وسى رەتتە فۋتبول جانكۇيەرى ءارى «قايراتتىڭ» ناعىز فاناتى رەتىندە ءماجىلىس دەپۋتاتى, اقىن, جۋرناليست جاناربەك ءاشىمجانوۆتى پارلامەنت پالاتالارىنىڭ بىرلەسكەن وتىرىسىنان كەيىن كۋلۋاردا كەزدەستىرىپ, سوزگە تارتتىق. الماتىدا وتكەن شەشۋشى ماتچ پەن جۋىرداعى جەرەبە تارتۋ راسىمىنەن العان اسەرىن ءبولىسۋدى سۇرادىق.
«مەن الماتىنىڭ «قايراتىنا» سوناۋ بالا كۇنىمنەن, ناقتى ايتقاندا جەتى-سەگىز جاسىمنان جانكۇيەرمىن. كەزىندە اۋىلدا جۇرگەندە وسىنداعى اعالارىما قولقا سالىپ, الماتىعا كەلىپ ويىندارىن ورتالىق ستاديوننان قارايتىنمىن. ودان كەيىن الماتى قالاسىندا وتكەن ستۋدەنتتىك جىلداردان باستاپ مەن «قايراتتىڭ» ۇيدەگى ءبىر دە ءبىر ماتچىن جىبەرگەن جوقپىن. ورتالىق ستاديونعا بارىپ تۇرىپ جانكۇيەر بولاتىنمىن. وسى جولعى چەمپيوندار ليگاسىنداعى ويىندارىنىڭ بارلىعىن تۇنگى ۋاقىتتا وتكەنىنە قاراماستان مۇقيات باقىلاپ, ويىن الدىندا ساراپتاما جاساپ, ستاتيستيكالىق كورسەتكىشتەردى قاراپ ءجۇردىم. اسىرەسە, «وليمپيا», «سلوۆان» كلۋبتارىمەن بولعان ويىندار, ونىڭ ىشىندە سىرت الاڭداعى ويىنداردا كوڭىل تولقيتىن ساتتەر كوپ بولدى», دەيدى ج.ءاشىمجانوۆ.
ول ساراپشىلاردىڭ توپتىق كەزەڭگە شىعۋعا جولداما بەرگەن «سەلتيكپەن» بولعان سىرت الاڭداعى تەڭ ويىندى جەڭىسكە پاراپار دەپ باعالاۋىنا قوسىلاتىنىن جەتكىزدى.
«گلازگوداعى ويىننان كەيىن-اق «سەلتيكتىڭ», سىرت الاڭداعى «قايراتتىڭ» ويىنىنان كەيىن بۇكىلالەمدىك فۋتبول قاۋىمداستىعى, حالىقارالىق فۋتبول قاۋىمداستىعى «قايراتقا», ونىڭ ويىنشىلارىنا مويىن بۇرىپ جاتتى.
سەبەبى «سەلتيك» شوتلانديانىڭ 55 مارتە چەمپيونى بولعان كەشەگى توپ كوماندالاردىڭ ءبىرى عوي. بۇل كلۋب وسىنىڭ الدىندا عانا «باۆاريامەن» وتكەن ويىندا 2:2 ەسەبىمەن تەڭ ءتۇسىپ, قانداي ويىن كورسەتتى. اينالدىرعان التى ايدىڭ ىشىندە سول «سەلتيككە» قايرات كورسەتكەن ءبىزدىڭ الماتىنىڭ «قايراتى» ەرەكشە كوڭىل تولقىتتى. ول ءبىزدىڭ قازاق فۋتبولىنداعى تاريحي ساتتەر بولىپ قالا بەرمەك. بۇل جەڭىس قوعامدىق سيپات الىپ, فۋتبولدىڭ اسەرى, جانكۇيەرلەردىڭ كوڭىل تولقىنىسى ءالى دە ۇلكەن تالقىلاۋلارعا, جاقسى كوڭىل كۇيلەرگە ۇلاسىپ جاتىر. بۇل «قايراتتىڭ» عانا ەمەس, جالپى قازاق فۋتبولىنىڭ تاريحي ءساتى. ءبىر كەزەڭدەردە بۇنداي جەتىستىككە وسىدان ون شاقتى جىل بۇرىن استانانىڭ «استانا» كومانداسى قول جەتكىزگەن. ەندى مىنە «قايرات» كلۋبى ۇلكەن بەلەسكە شىعىپ وتىر. بۇل ءبىزدىڭ قازاق فۋتبولىنىڭ, قازاق جانكۇيەرلەرىنىڭ, اسىرەسە, «قايرات» جانكۇيەرلەرىنىڭ دە ۇلكەن بەلەسى», دەدى جاناربەك ءاشىمجانوۆ.
