ونىڭ العاشقى ۇستازى – اناسى. تىگىن ماشيناسىنىڭ سىڭعىرىنا ەلىتىپ وسكەن ءبۇلدىرشىن اناسىنان ش ۇلىق پەن شارف توقۋدى دا ۇيرەنگەن.
«انام ماعان كىشكەنتاي كەزىمدە-اق تىگىن ماشيناسىمەن قالاي جۇمىس ىستەۋ كەرەك ەكەنىن ۇيرەتكەن. سول كەزدەرى ول نە تىكسە دە سوعان قاراپ وتىرىپ تاجىريبە جيناي بەرگەنمىن. انامنان ۇلگى الىپ ءوز ونەرىمدى ءارى قاراي شىڭداعىم كەلگەن», دەيدى ول.
مىنە, سول بالا كەزدەن باستالعان قىزىعۋشىلىق ونى بۇگىنگى كاسىبي تىگىنشىگە اينالدىردى. نۇرگۇل ءۇشىن تىگىن – جاي كاسىپ ەمەس, جۇرەكتىڭ تىنىسى.
ء«وز جۇمىسىمدى دەمالىسىم دەپ ەسەپتەيمىن. تىگىنمەن اينالىسقاندا بار نازارىم تەك ينە مەن جىپتە بولادى, ەشتەڭە الاڭداتپايدى. جاقسى دۇنيە شىعارسام – سونىڭ ءوزى باقىت», دەيدى ول.
نۇرگۇل كاسىبي جولىن «JOLTAP» جوباسى اياسىندا باستاعان. 2023 جىلدىڭ مامىر ايىندا استانا قالاسى اكىمدىگىنىڭ باستاماسىمەن ىسكە قوسىلعان بۇل جوبا بۇگىندە ەلوردالىقتار ءۇشىن جاڭا كاسىپ يگەرۋدەگى تاپتىرماس مۇمكىندىك.
مەملەكەت باسشىسى قاسىم-جومارت توقاەۆ 2025 جىلدى «جۇمىسشى ماماندىقتار جىلى» دەپ جاريالاپ, قوعامدا ادال ەڭبەكتىڭ قادىرىن ارتتىرۋعا باسا نازار اۋدارعان بولاتىن. وسى يدەيانىڭ ناقتى ىسكە اسقان كورىنىسى – JOLTAP جوباسى دەسەك ارتىق ەمەس. مىنە, ءدال وسى مۇمكىندىكتىڭ ارقاسىندا نۇرگۇل ءوزىنىڭ سۇيىكتى ءىسىن كاسىپكە اينالدىرىپ وتىر.
ادامزاتتىڭ تىگىن ونەرى تىم تەرەڭنەن باستاۋ الادى. ارحەولوگتار سىبىردەن تابىلعان ەڭ كونە ينەنىڭ 30 مىڭ جىل بۇرىن پايدالانىلعانىن ايتادى. ول سۇيەكتەن ويىلىپ, ۇشىنا جىڭىشكە ءسىڭىر وتكىزىلگەن. العاشقى كيىمدەر جانۋار تەرىسىنەن جاسالىپ, ادامدى سۋىقتان قورعاعان.
كەيىنىرەك ادامدار زىعىر, ءجۇن, كەندىردەن ماتا توقىپ, وركەنيەتتەر وزىنە ءتان ءسان ۇلگىسىن قالىپتاستىردى. مىسىردا – جەڭىل زىعىردان تىگىلگەن كيىمدەر, قىتايدا – جىبەك, ەۋروپادا – ءساندى ساراي كيىمدەرى. قازاق دالاسىندا دا كيىم تىگۋدىڭ وزىندىك ءداستۇرى بولعان: انالارىمىز كيىز باسىپ, ىشىكتەن باستاپ ساۋكەلە مەن كامزولعا دەيىن ءوز قولىمەن ورنەكتەگەن.
ياعني, تىگىن ونەرى – قاراپايىم تۇرمىستىق قاجەتتىلىكتەن باستالىپ, مادەنيەت پەن ونەردىڭ ايناسىنا اينالعان كاسىپ. بۇگىندە سول كونە ءداستۇردىڭ جالعاسى نۇرگۇل سياقتى شەبەرلەردىڭ قولىندا جاڭاشا تۇرلەنىپ وتىر.
بۇگىندە ول اسىرەسە كەشكى كويلەكتەر مەن ۇزاتۋ تويىنا ارنالعان اسەم كيىمدەرگە تاپسىرىس كوپ الاتىنىن ايتتى. سوڭعى جىلدارى ەتنوستيلدەگى كيىمدەرگە سۇرانىس ارتقانىن ەرەكشە اتاپ ءوتتى.
«قازاقتىڭ ۇلتتىق ناقىشتاعى ويۋ-ورنەكتەرىن زاماناۋي ۇلگىدە تۇرلەندىرىپ كورسەتكىم كەلەدى. بىزدە قانشاما اڭىز-اڭگىمەلەر, ەرتەگىلەر, كەيىپكەرلەر بار. ءار ويۋدىڭ ءوز تاريحى بار. سولاردىڭ ءبارىن اسەم كيىمگە اينالدىرۋ – مەنىڭ ارمانىم», دەيدى نۇرگۇل.
كەيىپكەرىمىز وتاندىق ديزاينەرلەردىڭ ەڭبەگىن دە جوعارى باعالايدى.
ء«ار ديزاينەردىڭ ءوز قولتاڭباسى بار. ۇلتتىق ناقىشتى زاماناۋي ۇلگىمەن ۇيلەستىرىپ جۇرگەندەر كوپ. بىراق ءبىر كەمشىن تۇسى – بىزدە ماتا ءوندىرىسى دامىماعان. كوبى شەتەلدەن اكەلىنەدى. ەگەر قازاقستاندا ماتا ءوندىرىسى جولعا قويىلسا, كيىم باعاسى دا قولجەتىمدى بولار ەدى», دەگەن ويىن دا جاسىرماي جەتكىزدى.
تىگىنشى بولۋ – تەك قولىنىڭ ەپتىلىگى عانا ەمەس, جان دۇنيەنىڭ نازىكتىگى مەن جاۋاپكەرشىلىگى.
«ۇقىپتى بولۋ – تىگىنشىنىڭ باستى قاسيەتى. ال ەڭ ءبىرىنشى – تاپسىرىس بەرۋشىنىڭ كوڭىلىنەن شىعۋ. تۇتىنۋشى رازى بولسا, ءبىز ءۇشىن ودان اسقان باقىت جوق», دەيدى نۇرگۇل.
