جەس «قازحروم» تۇك» اق قۇرامىنداعى ءدوڭ كەن بايىتۋ كومبيناتىنىڭ ماڭىندا سالىندى. 155 گەكتار اۋماقتا ورنالاسقان جەل ەلەكتر ستانساسىندا الداعى ۋاقىتتا جىلىنا 500 ميلليون كۆ/ساع-تان استام ەلەكتر قۋاتى وندىرىلمەكشى. بۇل 440 مىڭ تونناعا دەيىن كومىرقىشقىل گازى شىعارىندىلارىن ازايتىپ, 300 مىڭ توننادان استام كومىردى ۇنەمدەۋگە مۇمكىندىك بەرەدى. ايتا كەتۋ كەرەك, 2024 جىلدىڭ جەلتوقسانىندا حرومتاۋ جەس-ءنىڭ العاشقى ەكى قوندىرعىسى ەلەكتر قۋاتىن وندىرە باستاسا, 2025 جىلدىڭ 1 قاڭتارىندا العاشقى ميلليون كۆ/ساع بەردى. بۇگىندە بارلىق تۋربينالار قوندىرىلىپ ءبىتتى. ستراتەگيالىق جوباعا «Eurasian Resources Group» (ERG) 74 ملرد تەڭگەدەن استام ينۆەستيتسيا قۇيىپ, قازاقستاننىڭ دامۋ بانكى قارجىلاي قولدادى. جەل گەنەراتورلارىندا وندىرىلگەن ەلەكتر قۋاتى ءدوڭ كەن بايىتۋ كومبيناتىنىڭ قارقىندى تۇردە ءوسىپ كەلە جاتقان قاجەتىلىگىن دە وتەيتىن بولادى.
«حرومتاۋ» جەل ەلەكتر ستانساسىنىڭ ىسكە قوسىلۋى كونستيتۋتسيا كۇنى جانە شاحتەر كۇنىمەن تۇسپا-تۇس كەلگەن ايتۋلى وقيعا ەكەندىگىن اتاپ ءوتتى اقتوبە وبلىسىنىڭ اكىمى اسحات شاحاروۆ. ء«وندىرىسى قارقىندى دامىپ كەلە جاتقان, تۇرعىندارىنىڭ ءوسىمى دە جوعارى حرومتاۋ اۋدانىنىڭ الەۋمەتتىك-ەكونوميكالىق دامۋىندا «Eurasian Resources Group» (ERG) كومپانياسىنىڭ ۇلەسى زور. بۇگىن دە بالامالى ەنەرگەتيكانى دامىتۋ بويىنشا ەلىمىزدەگى ەڭ ءىرى جوبانىڭ ىسكە اسىرىلعانىنا كۋا بولىپ وتىرمىز. «قازحروم» تۇك» اق – 30 جىلدان بەرى الەۋمەتتىك جاۋاپكەرشىلىكتى موينىنا العان كومپانيا. بىرنەشە الەۋمەتتىك نىساندار تۇرعىزدى, باسقا دا ماسەلەلەردى شەشىپ كەلەدى. بىلتىر كۇزدە ءدال وسى جەردە بىرنەشە قوندىرعى ورناتا باستاعانىنا كۋا بولعانبىز. قىسقا مەرزىمدە قىتاي كومپانياسى ارقايسىسى 6 مۆت بولاتىن ەلەكتر قۋاتىن وندىرەتىن قوندىرعىلاردى ورناتىپ ۇلگەردى.
«ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى پرەزيدەنت جولداۋىنا سايكەس, اقتوبە وبلىسىندا ينۆەستيتسيالار مەن يننوۆاتسياعا, زاماناۋي ءوندىرىستى دامىتۋعا باسىمدىق بەرىلىپ كەلەدى. وڭىردە نەگىزگى كاپيتالعا سالىنعان ينۆەستيتسيا كولەمى جىل باسىنان بەرى 590,1 ملرد تەڭگەگە جەتىپ, وتكەن جىلدىڭ وسى كەزەڭىمەن سالىستىرعاندا, 52,7 %-عا ءوستى. بۇل كورسەتكىشتەر اقتوبە وبلىسىنىڭ جوعارى ينۆەستيتسيالىق الەۋەتىن جانە بيزنەس تاراپىنان سەنىمنىڭ ارتىپ كەلە جاتقانىن كورسەتەدى. ال «حرومتاۋ» جەل ەلەكتر ستانساسىندا 25 جاڭا جۇمىس ورنى اشىلادى», دەدى ءوڭىر باسشىسى.
