى سىرتتاي فورماتتا وتكىزۋدىڭ پيلوتتىق جوباسىن جۇزەگە اسىرىپ وتىر.
مۇگەدەكتىك توبىن بەلگىلەۋ ءۇشىن ازاماتتار تەك تۇرعىلىقتى جەرىندەگى ەمحاناعا بارىپ, قاجەتتى مەديتسينالىق تەكسەرۋدەن وتەدى. قالعان پروتسەستەر اقپاراتتىق جۇيەلەردىڭ ينتەگراتسياسى ارقىلى ءوتىنىش بەرۋشىنىڭ قاتىسۋىنسىز جۇرگىزىلەدى.
سىرتتاي كۋالاندىرۋدىڭ ەنگىزىلۋى بىرقاتار ارتىقشىلىقتارعا جول اشتى. اتاپ ايتقاندا:
- اكىمشىلىك جانە بيۋروكراتيالىق كەدەرگىلەر ازايدى;
- ساراپتامالىق شەشىمدەردىڭ اشىقتىعى قامتاماسىز ەتىلدى;
- الەۋمەتتىك قىزمەتتەردى ۇيدەن شىقپاي-اق الۋعا مۇمكىندىك بەرىلدى;
- سىبايلاس جەمقورلىق تاۋەكەلدەرى تومەندەدى.