ول چەمپيوندار ليگاسىنىڭ جەرەبە تارتۋ ءراسىمىن تىكەلەي ەفيردەن كوز جىبەرمەي قاراعانىن ايتتى. سونداي-اق «قايراتقا» كەلەسى قارسىلاس بولعان كلۋبتاردىڭ قاي-قايسىسى دا وسال ەمەس ەكەنىن اشىپ ايتتى.
«الەمنىڭ ەڭ جۇلدىزدى كومانداسى «رەال مادريد», لوندوننىڭ «ارسەنالى», ميلاننىڭ «ينتەرى», ودان كەيىنگى گرەكيالىق «وليمپياكوس» بولسا دا, بەلگيانىڭ «بريۋگگەسى» دە, «قايراتپەن» قاتار تاريح جاساعان «پافوس» تا وڭاي شاعىلاتىن جاڭعاق ەمەس. الەمنىڭ توپ-كوماندالارىنان مىندەتتى تۇردە نە «بارسەلونا», نە «باۆاريا», نە «پسج», ءمادريدتىڭ «رەالى» بولسىن ايتەۋىر بىرەۋىنىڭ تۇسەتىنى ايقىن ەدى. بىراق «رەال ءمادريدتىڭ» بىزگە كەلەتىنى ەرەكشە كوڭىل تولقىتتى. سوندىقتان وتە ءبىر تارتىستى دا قىزىقتى ماتچ بولعالى تۇر», دەيدى ءماجىلىس دەپۋتاتى جاناربەك ءاشىمجانوۆ.
ونىڭ ايتۋىنشا, ۋەفا-نىڭ قازىرگى ەرەجەسى ساي وتەتىن ويىندار دا تارتىستى وتەتىن سىڭايلى. سىرت الاڭدا قيىنعا سوققانىمەن, «قايراتتىڭ» ءوز الاڭىمىزدا ۇپاي الۋ مۇمكىندىكتەرى بار كورىنەدى.
««قايرات» ءتورت رەت سىرت الاڭدا, ءتورت رەت ءوز الاڭىندا كەزدەسەدى. قوناقتاعى ويىنداردىڭ وڭاي بولماسى انىق. الايدا ءوزىمنىڭ جورامالىم بويىنشا الماتىدا «وليمپياكوس» پەن «پافوستان» دا ۇپاي الۋعا بولادى. ءسويتىپ تاعى ءبىر تەڭ ويىندارمەن كەمى 7-8 ۇپاي الامىز-اۋ دەگەن ۇمىتتەمىن. ال الماتىنىڭ ورتالىق الاڭىنداعى «رەال مادريدپەن» وتەتىن ماتچ بۇكىل الەم قۇلاق ءتۇرىپ, كوز تىگەتىن كەزدەسۋ بولعالى تۇر. جالپى, قاي ويىندى الساق تا وڭايعا سوقپايدى», دەيدى ج.ءاشىمجانوۆ.