«بۇگىن اقتوبە وبلىسىندا ERG-نىڭ العاشقى جەل ەنەرگەتيكاسى جوباسىن ىسكە قوسۋ سالتاناتىنا كۋا بولىپ وتىرمىز. بۇل – پرەزيدەنتىمىز قاسىم-جومارت توقاەۆتىڭ تاپسىرماسىنا سايكەس ورىندالعان ەلىمىزدەگى جاڭارتىلاتىن قۋات كوزدەرىنىڭ ۇلەسىن ارتتىرۋدى كوزدەيتىن مەگاجوبا. ءبىزدىڭ كومپانيا 150 مۆت ەلەكتر قۋاتىن وندىرەتىن جوبانى اقتوبە وبلىسىندا ەڭ ءبىرىنشى بولىپ ىسكە اسىردى. وسى «حرومتاۋ» جەل ەلەكتر ستانساسىنا 74 ملرد تەڭگە قارجى جۇمسادىق.
2023 جىلى توپ دەكاربونداۋ ستراتەگياسىن قابىلداپ, ونى دۋبايدا وتكەن دۇنيەجۇزىلىك كليمات سامميتىندە تانىستىردىق. سول ۋاقىتتان بەرى ستراتەگيانى قولداپ قانا قويماي, قارجىلاندىرۋدى باستاپ, قىسقا مەرزىمدە ىسكە اسىردىق. الداعى ۋاقىتتا «جاسىل» ەنەرگەتيكا جوبالارىن ەلىمىزدە باسقا سالالاردا دا دامىتا بەرەمىز. ءبىز الەمدە جوعارى ساپاسىمەن تانىلعان حروم كەنى ونىمدەرىن ەكولوگيالىق تۇرعىدان تازا وندىرە وتىرىپ, بۇرىنعىدان دا باسەكەگە قابىلەتتىرەك ەتۋگە تىرىسامىز. وسىلايشا, ERG مەتاللۋرگيانى بولاشاقتىڭ اجىراماس بولىگىنە اينالدىرادى. وسى جەردە جوبامىزدى قارجىلاي قولداعان دامۋ بانكى باسشىلىعىنا, قوندىرعىلاردى قىسقا مەرزىمدە ورناتقان تەحنولوگيالىق ارىپتەسىمىز «PowerChina» كومپانياسىنا ەرەكشە العىسىمدى بىلدىرەمىن», دەپ اتاپ كورسەتتى ERG ديرەكتورلار كەڭەسىنىڭ توراعاسى, باس اتقارۋشى ديرەكتورى شۋحرات يبراگيموۆ.
ERG 2023 جىلى قولعا العان دەكاربونداۋ ستراتەگياسىنا سايكەس, 300 ملن اقش دوللارىن قۇرايتىن ينۆەستيتسيانى جۇزەگە اسىرماقشى. ماسەلەن, تەمىر كەنى ديۆيزيونىندا قاشار جىلۋ ورتالىعى گازعا اۋىستىرىلسا, الليۋميني ديۆيزيونىندا بۋدى تۇتىنۋدى ازايتۋ باعدارلاماسى ەنگىزىلەدى, جاڭا كالتسيناتسيا پەشتەرى مەن قاراشىرىندى ءوندىرىسىن جەتىلدىرۋ جۇمىستارى ءجۇرىپ جاتىر. سونداي-اق اقتوبە فەرروقورىتپا زاۋىتىندا قايتالاما قۋات كوزدەرىن ەلەكتر توعىنا اينالدىراتىن ستانسا سالىنىپ جاتىر.
«قازاقستاننىڭ دامۋ بانكى ەلىمىزدەگى جاڭارتىلاتىن ەنەرگەتيكا سالاسىنداعى جوبالاردى قارجىلاندىرۋعا باسىمدىق بەرەدى. ءبىز وسىلايشا ەلدىڭ دەكاربونداۋ ماقساتتارىنا جانە ەنەرگەتيكالىق قاۋىپسىزدىگىن قامتاماسىز ەتۋگە ۇلەس قوساتىن جاڭا گەنەراتسيا كوزدەرىنىڭ قۇرىلىسىن قولدايمىز. «حرومتاۋ» جەس – دامۋ ينستيتۋتتارى مەن بيزنەستىڭ بىرىگىپ, ەلىمىز «جاسىل» ەكونوميكاسىنىڭ نەگىزىن قالايتىن اۋقىمدى جوبالاردى جۇزەگە اسىرا باستاعانىنىڭ دالەلى», دەپ اتاپ ءوتتى قازاقستاننىڭ دامۋ بانكى باسقارما توراعاسىنىڭ ورىنباسارى. شاراعا قاتىسقان قحر باس كونسۋلدىعىنىڭ اقتوبەدەگى وكىلى قۇرىلىستىڭ قىسقا مەرزىمدە وتە ءساتتى ورىندالعانىن اتاپ ءوتتى.
سالتاناتتى راسىمنەن سوڭ ءوڭىر باسشىسى اسحات شاحاروۆ پەن ERG ديرەكتورلار كەڭەسىنىڭ توراعاسى, باس اتقارۋشى ديرەكتورى شۋحرات يبراگيموۆ حرومتاۋ قالاسىندا وتكەن شاحتەر كۇنى مەرەكەسىنە قاتىسىپ, تاۋ-كەن سالاسىندا ەڭبەك ەتەتىن ءوندىرىس وزاتتارىن ماراپاتتادى.
اقتوبە وبلىسى
