«مودەل ناقتى دەرەكتەر نەگىزىندە وقىتىلدى. بيىلدىڭ وزىندە FSM Social قوسىمشاسى ارقىلى 100 مىڭ وتباسىنىڭ تۇرمىس جاعدايى تەكسەرىلدى. ءوتىنىش بەرۋشىلەردىڭ كوپشىلىگى ءوز ۇيلەرىنىڭ سۋرەتتەرىن تىركەگەن, ال جۇيە ءدال وسى سۋرەتتەر ارقىلى وتباسىنىڭ كومەككە قانشالىقتى مۇقتاج ەكەنىن انىقتاۋدى ۇيرەندى. قازىردىڭ وزىندە دالدىك دەڭگەيى 90%-دان استى», دەدى ول.
دەگەنمەن الگوريتم تۇپكىلىكتى شەشىم قابىلدامايدى. جاساندى ينتەللەكت تەك ساراپتاما جاسايدى دا, ناتيجەسىن جەرگىلىكتى كوميسسياعا جولدايدى. سوڭعى شەشىم – كوميسسيانىڭ قۇزىرىندا.
ۆيتسە-ءمينيستردىڭ ايتۋىنشا, بۇل تاجىريبە تەك الەۋمەتتىك كومەكپەن شەكتەلمەيدى:
«بولاشاقتا جاساندى ينتەللەكتتى مەديتسينا سالاسىنا دا قولدانۋ جوسپاردا بار. مۇگەدەكتىك دەڭگەيى, اۋرۋ تاريحى, دارىگەرلەردىڭ قورىتىندىسى جانە انكەتالار نەگىزىندە انىقتاي الاتىن بولادى. مۇنداي ءتاسىل بيۋروكراتيانى ازايتىپ, تەكسەرۋ پروتسەسىن جەدەلدەتەدى», دەپ ءتۇسىندىردى انافين.
