اگەنتتىك توراعاسى دارحان جازىقباي ءوزىنىڭ قۇتتىقتاۋ سوزىندە: «بيىل كونستيتۋتسيامىزعا 30 جىل تولىپ وتىر. وسى ۋاقىت ارالىعىندا اتا زاڭىمىزعا سايكەس ەلىمىزدىڭ قۇقىقتىق, دەموكراتيالىق, زايىرلى, الەۋمەتتىك مەملەكەت رەتىندە ىرگەسى بەكىدى. بىرلىك, تەڭدىك, ادام قۇقىقتارى مەن بوستاندىقتارى سىندى قاعيداتتار بەرىك ورنىعىپ, وتانىمىزدىڭ دامۋداعى باستى باعدارى رەتىندە ايقىندالدى. سوڭعى جىلدارى مەملەكەت باسشىسىنىڭ تىكەلەي باستاماسىمەن جۇزەگە اسىرىلعان كونستيتۋتسيالىق رەفورمالاردىڭ ناتيجەسىندە ەلىمىزدە جان-جاقتى دەموكراتيالاندىرۋ ءۇردىسى ورىن الىپ, مەملەكەتتىك باسقارۋدى جاڭعىرتۋعا جاڭاشا مۇمكىندىكتەر جاسالدى. ادام قۇقىقتارى جونىندەگى ۋاكىلدىڭ جانە قۇقىق قورعاۋ ينستيتۋتتارىنىڭ مارتەبەسى ارتتى» - دەدى.
سونداي اق, دارحان جازىقباي: «كونستيتۋتسيالىق سوت قايتا قۇرىلىپ بۇگىندە بۇل ۇيىم اتا زاڭىمىزدىڭ ۇستەمدىگىن ورنىقتىرۋشى ىقپالدى ينستيتۋتقا اينالدى. وسىلايشا ادىلەتتى قوعامنىڭ نەگىزى سانالاتىن زاڭ مەن ءتارتىپتى, تەڭ مۇمكىندىكتەردى قامتاماسىز ەتۋدەگى كونستيتۋتسيانىڭ ءرولى ارتا ءتۇستى. جۇزەگە اسىرىلعان كونستيتۋتسيالىق رەفورمالاردى جاڭا قوعامدىق كەلىسىم دەۋگە تولىقتاي نەگىز بار. وندا «حالىق ۇنىنە قۇلاق اساتىن مەملەكەت» تۇجىرىمداماسى ايقىن كورىنىس تاپتى. بۇل اتا زاڭىمىزداعى ۇستانىمداردى تۇبەگەيلى وزگەرتكەن, ساپالى جاڭعىرتۋ بولدى» - دەپ اتاپ ءوتتى.
سونىمەن قاتار اگەنتتىك توراعاسى مەملەكەتتىك قىزمەتشىلەر ءۇشىن اتا زاڭمەن ايقىندالعان قۇندىلىقتاردان اينىماي, ادىلەتتى قازاقستان قاعيدالارىنا ساي اشىق, ءادىل, ادال بولىپ, جۇكتەلگەن مىندەتتى ساپالى اتقارۋدىڭ ماڭىزى زور ەكەنىن جانە كونستيتۋتسيادا ايقىندالعان قاعيداتتاردى بەرىك ۇستانۋ, ونى قۇرمەت تۇتۋ وتانىن سۇيەتىن ءار ازاماتتىڭ قاسيەتتى پارىزى ەكەنىن ايتتى.
شارا اياسىندا لاۋازىمدىق مىندەتىن ۇلگىلى اتقارعان مەملەكەتتىك قىزمەتشىلەر مەن قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورلىق-وقىتۋشىلىق قۇرامىنا «قازاقستان رەسپۋبليكاسىنىڭ كونستيتۋتسياسىنا 30 جىل» مەرەكەلىك مەدالى جانە اگەنتتىك توراعاسىنىڭ العىس حاتتارى تابىستالدى.
