دەپۋتات جاز ايلارىندا ارىپتەستەرىمەن بىرگە بارلىق وڭىرلەردە تۇرعىندارمەن, پاتەر يەلەرىنىڭ كووپەراتيۆى مەن مەنشىك يەلەرىنىڭ بىرلەستىگى وكىلدەرىمەن, باسقارۋشى كومپانيالارمەن كەزدەسكەنىن اتاپ ءوتتى. سول كەزدەسۋلەردە كوتەرىلگەن باستى ماسەلەلەردىڭ ءبىرى – كاسىبي باسقارۋشىلاردىڭ جەتىسپەۋشىلىگى.
«2020 جىلى تۇرعىن ءۇيدى باسقارۋشىلار نارىعى تۋرالى زاڭ قابىلداندى. الايدا بەس جىلعا جۋىق ۋاقىت وتسە دە, ناقتى ناتيجە جوق. رەتتەۋشى ورگانداردا نارىقتىڭ جاعدايى تۋرالى تولىق مالىمەت جوق, قانشا كومپانيا جۇمىس ىستەيتىنى, ولاردىڭ قۇقىقتىق فورماسى قانداي, كاسىبي مارتەبە العان ماماندار سانى قانشا ەكەنى بەلگىسىز», دەدى دەپۋتات.
سمىشلياەۆانىڭ ايتۋىنشا, 2023 جىلعا دەيىن باسقارۋشىلاردى «اتامەكەن» ۇكپ اككرەديتتەگەن وقۋ ورتالىقتارى دايارلاپ كەلگەن. سول ۋاقىتتا 25 وقۋ ورتالىعى اشىلىپ, 10 وبلىس پەن ءۇش قالادا ماماندار وقىتىلدى. الايدا كەيىننەن بۇل سالاعا قوسىمشا تالاپتار ەنگىزىلىپ, كاسىبي باسقارۋشىلاردى سەرتيفيكاتتاۋ قۇقىعىنا تەك ارنايى اككرەديتاتسيادان وتكەن ورتالىقتار عانا يە بولدى. قازىرگى تاڭدا مۇنداي ورتالىقتار ەلدە جوق.
«بۇل جاعداي كوپتەگەن باسقارۋشى كومپانيالار مەن پيك جۇمىسىنا قاۋىپ توندىرەدى. اككرەديتاتسيا ميلليونداعان تەڭگە تۇرادى, سىناقتىڭ قۇنى دا 100 مىڭ تەڭگەگە دەيىن جەتەدى. ونىڭ ۇستىنە, تاجىريبەلى باسقارۋشىلاردىڭ ءبارى بىردەي ونلاين-تەستىلەۋدەن وتە الماي قالۋى مۇمكىن. ناتيجەسىندە ءبىز مامانداردى جوعالتىپ, تۇرعىندار ۇيلەرىن باسقارۋسىز قالدىرادى», دەدى ول.
دەپۋتات بىرقاتار ۇسىنىستار ايتتى. اتاپ ايتقاندا:
-
تۇرعىن ءۇيدى باسقارۋ نارىعىنا جەدەل تۇردە ساندىق جانە ساپالىق باعا بەرۋ;
-
اككرەديتاتسيا ورتالىقتارىن ەلدىڭ بارلىق وڭىرىندە اشىپ, مونوپولياعا جول بەرمەۋ;
-
تەستىلەۋ باعاسىن قولجەتىمدى ەتۋ جانە ونى مامانداردىڭ جاس ەرەكشەلىكتەرىنە بەيىمدەۋ;
-
قازىرگى ۋاقىتتا بەرىلگەن سەرتيفيكاتتاردىڭ بارلىعىن زاڭدى دەپ تانۋ.
سمىشلياەۆا ورتالىق جانە جەرگىلىكتى اتقارۋشى ورگاندار بۇل ماسەلەدەن شەت قالماۋى كەرەگىن ەرەكشە اتاپ ءوتتى.
