دەپۋتاتتارعا بيىلعى 15 ساۋىردە ەرەۆان قالاسىندا جاسالعان قازاقستان مەن ارمەنيا ۇكىمەتتەرى اراسىنداعى كوشى-قون سالاسىنداعى ىنتىماقتاستىق تۋرالى كەلىسىم مەن ەكى ەل ازاماتتارىنىڭ ساپارلارى مەن بولۋ ءتارتىبى تۋرالى كەلىسىمدى راتيفيكاتسيالايتىن زاڭ جوبالارىن قاراۋ ۇسىنىلادى.
كوشى-قون سالاسىنداعى ىنتىماقتاستىق تۋرالى كەلىسىم ستاتيستيكالىق, قۇقىقتىق جانە عىلىمي-ادىستەمەلىك اقپاراتپەن, تاراپتاردىڭ اۋماقتارىندا ورنالاسقان مەملەكەتتەردىڭ ازاماتتارى تۋرالى مالىمەتتەرمەن الماسۋدى, سونداي-اق كوشى-قون ساياساتى ماسەلەلەرى بويىنشا تاجىريبە مەن پراكتيكالىق كومەك كورسەتۋدى كوزدەيدى. ازاماتتاردىڭ تۇرعىلىقتى جەرىنىڭ قۇقىقتىق جاعدايى, كوشى-قون زاڭناماسىن بۇزۋ فاكتىلەرىن انىقتاۋ جانە زاڭسىز كوشى-قون ارنالارىنىڭ جولىن كەسۋ ماسەلەلەرىنە ەرەكشە نازار اۋدارىلادى. بۇل شارالار ءوزارا ءىس-ارەكەتتىڭ تيىمدىلىگىن ارتتىرۋعا جانە قوس ازاماتتىقپەن كۇرەسۋگە باعىتتالعان.
ال ەكىنشى كەلىسىم ازاماتتاردىڭ ءجۇرۋ جانە بولۋ تارتىبىنە قاتىستى. ول ەكى ەل ازاماتتارىنا كەلىسىمدە كوزدەلگەن جارامدى قۇجاتتاردىڭ ءبىرى بويىنشا مەملەكەتتىك شەكارانى كەسىپ وتكەن كەزدەن باستاپ 90 تاۋلىككە دەيىن ەكىنشى تاراپ مەملەكەتىنىڭ اۋماعىنا ەركىن كىرۋ, شىعۋ, ترانزيتپەن ءوتۋ, ورىن اۋىستىرۋ جانە بولۋ قۇقىعىن بەرەدى.
سونداي-اق جالپى وتىرىستا دەپۋتاتتار جاڭا زاڭ جوبالارىن جۇمىسقا قابىلدايدى. ولاردىڭ قاتارىندا «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا ەنگىزىلەتىن تۇزەتۋلەر, «2026–2028 جىلدارعا ارنالعان رەسپۋبليكالىق بيۋدجەت تۋرالى» جانە وسى جىلدارعا ارنالعان رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالالار, استانا بيۋدجەتتەرى اراسىنداعى جالپى سيپاتتاعى ترانسفەرتتەردىڭ كولەمى تۋرالى» زاڭ جوبالارى, تسيفرلىق كودەكس جوباسى مەن وعان ىلەسپە تۇزەتۋلەر, مەملەكەتتىك باسقارۋ مەن ءوزىن ءوزى باسقارۋعا قاتىستى زاڭنامالىق وزگەرىستەر, سونداي-اق باسقا دا جوبالار بار.
