فوتو: parlam.kz
دەپۋتات ماگەررام ماگەرراموۆتىڭ ايتۋىنشا, قازىرگى تاڭدا «جەكەلەگەن اۋرۋلارى بار ازاماتتاردىڭ جەكەلەگەن ساناتتارىن تەگىن جانە (نەمەسە) جەڭىلدىكتى امبۋلاتوريالىق قامتاماسىز ەتۋگە ارنالعان دارىلىك زاتتار مەن مەديتسينالىق بۇيىمداردىڭ تىزبەسىنە» ەنگىزىلگەن پرەپاراتتاردى نارىقتا ەركىن ساتىپ الۋ مۇمكىندىگى كۇرت تومەندەگەن. سەبەبى اكەلىنگەن نەمەسە وندىرىلگەن دارىلەردىڭ باسىم بولىگى وسى ءتىزىم شەڭبەرىندەگى قاجەتتىلىكتى جابۋعا جۇمسالادى. بىراق بۇل كولەم نەۆرولوگيالىق اۋرۋلارعا شالدىققان بارلىق ناۋقاستاردى قامتۋعا جەتكىلىكسىز.
«ونىڭ ۇستىنە قۇرامىندا ەسىرتكى زاتتارى بار دارىلىك زاتتاردى تىركەۋ جانە يمپورتتاۋ ۆەدومستۆوارالىق باقىلاۋدىڭ قاجەتتىلىگىنە بايلانىستى قيىن», دەدى دەپۋتات.
دەپۋتا وسى سەبەپتى ەپيلەپسيامەن اۋىراتىن ازاماتتار ۇستامالاردىڭ الدىن الۋ نەمەسە جەدەل كومەك كورسەتۋ ءۇشىن قاجەتتى دارىلەردى ءوز بەتىمەن تابۋعا ءماجبۇر ەكەنىن اتاپ ءوتتى.
«الايدا مۇنداي پرەپاراتتاردىڭ كوپشىلىگى ەسىرتكىلىك زاتتاردى قامتيتىنى بەلگىلى. سونىڭ سالدارىنان ازاماتتار ءدارى-دارمەكتى زاڭسىز جولمەن ىزدەۋگە ءماجبۇر بولىپ, قىلمىستىق قۋدالاۋ قاتەرىنە تاپ بولىپ وتىر», دەدى ول.
ونىڭ پىكىرىنشە, وتاندىق فارماتسەۆتيكالىق نارىق الەمدىك تاجىريبەدەن ايتارلىقتاي ارتتا قالعان.
«ماسەلەن, بۇگىندە ەپيلەپسيالىق ۇستامالاردى توقتاتۋعا ارنالعان مۇرىن ارقىلى (ينترانازالدى) قولدانىلاتىن جاڭا پرەپاراتتار بار. بۇل دارىلەر اسىرەسە بالالار ءۇشىن وتە قولايلى. بىراق قازاقستانداعى دارىلىك زاتتاردى تىركەۋ جۇيەسى شەتەلدىك وسىنداي پرەپاراتتاردىڭ قولجەتىمدىلىگىن شەكتەپ, ناۋقاستاردىڭ جاعدايىن ودان ءارى قيىنداتىپ وتىر», دەدى م.ماگەرراموۆ
وسىعان وراي, قحپ فراكتسياسى ءۇش نەگىزگى تالاپ قويدى.
- «جەكەلەگەن اۋرۋلارى بار ازاماتتاردى تەگىن جانە (نەمەسە) جەڭىلدىكتى دارىلىك قامتاماسىز ەتۋگە ارنالعان تىزىمگە» ەنگىزىلگەن پرەپاراتتاردىڭ نارىقتاعى تاپشىلىعىنا جول بەرەتىن تاجىريبەنى توقتاتۋ.
- نەۆرولوگيالىق اۋرۋلارعا شالدىققان ناۋقاستاردى دارىلىك پرەپاراتتارمەن قامتاماسىز ەتۋدەگى تاپشىلىقتى جويۋ.
- قۇرامىندا ەسىرتكى زاتتارى بار دارىلىك پرەپاراتتاردى تىركەۋ مەن اكەلۋ ءتارتىبى مەن مەرزىمىن جەڭىلدەتىپ, ناۋقاستارعا قاجەتتى دارىلەردىڭ قولجەتىمدىلىگىن قامتاماسىز ەتۋ.
ء«بىزدىڭ ەڭ باستى ماقساتىمىز – اۋىر دەرتكە شالدىققان ازاماتتارعا قولجەتىمدى, ساپالى ءدارى-دارمەكپەن ۋاقىتىلى قولداۋ كورسەتۋ. ەپيلەپسياعا قارسى پرەپاراتتاردىڭ تاپشىلىعى – تەك مەديتسينالىق ماسەلە ەمەس, بۇل ازاماتتاردىڭ ءومىر ساپاسىنا, ءتىپتى ولاردىڭ قاۋىپسىزدىگىنە تىكەلەي اسەر ەتەتىن تۇيتكىل. سوندىقتان ۇكىمەت وسى ماسەلەنى كەيىنگە قالدىرماي, جۇيەلى شەشىم قابىلداۋى ءتيىس», دەدى ماگەررام ماگەراموۆ.
