سۋرەت: janabastau.kz
پرەزيدەنتتىك ورتالىقتىڭ ديرەكتورىنىڭ ورىنباسارى سەرىك سىدىقوۆ جيىنعا قاتىسۋشىلاردى كونستيتۋتسيا كۇنىمەن قۇتتىقتاپ وتىز جىلدىقتا كونستيتۋتسيامىزدىڭ ءتۇرلى سىرتقى جانە ىشكى سىن-قاتەرلەرگە توتەپ بەرگەنىنە قاتىستى ويىن ورتاعا سالدى.
«ارينە, كونستيتۋتسيالىق رەفورمالار اياقتالدى دەي المايمىز. الداعى ۋاقىتتا رەفورمالار ۇزدىكسىز جۇرە بەرەدى. كونستيتۋتسيالىق نورمالاردى وزەكتەندىرۋ جانە ولاردىڭ ىسكە اسىرىلۋىن باقىلاۋ بويىنشا ءالى دە كوپ جۇمىس اتقارىلۋى قاجەت. مەنىڭشە, كونستيتۋتسيالىق رەفورمانى جاساۋ تەك ساياسي ەرىك-جىگەرگە بايلانىستى ەمەس. بۇل ورايدا رەفورمالارعا قوعامنىڭ دايىن بولۋى اسا ماڭىزدى. سول سەبەپتى دە ءبىز مەملەكەتپەن قاتار قوعامدىق بيلىكتى كۇشەيتۋگە كۇش جۇمساۋعا ءتيىسپىز», دەپ اتاپ كورسەتتى.
ال «Respublica» پارتياسىنىڭ توراعاسى, پارلامەنت ءماجىلىسىنىڭ دەپۋتاتى ايداربەك حودجانازاروۆ وتىز جىل ىشىندە كونستيتۋتسيا تاۋەلسىزدىكتى نىعايتۋعا, قوعامدىق كەلىسىمدى ساقتاۋعا جانە دەموكراتيالىق مەملەكەت قۇرۋعا بەرىك تىرەك بولعانىنا توقتالدى.
«اتا زاڭ قازاقستانعا قالىپتاسۋدىڭ كۇردەلى كەزەڭدەرىنەن وتۋگە, وتپەلى كەزەڭنىڭ قيىندىقتارىن ەڭسەرۋگە جانە قازىرگى قوعامنىڭ نەگىزىن قالاۋعا مۇمكىندىك بەردى. ءبىز بۇگىن پرەزيدەنتتىك ورتالىقپەن بىرلەسە وتىرىپ, ەلىمىزدىڭ كونستيتۋتسياسىنىڭ تاريحىن عانا ەمەس, ەلىمىزدىڭ قۇقىقتىق قۇجاتتىڭ بولاشاعىن دا تالقىلاپ وتىرمىز. قازىرگى قوعام ءۇشىن قۇقىقتىڭ ۇستەمدىگى, ادىلەت, بارلىق ازاماتقا تەڭ مۇمكىندىكتەر تۋعىزۋ, جەكە ادامنىڭ قادىر-قاسيەتىن قۇرمەتتەۋ سىندى نەگىزگى قاعيداتتارى وتە وزەكتى. بۇل ماسەلەلەردى جالاڭ ۇران ەتپەي, مەملەكەتتىڭ ىشكى دامۋ باعىتىن بەلگىلەيتىن, كەلەشەك قازاقستاننىڭ قانداي بولاتىندىعىن ايقىندايتىن ناقتى باعدارعا اينالدىرۋىمىز كەرەك. ءدال وسى قۇندىلىقتار ءبىزدىڭ ادىلەتتى قازاقستانعا دەگەن ورتاق كوزقاراسىمىزدى قالىپتاستىرادى», دەدى ا.حودجانازاروۆ.
پارلامەنتاريزم ينستيتۋتىنىڭ ديرەكتورى ناتاليا پان كەيىنگى جىلدارى جاسالىپ جاتقان بىرقاتار ماڭىزدى رەفورماعا قاتىستى وي-پىكىرىن ورتاعا سالدى.
«بۇگىنگى تاڭدا دەموكراتيالىق نەگىزدەردى نىعايتۋعا, ازاماتتاردىڭ قۇقىقتارى مەن بوستاندىقتارىن كەڭەيتۋگە, سونداي-اق نەعۇرلىم تەڭدەستىرىلگەن بيلىك جۇيەسىن قۇرۋعا باعىتتالعان رەفورمالار ءساتتى جۇرگىزىلىپ جاتىر. اتاپ ايتساق, 2022 جىلى پرەزيدەنتتىڭ باستاماسىمەن وتكەن رەفەرەندۋمنان كەيىن پارلامەنتتىڭ وكىلەتتىگى كەڭەيتىلدى, ازاماتتاردىڭ تىكەلەي جۇگىنۋ قۇقىعىمەن كونستيتۋتسيالىق سوت قۇرىلدى, پرەزيدەنتتىڭ پارتيالىق قىزمەتتەرى رەتكە كەلتىرىلدى, پارلامەنتتىك باقىلاۋ كۇشەيتىلدى», دەدى.
ءىس-شارا اياسىندا ازاماتتىق قوعام مەن قۇقىق قورعاۋ ۇيىمدارىنىڭ ساراپشىلارى ءتۇرلى تاقىرىپتا باياندامالار جاساپ, كونستيتۋتسيالىق قۇرىلىستى دامىتۋدىڭ نەگىزگى باعىتتارى مەن قۇقىقتىق ساۋاتتىلىق دەڭگەيىن ارتتىرۋ, سونداي-اق جاستار مەن ازاماتتاردىڭ كونستيتۋتسيالىق مادەنيەتتى قالىپتاستىرۋعا بەلسەندى قاتىسۋىن ىنتالاندىرۋ, ت.ب سەكىلدى ماسەلەلەردى قوعام نازارىنا ۇسىندى. جيىن سوڭىندا ساراپشىلىق كەزدەسۋدىڭ قورىتىندىسى رەتىندە ارنايى قاۋلى قابىلداندى.