راسىندا «رەال مادريدپەن» بولاتىن ويىننىڭ دۋى دا دۋمانى دا باسىمىراق ەكەنى ءاۋ باستان بەلگىلى. كورولدىك كلۋبتىڭ دا الاتاۋ باۋرايىنداعى جاسىل الاڭدا بارىن سالاتىنى انىق. ويتكەنى بۇل كەزدەسۋ باستاپقى تۋرلاردىڭ ءبىرى بولعاندىقتان ولارعا دا ءۇش ۇپاي الۋ اسا ماڭىزدى بولىپ تۇر. سول سەبەپتى كوماندا ساپىنداعى مباپپە, ۆينيسيۋس, كۋرتۋا, كارۆاحال, بەللينگەم, ۆالۆەردە, رودريگو, گۇلەر, الەكساندر-ارنولد سىندى الەمدىك فۋتبول جۇلدىزدارىنىڭ ءبارى بولماسا دا باسىم بولىگىنىڭ الماتىعا ات ءىزىن سالاتىنى انىق. ال «قايرات» الەمدىك فۋتبول الپاۋىتىنا قانشالىقتى قارسىلىق تانىتاتىنىن ۋاقىت ەنشىسىنە قالدىرايىق. سوڭعى ويىنىندا الەم نازارىن وزىنە اۋدارعان الماتىلىق كلۋب تاعى دا سەنساتسيا جاساي الار ما ەكەن؟
«ەستەرىڭىزدە بولسا كەزىندە رەسەيدىڭ پرەمەر-ليگاسىنداعى تاتارستاننىڭ «رۋبين» كومانداسى «بارسەلونامەن» تەڭ ويناپ, بۇكىل الەمدى تاڭعالدىرعان. ءتىپتى جەڭگەن دە ءساتى بولدى. سونداي ءبىر سەنساتسيالار بىزدە دە بولۋى ابدەن ىقتيمال. يتاليانىڭ «ينتەرى» دە وسال ەمەس. لوندوننىڭ «ارسەنالى» دا جەڭىسكە ۇمتىلىپ تۇر. وتكەن جولى «بريۋگگە «رەيندجەرستى» قالاي تالقاندادى. سوندىقتان قاي-قايسىسىمەن بولعان ويىن «قايرات» ءۇشىن ۇلكەن حالىقارالىق تاجىريبەگە جول اشسا, ەكىنشىدەن قازاق فۋتبولىنىڭ دەڭگەيىن كوتەرۋگە سەپ بولماق», دەگەن ج.ءاشىمجانوۆ كورشى وزبەك اعايىننىڭ دا الەم بىرىنشىلىگىنىڭ فينالدىق كەزەڭىنە جولداما العانىن ەرەكشە قۋانىشپەن قابىلداعانىن اتاپ ءوتتى.
«وزبەكستاننىڭ فۋتبولدان ۇلتتىق قۇراماسىنىڭ فينالدىق كەزەڭگە شىققان ويىنىن ماسكەۋدە ءىسساپاردا ءجۇرىپ قاراپ وتىردىم. ءوزىمىزدىڭ باۋىرلاس, كورشى ەل رەتىندە وزبەكتەر ءۇشىن وتە قاتتى قۋاندىم. سول كەزدە وزبەك فۋتبولىنا الەم قالاي سۇيسىنسە, كەشە دە ءبىزدىڭ «قايراتقا» قاتىستى دا جاھاندىق اقپارات قۇرالدارى از جازبادى. بۇل جەرەبە دە وڭاي تۇسكەن جوق. ال «قايرات» سول جەرەبەگە دەيىنگى جولدى وتە لايىقتى ءجۇرىپ ءوتتى. ءوز الاڭىمىزدا دا, سىرت الاڭدا دا ءبىزدىڭ فۋتبولشىلارىمىز شەبەرلىكتەرىن كورسەتتى», دەپ ءسوزىن تۇيىندەدى ءماجىلىس دەپۋتاتى.
جالپى, «قايراتتىڭ» وسى چەمپيوندار ليگاسى جولىنداعى جەڭىستى جورىعى الەمدىك اقپارات قۇرالدارىنىڭ عانا ەمەس, فۋتبول ماماندارىنىڭ, سكاۋتتاردىڭ دا قىزىعۋشىلىعىن تۋعىزباي قويمادى. اسىرەسە لوندوننىڭ ايگىلى «چەلسي» كلۋبىمەن كەلىسىمشارت جاساپ ۇلگەرگەن داستان ساتباەۆتىڭ شەبەرلىگى ءجيى ايتىلىپ ءجۇر. ال قاقپاشى اناربەكوۆ الماتىلىقتاردى عانا ەمەس, كۇللى الاشتى باقىتقا بولەدى. ال ونىڭ ويىن كەزىندەگى كەرەمەت سەيفتەرى مەن پەنالتيلەر سەرياسىنداعى ءۇش سوققىنى قايتارعان اككىلىگى دە سكاۋتتاردىڭ نازارىن وزىنە اۋدارماي قويماسى انىق. كەلەسى وتەر ويىنداردا دا ول ءوزىنىڭ شەبەرلىگىن دالەلدەي تۇسسەدى دەگەن سەنىمدەمىز. ەركىن تاپالوۆ تا قورعانىستا تاسقامال ەكەنىن تانىتىپ كەلەدى. بۇيىرتسا, داستاننىڭ ءىزىن الا تاعى دا تالانتتارىمىز جاھانعا تانىلار دەگەن ءۇمىت بار.
