وسىناۋ كەنشىلەر كۇنى جانە بيىلعى جۇمىسشى ماماندارى جىلى اياسىندا 2019 جىلى مەملەكەت باسشىسى قاسىم-جومارت توقاەۆ ءوزى بارىپ, ىسكە قوسقان ەلىمىزدەگى بەلدى كەن ورىندارىنىڭ ءبىرى اقتوعاي كەن ورنىندا تاۋ-كەن ماستەرى بولىپ ىستەيتىن ازامات جۇماحانوۆپەن كەنشىلەردىڭ قاۋىپسىزدىگى ماسەلەسى تۋرالى سويلەسىپ ەدىك.
ازامات KAZ Minerals Aktogay كومپانياسىنىڭ بولگەن گرانتىمەن جوعارى ءبىلىم الىپ, سول كەن ورنىڭدا جۇمىس ىستەپ جۇرگەن تاجىريبەلى مامان.
– مەن اياگوز اۋدانى تاڭسىق اۋىلىندا ءوستىم. مەكتەپتى كامال كادىرجانوۆ اتىنداعى قىزىلقيا ورتا مەكتەبىندە ءبىتىردىم. تالىمگەر باعدارلاماسى ارقىلى 2018 جىلى د.سەرىكباەۆ اتىنداعى شىعىس قازاقستان مەملەكەتتىك ۋنيۆەرسيتەتىنە وقۋعا ءتۇستىم. GEOVIA Surpac, GEOVIA MineSched ماماندىقتار ۇزدىك ءبىتىردىم. ودان وسى كومپانيادا ەكى جىل تاجىريبەدەن ءوتىم. بۇگىندە اقتوعاي كەن ورنىندا تاۋ-كەن ماستەرى بولىپ جۇمىس ىستەيمىن, – دەيدى ول.
شاحتەر ماماندىعى اۋىر جانە قاۋىپتى كاسىپ تۇرىنە جاتادى. وندىرىستە بولاتىن توتەنشە وقيعالار سالدارىنان قانشاما كەنشى قازا تاۋىپ نەمەسە ءتۇرلى جاراقاتتارعا ۇشىراپ جاتادى. مىنە وسىنداي, سالاعا جاۋاپتى مامان ازامات جۇماحانوۆتىڭ ايتۋىنشا, كەن ورىنداعى باستى جەتىستىك كەن قازۋ ەمەس, جۇمىسشى مامانداردىڭ اماندىعى مەن دەنساۋلىعى.
– قاراماعىمدا 120 ادام جۇمىس اتقارادى. مەن سولاردىڭ قاۋىپسىزدىگىنە, كارەردەگى بولىپ جاتقان جاعدايلارعا باقىلاۋ جاساپ, وزىمە بەرىلگەن جاۋاپتى مىندەتتى ورىندايمىن. ەڭبەك قاۋىپسىزدىگى وتە جوعارى ءمان بەرەمىز. كومپانيادا Goal-zero دەپ اتالاتىن ۇعىم بار, نولدىك قاۋىپتىلىك دەپ اۋدارىلادى. ول ءۇشىن كوپتەگەن ءىس-شارالار قولدانىلادى. ەڭبەك اقىمىز ۋاقىتىلى بەرىلەدى, جۇمىس كيىم ءبارى جاقسى ءارى جوعارى ساپادا, – دەيدى تاۋ-كەن ماستەرى.
اباي وبلىسى
