جۋىردا كۇرشىم اۋدانىنىڭ بوران اۋىلىنا بارعانىمىزدا, باعا جەتپەس جادىگەرگە كەز بولدىق. اۋىلدا كۇردەلى جوندەۋدەن ءوتىپ, پايدالانۋعا بەرىلگەن مادەنيەت ءۇيىنىڭ جانىندا بالبال ءمۇسىن مەن تابيعي تاڭبالى تاستار قويىلعان اشىق اسپان استىنداعى مۇراجاي جاسالىپ جاتىر ەكەن. بالبال تاستاردى سارىتاۋدان الىپ كەلىپتى. سارىتاۋ – مارقاكول تۇنىعى ەتەگىن شايىپ جاتقان التاي سىلەمدەرىنىڭ ءبىرى. ب.ز.د. ءىى مىڭجىلدىققا تيەسىلى بولۋى مۇمكىن دەپ بولجانعان بالبال تاستار ازىرشە كونە ەسكەرتكىش رەتىندە ەش كىتاپقا ەنبەگەن, تىزىمگە الىنباعان. تەك جەرگىلىكتى تۇرعىندارعا تانىس.
– بۇلار – بۋلدوزەرمەن سۋ اعاتىن توعاندى بەكىتىپ جاتقاندا جەر قىرتىسىنان تابىلعان تاستار. بالبال تاستاردى دامبىعا قاراي يتەرىپ جاتىر ەكەن. بابالارىمىزدان قالعان قۇندى مۇرانىڭ مۇنداي كۇي كەشىپ جاتقانىنا قاراپ تۇرۋعا ءداتىمىز بارمادى. ويتكەنى, سۋ تيسە ب ۇلىنەدى, كورگەن جۇرت قوراسىنا ىرگەتاس قىلىپ قۇيىپ جىبەرۋى دە مۇمكىن. سوندىقتان باسشىلىقتىڭ رۇقساتىمەن اسپان استىنداعى مۇراجاي جاساۋعا الىپ كەلدىم, – دەدى بوران اۋىلىنىڭ اكىمى ماقسات اعيەكوۆ.
سارىتاۋداعى دامبىنى بەكىتۋ جۇمىستارى كەزىندە ون ەكى بالبال تاس تابىلعان ەكەن. اۋدان اكىمى التايبەك سەيىتوۆتىڭ ايتۋىنشا, تاڭبالى تاستار كۇرشىم اۋدانىنىڭ اۋماعىندا ءجيى كەزدەسەدى. اسىرەسە, جىلىتاۋ دەگەن جەردە ەرتە زاماننان كوپ بالبال مەن تاڭبالى تاستار قالعان. وعان ەشكىم ارنايى بارا بەرمەيدى. سوندىقتان, اۋىلعا كەلەتىن قوناقتار مەن مارقاكول وڭىرىنە اعىلعان تۋريستەردىڭ تاماشالاۋىنا ىڭعايلى بولۋى جانە ەل مەن جەر تاريحىن ناسيحاتتاۋ ماقساتىندا بالبال تاستاردان مۇراجاي جاساۋ تۋرالى وي تۋدى.
باعزى زامانداعى ءبادىزشى قاشاعان بالبال تاستىڭ پوشىمى ەرەكشە. وڭ قولىن جۇرەك تۇسىنا قويىپ, بەلىن بۋىنعان مۇسىندە بەيبىت ءومىردىڭ نىشانى مەن بيىك ءىلتيپات بار. بالبال ءمۇسىننىڭ بۇيىرىنە الدەكىم جازۋ جازىپ كەتىپتى.
وسىنداي ۆانداليزمنەن قورعاۋ ءۇشىن دە تاستاردىڭ ماپەلى قولعا كوشكەنى ءجون بولعان سياقتى. بالبال ءمۇسىننىڭ جانىنداعى تاڭبالى تاستارعا ەجەلگى سۋرەتشىلەردىڭ شەبەر تۋىندىلارى تاڭبالانعان. ياعني, جەرگە ەنگەن تۇسى قابارىپ, كۇن تيگەن جاعى اشىق تۇسكە ەنگەن تاستاردىڭ بەتىندە قاسقىر, ەلىك, مارال, بارىس, اي ءمۇيىزدى تاۋتەكە جانە اڭشى بەينەلەرى كورىنىس تاپقان.
اۋىل اكىمىنىڭ ايتۋىنشا, الداعى ۋاقىتتا بالبال ءمۇسىن مەن تاڭبالى تاستاردىڭ اۋماعى تالاپقا ساي كورىكتەندىرىلىپ, قورشالاتىن بولادى.
دۋمان اناش,
«ەگەمەن قازاقستان».
شىعىس قازاقستان وبلىسى,
كۇرشىم اۋدانى.
سۋرەتتەردى تۇسىرگەن اۆتور.
